Tuirial bial chhung ZPM VC te'n Lalduhoma thla hual

Aizawl | December 29, 2020 : Vawiin December ni 29, 2020 (Thawhlehni) hian Tuirial bial chhung ZPM Party VC Member te'n Pu Lalduhoma Ex-MLA thlahualna neiin, hemi atana an sum thawhkhawm Rs 24,500/- chu Pu Lalduhoma Ex-MLA chenna In Chawlhhmun-ah an hlan. He hun hi Tuirial Bialtu MLA Pu Andrew H. Thangliana chuan a hmanpui a, VC Member leh Secretary mi 22 an tel a ni. 

He hunah hian bialtu MLA Pu Andrew H. Thangliana chuan thu sawiin, a bial chhung ZPM VC ten hetiang tih nachang an hria chu a chhuan thu leh lawmawm a tih thu sawiin, "MLA, LADS Fund atanga hna kan thawh te pawh a chhuanawm hlawm em em a, kumin hi kan vanduai a, kan fund zawng zawng bial tana hmang thei lovin, hrileng do nan Chief Minister Relief Fund-ah cheng nuai 25 kan thawh bakah, keimahni bial chhunga hrileng do kaihhnawihah cheng engemawzat hman a ngai bawk a, hetiang a ni chunga sum awm ang angte daihzai leh ṭangkai taka hman a ni hi ka lawm hle a ni. Kumin chhunga kan fund hman tur 2nd Installment - hi sorkar aţangin vawiin thlengin kan la dawng lova chu'ng kan dawn hunah pawh chuan khawtlang tana rotling leh chhenfakawm kan thlan thiama, ṭha tak leh entawntlaka kan thawh zel a pawimawh a ni. Tin, miharsa leh chhumchhe zawk te hre rengin an tan inhlawhna kawng te pawh i siamsak thiam ang u. Tuirial bialchhung mipui zawng zawng te kumthar 2021 - hlim leh lawm taka chuangkai ţheuh turin duhsakna ka hlanin chibai ka buk a che u," a ti.

Pu Lalduhoma, Leader ZPM pawhin thu sawiin, "MLA atanga bân ka ni hi ZPM Party tan malsawmna niin ka hria. Pathianin ZPM dinchhuahna atan kan chhungkua min hlân niin ka ngai a, hetianga dik lo taka bân ka nih avang hian kan chhungkua hian mi khawngaihna kan dawng nasa em em a, hmun hrang hrang atangin thlahualsaktu kan nei mawlh mawlh reng a, VC anga thlahualsakna erawh tun tum hi kan tawn vawikhatna a ni a, kan chhungkua hian Tuirial bial ZPM VC te chungah lawmthu kan sawi tak meuh meuh a ni. Kan hmalawkah AMC election leh Serchhip bial by-election hmachhawn kan hmabak a, heng election kan hmachhawn turah te hian Pathian zarah kan chak ngei ka beiseiin ka ring tlat a, kan campaign dan te fimkhur ila, mi rilru tina zawng leh mi dang pawi sawi zawnga awm loh i tum hram hram ang u," a ti bawk.

He hunah hian Upa Zairemmawia, Kawnpui VC - III, Treasurer in hunserh hmangin, Pu C Dawngvela, VCP North Chaltlang - II in Tuirial bial ZPM VC aiawhin thlahualna tangka fai a hlan a. Eddy Zosangliana Colney, General Secretary pawhin telpuiin, ZPM General Headquarters aiawhin lawmthu sawina a nei a ni.