Khawlailung nula Bolero in su; A sutuin a tlansan, Khawlailung Joint YMA in dem

Aizawl | December 6, 2020: Nimin December ni 5, 2020 (inrinni) tlai dar 4:30 vel khan Khawlailung leh Chekawn inkarah kan khaw nula Vanlallawmkimi (VLI) d/o R. Lalhmangaiha ( L) Bike R15 leh motor Bolero campers, MZ01L 4258 te chu insuin, VLI hian hliam na tak a tuar a. Hetia VLI'n hliam na tak a tuar chung hian a sutu motor driver an tlansan nghal a. A sutute hi N. Mualcheng VC leh YMA tangkawp ten lo manin anmahni ngei pawhin an sut thu an sawi niin Khawlailung Joint YMA chuan thuhhuah an tarlang.

Khawlailung Joint YMA thuchhuah tarlan danin, VLi sutu hi Zonunmawia s/o Lalbawiha, Keitum Sikulpui veng niin, ani leh a chuanpui dangte hian ngaihsak zui miah lovin Nula hliam tuar hi an tlan san a. "Mizo nunphung leh tlawmngaihna palzuta hetia an khawsa duh ta mai hi mak kan tiin kan dem takzet a ni. Hetianga kan hman nunphung hlu tak bosal zawnga inngaihthahna hi Tuichangral huamchhung mai  ni lo, Mizoram hmundangah pawh thleng zui leh tawh lo turin kan duh takzet a ni." an ti.


Khawlailung Joint YMA chuan, "Kan khaw nula VLI sutu man a nih theih nan hian Tuichangral khaw hrang hrangte lungrual takin kan tangho a, N. Mualcheng VC leh YMA ten an lo man ta pawh hi lawmawm kan ti a, an chungah leh Tuichangral mipuite chungah lawmthu kan sawi takmeuh meuh a ni. Tin, an chetsualnaah  mi tlawmngai tak tak ten phut let awm hauh lova kan zonun zemawi tak lanchhuahtira a tul apiang lo buaipuitu zawng zawngte chungah pawh thinlung takin lawmthu kan sawi bawk e." tiin thuchhuah siamin an tarlang a ni.


(A hnuai-ah hian VLi accident tawh dan Lalremruata ziah dah a ni.)

VL-i ACCIDENT TAWH DAN
- Lalremruata, Lungchhuan

Nimin Ni 5.12. 2020 Inrinni khan Aizawl aṭanga kan chhuahin kan hmaa tlan car pakhat nen kan in pel chho zak zaka. Tlai lam dar 4:35 velah Khawlailung leh Chekawn inkar Dairam tui pelh tawh kawng kawi laiah kan hmaa car tlan chu tlan pelh ka tum lai taka a din tak a vangin keini pawh kan ding a. 

Car a mi te chuan an kutin min lo hawi mawlh mawlh a, kan din ve rualin hmeichhe mangang aw leh ṭap thawm kan hre nghala. Kan va fin phei chuan kawng laia VLi natuar lo tal vel leh kawng sir blacktop loh chin hnim kara a scooty lo let chu kan hmua thil awmzia tur awm ang chu kan hre nghal thei. 

VLi chu ka nau phurh te pahnih Chhana leh Maduhan a theih ang angin an bawihsawm a. keiin  khawi khua nge i nih tiin ka zawt a, Khawlailung a nih thu a sawi a. A pa ka zawta Lalhmangaiha tia min chhan leh rualin keiin, I u chu Zuati Chekawn ka lo ti nghala, Aw ti a min chhan a vangin accident tawk chu kan chian ta phawt. 

Khawlailug lama a chhungte lo hrilh nghal turin an ṭhenawm Pu H.Malsawma ka phone nghal a, Pu Sawma ka phone hun hi Dar 4:42 a ni. Chekawna a u te lo hrilh turin Pu Biaka ka be leh nghal a. Chutih lai chuan ka naute chuan tawhsual a tawh dan an lo zawt bawk a. VLi chuan harsa tak chungin, Chekawn aṭangin ka haw, Pickup in min su, Chekawn lamah a  tlan tlang tih leh a No chu 46 a inṭan niin ka hria tih hi harsa takin a sawi thei. 

VLi hian a ke velah hliam natak a tuara. A kekawr hi a ṭet hrephrup bawka. A lang thei chin bak chu PHC thlenpui ran ṭula kan hriat zawk a vangin kan dap zui ta lo. Nachhawkna kan pai ang ang te kan eitir bawk a. 

Hliamtuar leh an hnuhma hi thlalak ṭulin kan hre lem lo a, kawngpuia motor hnu leh a breakna hnuhma lang thei tur bak thla kan laksak lo bawk.

Ka car chu a tawt em a vangin N.Vanlaiphai car chu khawlailung PHC a dah phei turin kan bia a, a inher rem lai takin Tluangtea Khawlailung Sumo a lo tlan hlauh maia, a nin a phur phei ta a. Ka naute pahnih Maduha leh Chhana chuan Damdawiin thlengin an va zui phei a. N.Vanlaiphai lam pawh kha an inhuam hle laiin an kalna tur a la thui zawk a vangin kan tlan tlang tir ta a. 

Chekawn lam an rawn thleng phei a. Tawhsual tawhna hnu hma te kan han en chian in VLi su tu motor hian side a la ṭha lo hle tih a chiang a. Pickup side glass cover leh mad gurd keh feet khat vela sei pahnih kan hmu bawka. Mualcheng leh N.Vanlaiphai lam kan phone nghala motor lo tlan a piang lo tiding a, ngaihven turin kan ngen ta nghal a. 

Tichuan, keini pawh thil tihtheih awm ang ang te tihfel thawkhat a nih takah chuan ka naute pahnih VLi buaipuitute Khawlailung PHC aṭangin an lo let ve ta bawk a, kan tlan liam ve leh ta a. 

Vairam leh Mizoram hmun dang a thil thleng kan lo hriat ṭhin, Tuichangralah ngei mai hetiang thil a thleng hi a pawi tak zeta, rilru a tinaa, ngaihtuahna a kal thui khawp mai. Hmeichhe awm nem zawk tipalha, bawihsawm leh thlamuan hlawh lo a kawngpui dunga han hnutchhiah ngawt mai hmuh chuan rilru a khawi hle mai.
Hetih lai hian Tuichangral chu tuichangral nge nge, tawhsual thlen a ṭanga rei loteah Mualcheng lam YMA leh VC ten VLi sutu Motor ni ngeia hriat chu an lo man nghal a an hnathawh hi a ropui ngei mai.

Tuichangral mipui te hian Sawrkar Rapid Force te aia che rang zawk YMA leh VC kan nei hi a ropui in a va hlu em. 

A sutu motor man dan leh thil dang chu post a awm tawh bawka sawi nawn tawh lo ila

N.Vanlaiphai lam unaute kha an hming tal pawh kan lo zawt ta lo kha a pawi tak tak a ni.

Post a Comment

0 Comments