College zirlai Online Exam-a harsatna awm MSU in MZU hotute hnenah thlen; Zirlai harsatna neite inthlahrung lo turin ngen

Aizawl | January 14, 2021: Mizo Students' Union, General Headquarters, Aizawl chuan vawiin chhun dar 12:30 khan College zirlai Online Examination chungchanga thil felhlel awm te, exam kal meka harsatna tawkte leh zirlaite exam kalphung chungchangah MZU registrar Prof. Lalnundanga an hmu.




Registrar Prof. Lalnundanga chuan Online Examination chu MCTA, Principals' Council, MZU Students' Council, RIPANS, DIET, College SU te, Controller of Examinations te nen an ngaihtuah hnu ah uluk takin examination kalphung chu an duan anih thu a sawi a. Software an hman tur pawh uluk taka an thlan anih thu leh zirlai sing chuang exam felfai taka dawngzo thei tur an hman thu a sawi. Exam dan turah demonstration tha taka neih lawk vek a nih bakah, harsatna leh technical problem awm thei te pawh zirtirtute hrilhlawk vek an ni a ti. Exam chu college tina an zirtirtute ven tur anih avangin harsatna awm thei te pawh mahni zirtirtute hrilh hre turin MSU hruaitute chu zirlaite hriattir turin a chah a, zirlai harsatna tawk te chu Examination Department lamin an ngaihtuah zui leh dawn a ni. Harsatna tak tak tawk chin te tan chuan inhriatthiamna zau tak a awm tur thu chu MSU a hrilh bawk a ni.

MSU chuan Online Examination ah hian practical neih ngai heng B.Ed., M.Ed., Science practical, Nursing leh a dangte bakah Mizoram chhung leh pawna mizo zirlai awm te tan practical exam an neih theih dan tur ngaihtuah tura a thlen chu Registrar chuan ruahmanna an siam tawh thu a sawi a. Online Examination atan hian Higher & Technical Education Deparment chuan college hrang hrangah survey nei tawhin , facilities nei tha lo tan SEDP kaltlanga sem dan ngaihtuah a nih tawh thu Registrar chuan MSU hruaitute a hrilh bawk a. Zirna in thenkhatah zirtirtuten zirlai harsa zual bik tan pawisa thawhkhawmin examna tur hmanrua an leisak thu a sawi chu MSU chuan zirlaite aiawhin lawmthu a sawi nghal bawk a ni. MSU chuan exam chungchang zirlai harsatna neite chu inthlahrung lova MSU hruaitute hrilh vat turin an chah nawn a ni.

Post a Comment

0 Comments