Aizawl | december 17, 2020: Sports Minister Pu Robert Romawia Royte chuan vawiin khan Sailulak, Leng leh East Lungdar khuate tlawhin khawtlang hruaitute nen helai bial hmasawnna tur thil pawimawhte an sawi ho a ni.
Sailulakah hian khawtlang hruaitute rawt angin BADP sum hmanga Community Centre sak zawh hlim chhawng khat chu Khualbuk atan cheithat sak Tourism Department-in a tum ang a ti a. ICT Department-in IT at School scheme atanga Sailulak High School-a Computer set 7 leh Accessories an pek an hman tangkai dan a hmunah enin Mizo thawnthua Chhura Talhtum leh Chhurbura’n Mawngping tula a verh lem an siam te pawh a en a. Leng khuaa serthlum chingtute pawh kawmin an huan te a hmunah a ensak bawk a ni.
East Lungdar khuaa amah lo hmuaktute hmaah thusawiin Pu Robert Romawia chuan Covid 19 hripui avanga harsatna khirh tak karah pawh Chief Minister Pu Zoramthanga kaihhruaina hnuaiah leh a remhriatna zarah hmasawnna hna a kal reng a, Covid hripui a reh hunah chak lehzuala hmasawnna hnathawh te kalpui tum a nih thu a tarlang a. Hrangturzo Bialtu leh Home Minister ni bawk, Pu Lalchamliana kaihhruaina leh East Lungdar VC te rawtna angin Computer zirnate, Football Academy leh Boxing Academy te fin tura ruahman a nih thu leh Covid Hripui avanga khapna hlih a nih veleh bul tanna hna thawh nghal a nih tur thu a sawi.
Sports Minister hi Pu H.Dolianbuaia, Jt Secretary, LAD, A& C leh Pu C.Lalremsanga DYSO Lunglei ten an tawiawm a ni.
Post a Comment
He post chungchanga i ngaihdan lo sawi ve rawh: