HSA in kawng leh Tuivai lei chungchangah CM Zoramthanga kawm

Aizawl | December 8, 2020: Hmar Students' Association (HSA), Joint Headquarters, Aizawl hruaitute chuan nimin khan  Mizoram Chief Minister leh PWD changtu ni bawk Pu Zoramthanga chu a pisa-ah kawmin SHC huamchhunga kawng leh Tuivai lei bakah development project dang dang an sawipui.

HSA hruaitute chuan kum 20 chuang siam/dawh lova awm tawh Mizoram leh Tipaimuk, Manipur inkalpawhna National Highway-02 (A hmain NH-150) a Tuivai lei chu Mizoram leh Manipur inkalpawhna kawngpui pawimawh a nih thu thlenin, Mizoram tana chakkhai (khawrsaw) lâknan a tangkai tur thu leh, Manipur lama  cheng Zohnahthlak-te tan economic road pawimawh a nih zia bakah Zohnahthlak inpumkhatna tura rahbi pawimawh tak a nih thu an sawi bawk. HSa chuan, Mizo National Front (MNF) sawrkar chu "Zohnahthlak impumkhatna" tih election manifesto a neitu a nih vangin thlamuanthlak an tih thu leh lei hi dawh vat a nih theinana chak taka hma la turin CM Zoramthanga hi an ngen a ni.

Hemi bakah hian New Vervek leh Vairengte via Mauchar kawng siam tur National- Highway-306A leh SHC huam chhunga kawng hrang hrangte  chu PWD minister a nihna anga siamthat leh siam zawh vat a nih theih nan PWD minister a nihna anga chak zawka hma lakpui turin an ngen a ni.

Pu Zoramthanga chuan Tuivai lei chu a ngaih pawimawh thu hrilhin vawithum lai vel tender chhuah a nih hnuin contractor pakhatin a chhanga, mahse, a chhanna chu lei dawhna tua Minstry of Road Transport & Highways in total estimate a siam aia tam zawk a nih vangin ministry chuan clarification ti turin a rawn ti a, clarification hi thawn fel a ni tawh a, ministry in a rawn pawm (approve) chuan hna ṭan mai theih a nih  thu HSA hruaitute a hrilh.

New Vervek leh Tuivai  lei inkâr kawng (road component) -10km pawh work order tihfel tawh niiin, Nidhi Company in an siam mek thu a sawi.

Sinlung Hills area a chengte tana Hmar House sak rawtna an thlen pawh CM chuan a lo bawhzui tur thu leh, a sak mai a harsat loh tur thu bakah Mara House leh lai house anga a enkawl zuitu tur SHC an awm a, thil harsa a nih loh tur thu a sawi bawk.

with input from - Virthli.in