Home minister in ramri-a sipai inkhuarna hmun tlawh

Aizawl | December 18, 2020: Home Minister Lalchamliana chuan vawiin khan Vairengte leh Saihapui V-a duty Border Security Force leh IR battalion duty-na hmun a tlawh.


Home minister hi Pu Lalbiakthanga Khiangte, DIG (NR), Kolasib bawrhsap Dr H Lalthlangliana, Kolasib SP Vanlalfaka, M.S. Dawngliana, CO, 1st IR Bn. leh Police department a thawktu dangten an telpui.

Home Minister chuan ramri venga duty-te inpekna leh thawhrimnaah lawmthu sawiin duty-te chu Mizoram Sawrkar leh mipui ten an thlawp tlat thu a sawi a. Ramri venga Krismas leh Kumthar hun an hmang tur chu ram leh mipui tana thawk an ni tih hre reng turin a chah a, tha thlah lova tha taka an hna te kalpui zel tura fuihin duty-te hnenah hian Krismas hun hlimawm tak an hmanna turin thilpek a hlan bawk a ni.

Home minister hian Kawngthar veng, Auto stand thlang, Vairengtea BSF leh IR duty-na hmun a tlawh a, Vairengte Post, 1st IR Battalion, Saihapui V leh Phainuam a tlawh bawk. BSF leh IR te duty-na thawmthat lehzual dan turte enpuiin a tul anga hman tur silpaulin a pe bawk a ni.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post