Mizoram-a khaw fai ber Lunglei khawpui

Aizawl | January 26, 2021: Kum 2017 atanga Urban Development & Poverty Alleviation Department-in a buatsaih thin, Mizoram Khawpui Fai Intihsiakna 2020 result chu puan a ni a, lawmman te hi AR Ground, Lammualah Mizoram Governor PS. Shreedharan Pillai-in a hlan.

Khawpui fai ni tura Lunglei hmalakna thlalak HETAH dah a ni

Khawpui Fai Insiakna, 2020 Category-I ah pakhatna Lunglei, pahnihna Saitual, pathumna Khawzawl an ni a, Category-II ah pakhatna Biate, pahnihna Lengpui, pathumna N.Vanlaiphai an ni a. Category I leh II belhkhawma a vai (overall) a fai ber pakhatna Lunglei, pahnihna Biate, pathumna Saitual an ni. 

Village Council thawktha pakhatna Lengpui VC, pahnihna Tlabung VC, pathumna Bairabi Joint VC te an ni a, Best Nodal Officer Award dawngtu Pi Dorothy Muansangi SDO(C) N.Vanlaiphai a ni.

Lammuala hun hman zawh hian Ajal Club-ah Khawpui tithate tukthuan kilpuina leh lawmpuina hun hman a ni a. He hun hi UD&PA minister Tawnluia leh RD Minister Lalruatkima,  ten an hmanpui a ni.

Aijal Club-a hun hman hi Dr. C. Vanlalramsanga, Commissioner & Secretary, UD&PA in a kaihruai a, Khawpui tithate hnenah Deputy Chief Minister Pu Tawnluia’n lawmpuina thilpek Memento hlanna a nei a ni.

He hunah hian Deputy Chief Minister Pu Tawnluia chuan Khawpui Fai Intihsiakna 2020 a lawmman dawngtute chu a lawmpui thu a sawi a, sawrkar chu a bul tum tu chauh a ni a, a taka thawktute chu Village Council te, Local Council member te leh NGOs te an ni a ti a. Faina ngainat kawngah theihtawp chhuah zel turin leh lawmman dawngtute bakah he intihsiakna a tel khua 23 te chu a sawm bawk a. Pu Tawnluia chuan Mizoram pumpui chu ODF (pawnlera inthiatna awmlo) a ni tawh thu sawiin, ODF+ ni turin UD&PA Department chuan tan a la mek a nit i a, faina beihpui hi pawngpaw tih chi a nilo a, mi rilru-ah tuh a nih loh chuan awmzia thui tak a awmtheilo tiin a sawi.

Minister Pu Lalruatkima ten kalkhawmte hmaah thu sawiin, Ram a changkan ang zelin chhungtinin bungrua tam tak kan neih belh zel a, hengte hi a tih riral danah leh a sawngbawl danah Sawrkarin Dan a siam te hi kan zawm that a ngai hle a ni, a ti a. Faina kawngah hian thil pawimawh pali  - Sawrkar leh mipuite tanrual pawimawhna te, Taimak hi Faina bul intanna a ni tih leh COVID-19 pawh hi a dona tha ber pakhat chu kutsil fai a ni a, hei hian faina chu natna laka min vengtu a ni tih a tilang a, Kan vel a fai that loh chuan natna hri a piang thin a, chu chuan hriselna khawih pawiin kan Economy pawh a nghawng nasa hle thei a ni tih vawiin ni ah hian hre thar leh theuh ila, Pathian pawhin faina hi a dah pawimawh tih hre chung leh India Hnam Pa- India Ram tun dinhmun min hlangkai thei tuin a ngaipawimawh em em faina hi nasa zawka kalpui turin kalkhawmte hi a chah nawn leh a ni.

Hun hman zawhah hian Awardee Towns aiawhte hi Deputy Chief Minister in tukthuan a kilpui zui a ni.

Post a Comment

He post chungchanga i ngaihdan lo sawi ve rawh:

Previous Post Next Post