Bengvar fal, Mizoram Unlock 8.0 inkaihhruaina tichhuaktu man!

Aizawl | January 8, 2021: January 6 chawhnu lama social media hrang hranga darh ‘Unlock 8.0 inkaihhruaina dan thar ni awm tak, thu belhchian dawl lo siama tichhuaktu chu cyber crime police-ten manin thubuai an siamsak niin thu dawnna chuan a sawi.

January 6 chawhnu dar 3.00 hnulam khan ‘Unlock 8.0 inkaihhruaina dan thar tlangpui’ tih thupuia hmangin Ministry of Home Affairs-in 1.1.2021 atanga 31.1.2021 thleng awh tura an ruahman a ni, tia thuhma dah chu social media – Whatsapp leh Facebook lamahte nasa takin a darh a, he ‘Unlock 8.0’ ah hian zirna hawn hun turte; Covid kai tlemna state ah chuan state sawrkarin inkaihhruaina siam chungin sakhaw biakna in hawn phal a ni tawh thu te; metro train leh thlawhna service te dan pangngaia kal tir a nih dawn tawh thu te; Covid-19 kai tlemna state-ah chuan zan curfew tihtawp theih a nih tawh dawn thu te; mi 100 aia tam lo mipui punkhawm phal a nih tawh thu te a ziak a ni.

He ‘thuchhuak’ hi a darh chakin mipui a ti phawklek a, heti lam kaihhnawih sawrkar thuneitute leh chanchinbumiten zawhna tam tak dawngin, a bikin zirna leh sakhaw biakna hawn theih tur chungchangah kohhran thenkhat chuan thutkhawm hmanhmawh koh tintuah hmante pawh an awm nia sawi a ni.

Hetianga mipui tichi ai thei thudik lo vawrhdarh a nih avang hian CID Cyber Crime Police chuan January 6 zan la la hian a lo chhuahna hi chhuizui nghalin, January 7 chawhnu lam khan a tichhuaktu nia puh Jerome Malsawmtluanga (20), Venghnuai Aizawl chu manin thubuai an siamsak a, IPC Section 505 (1)(b) hmangin thubuai ziahluh a ni tiin The Aizawl Post chuan a tarlang.

Police-te hnena a sawi danin, he thil hi ama phuahchawp liau liau niin, hetianga a darh tak vakah hian a hlauthawng chuan a post chhuahna hmasa ber ‘Whatsapp group’ ami chu a delete leh a; mah se, police-te hian an manchhuak ta tho a ni.

IPC Section 505 (1)(b) mipui vantlang a tha lo zawnga ti chi ai a, harsatna siam thei thil chawkchhuaktu chunga hremna dan a ni.

CID Cyber Crime Police hotute chuan hetiang thu belhchian dawl lo thil siam leh thehdarh hi dan bawhchhiatna a nih bakah Covid-19 kaihhnawihah kher phei chuan sawrkarin khauh taka hma a lak chhoh thin thu an sawi a. Hetiang thu phuahchawp emaw a thehdarh lamah mipui fimkhur turin an ngen tih an sawi.

Post a Comment

0 Comments