CM-in Khawzawl DC Office Complex lungphum a phum; COVID-19 hrileng avangin sawrkarin pawisa nei tam thei rihlo mahse district headquarters sak chu ngaih pawimawh a nih avangin cheng nuai 1000 sanction sa a ni - CM

Aizawl | January 13, 2021: Chief Minister Pu Zoramthanga chuan vawiin khan Khawzawl District sawrkar office hmunpui tur, Deputy Commissioner's Office Complex sakna tur lungphum phumin, District Horticulture Office a hawng bawk. Khawzawl bialtu MLA, Deputy Chief Minister Pu Tawnluia chuan Chief Minister hi tawiawmin Sports Minister Pu Robert Romawia Royte leh Horticulture Development Board Vice-Chairman Prof. F. Lalnunmawia te an tel bawk.


Khawzawl-a hmalakna thar puala inkhawm tawi, Zaingen YMA Hall-a buatsaihah hian khuallian Chief Minister Pu Zoramthanga chuan vawiina DC Office Complex lungphum phum chu district headquarters tur, sawrkar department hrang hrangin headquarters-a an neiha an awm khawm theihna tur a nih thu a sawi.

Chief Minister chuan sawrkar office hrang hrang dawr tur ten hmun leh hmuna awlsam taka an dawr theihna tura ruahman a nih thu a sawi a. COVID-19 hrileng avangin sawrkarin pawisa nei tam thei rihlo mahse district headquarters sak chu ngaih pawimawh a nih avangin cheng nuai 1000 sanction sa a nih thu a sawi a, boruak tha a inher chhuah beisei chungin chak taka hna bawhzui tum a ni, a ti.


Chief Minister chuan ram a thang chho zel a, mamawh pawh a tam belhin a danglam zel dawn tih District mipuiten an rilruah pai se, a ti a. Tuna Myanmar ram nena inthlunzawmna tur kawng zau tak siam mek chu nakin lawkah lirthei lian tam takin an la rawn zawh ang a, khua a than len zel dan tur thlir lawkin, an district tihhmasawn zelna turah fing tak leh rilru inhawng taka ngaihtuahna hmang thiam turin a chah a ni.
Chief Minister Pu Zoramthanga chuan state pum hmasawn theihna tura chhung tinin thawhchhuah tha tak an neih leh retheia tumah an awm loh nan ram leilung hausakna haichhuah tum a nih thu a sawi a. COVID-19 hrileng avangin chak taka hmalak theih rih loh mahse tunah vaccine pek bul tan turin ram a inpuahchah tawh a, beiseina eng nen hma chak taka lak thuai theih beisei a ni, a ti a, COVID-19 hrileng hrek behna atangin remhriatna thar tha zawk pawh a pian belh zel thu te a sawi. Chief Minister chuan tum chiang tak neia, theihna leh thiamna zawng zawng sawmkhawma hna kan thawh tlan chuan malsawmna kan haichhuak ngei ang, tiin mipuite thawhpuiah a sawm a ni.
Khualzahawm Deputy Chief Minister Pu Tawnluia chuan an hun hman mek chu Khawzawl district tana hun lawmawm tak a nih thu sawiin, Khawzawl district tihchangtlunna tura sawrkar hmalaknaah district mipui an lawm hle a ni, a ti a. Khawzawl district tihpuitlinna hna kal mek zelah department hrang hrang- UD&PA, Revenue, Education leh a dang ten district office an hawn bakah Divisional leh Sub-divisional office te pawh District Office ah hlangkaiin, department dang pawhin district office hawng tura hma an lak zel thu a sawi a. District a phuisui sawtin, kawng hrang hranga hmasawnna ruhrel siam a nih zel dan tarlangin, aerosports neihna tur hmun te thlithlai a nih thu a sawi bawk. Deputy Chief Minister chuan Khawzawl district chu changkang zel tur a nih thu sawiin, Mizorama khaw fai ber ber te pawh district chhung ami a nih thu te leh tunah hian BPL chhungkua awmlohna, BPL Free Village khua 5 a awm thu te a sawi a. Hmasawn belh zelna tur erawh a tam tiin, Pu Tawnluia chuan Khawzawl district mipuite te chu theihtawp chhuah turin a sawm a ni.
Minister Pu Robert Romawia Royte chuan Khawzawl district-a hmasawnna hmuh belh tur a awm chho zel chu a lawmpui thu a sawi a. District thar pathum te cheibawl tura hmalakna hrang hrang zingah Community Information Centre din a nih theih nan sawrkar laipuiin a thuphunga phalna a pek tawh thu a sawi a; district thar pathumte tan department hrang hrangin theihtawp an chhuah thu a sawi a ni.
MLA Prof. F. Lalnunmawia pawhin Khawzawl district leh district thar dang pahnihte an lo changtlun deuh deuh theihna tura sawrkarin theihtawp a chhuah thu sawiin, state pum tan pawh hmasawnna a thlen ngei a beisei thu a sawi a. Khawzawl district chu leilung nghenga ei leh bar zawnna kawngah theihna nei tha sang tak nia a hriat thu sawiin, vawiina DHO office thar hawn pawh tangkai taka district mipuiin an hman thiam a, hma an sawn phah ngei a duhsak thu a sawi.
Additional Chief Secretary, Horticulture enkawltu Pu J.C Ramthanga chuan vawiina lungphum phum tak DC office complex sakna tur pawisa, contractor leh mamawh dang te chu peihfel a ni tawh a, hma lak nghal theih mai a nih thu a sawi. Addl. Chief Secretary chuan vawiina District Horticulture Office hawn chungchangah Divisional Office thin kha District office-ah a hming thlak satliah mai lovin tihlen a nih thu a sawi a, kuthnathawktute tan pawh a tangkai lehzual tur thu a sawi a ni.
Khawzawl Joint VC Chairman chuan Khawzawl district mipui aiawhin sawrkar hmalaknaah lawmthu a sawi a. Khawzawl DC Pu Zothanmawia chuan lawmthu sawiin hun hnung a khar a ni.
Vawiin programme-ah hian Horticulture Department Director Pi Elizabeth Saipari leh officer dangte bakah Khawzawl District officer pawimawhte, khawtlang leh tlawmngai pawl hruaitu sawm bikte an tel a ni.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post