Chief Minister in Saitual Deputy Commissioner's Office Complex lungphum a phum; District Horticulture Office thar a hawng

Aizawl | January 9, 2021: Chief Minister Pu Zoramthanga chuan nimin khan Saitual District office hmunpui tur District Deputy Commissioner's Office Complex lungphum phum in, District Horticulture Office thar a hawng. Bialtu MLA, Power Minister Pu R. Lalzirliana chuan Chief Minister hi a tawiawm.


Saitual a hmalakna thar puala inkhawm tawi DC complex a buatsaihah khuallian Chief Minister chuan covid hrileng in hmalakna tam tak tithuanawp mahse theih ang angin sawrkarin ruahmanna a siam tawh te bawhzui char char a nih thu a sawi a. District office complex siam chungchangah Chief Minister chuan hmun khata department office hrang hrang te an awm khawm chuan office dawrtu tur mipui tan a awlsam phah zawk dawn avanga chutianga ruahmanna siam chu a nih thu a sawi. Saitual district chuan horticulture lama hmasawnna atan theihna (potential) tha tak nei a ni tih department mithiam ten an sawi thu tarlangin, vawiina DHO office hawn thar pawh tangkai taka chhawr a nih ngei a beisei thu a sawi. Chief Minister chuan Saitual khawpui chu thang zel tur a ni tih rilru ah pai reng chungin tun atang hian khaw mipuite rilru ah khua hmasawn zel dan turah ruahmanna (plan) felfai tak nei turin a chah a ni.


Khualzahawm Minister Pu R. Lalzirliana chuan Saitual district chu district puitling a hlankai a nih a, hna thawk thei a siam a nih hnu ah hmasawnna thar hmuh tur a awm zel chu lawmawm a tih thu a sawi a. Mizoram sawrkarin district thar pathum a district office complex siamna tur Rs. 10 crores theuh a ruahman chu lawmawm a ti a. Hrilengin ziaawm lam a pan zel beisei chungin DC complex leh hmalakna dang awm zel tur te chu ruahman anga tha taka peihfel a nih theih nan district mipui te chu sawrkar tawiawm tha turin Minister chuan a sawm a ni.


Additional Chief Secretary, Horticulture Department Pu J.C Ramthanga chuan nimin inkhawm hi kaihruaiin, DHO office thar hawn a ni ta chu lawmawm a tih thu leh District office complex changtlung tak din zawh thuai a beisei thu a sawi a. Horticulture Department Director Pi Elizabeth Saipari pawhin thu sawiin, DHO office thar hawn tak chu mipui, a bik takin kuthnathawktuten tangkai taka an chhawr a beisei thu a sawi tel a ni. Saitual Joint VC Chairman chuan Saitual district mipui aiawhin sawrkar hmalakna chunga an lawm thu a sawi a. Hun hi Saitual DC Pu VL Hruaizela Khiangte chuan lawmthu sawiin a khar a ni.

Post a Comment

0 Comments