Chief Minister in Innovation Facility Centre a hawng

Aizawl | December 10, 2020: Chief Minister Pu Zoramthanga chuan nimin khan MINECO-ah Mizorama tualchher thiamna nei (local innovator) te leh technical lam zirna hmuna zirlaite tana an khawl mamawh chhawpchhuahsak leh innovation lama hmasawnna tur atana tan lakna tura ruahman - Innovation Facility Centre (IFC) chu a hawng. Mizoram Science, Technology & Innovation Council (MISTIC) Project pakhat ‘Development of Indigenous Technological Development in Mizoram through Establishment of Innovation Facility Centre and Enhanced Protection of Ownership’ hnuai a mi a ni.




IFC hawnna inkhawm tawiah khuallian Chief Minister chuan thil thar zawnchhuah leh ngaihtuahchhuahna tur hmun hawn a ni chu lawmawm a tih thu a sawi a. Thufingin mamawhna chu thil thar hmuchhuahna tia a lo sawi chu vawiin thleng pawha a la dik thu sawiin, Mizoramin hma a sawn zel naah mamawh thar hrang hrang a la awm chho ngei ang a, chungah chuan kan innovator ten an ngaihtuahna seng a thil thar tha tak tak an siamchhuah zel a beisei thu leh, chung atan chuan vawiina IFC hawn tak chu pawimawh tak tura a rin thu a sawi a. Hetihrual hian heng thil siamchhuahna khawl tha leh ropui tak takte hi mihring siamchhuah tho a ni tih hre reng chungin, a pawimawh ber zawk chu kan ngaihtuahna hi a ni, tiin Chief Minister chuan ngaihtuahna senga thil siamchhuak thin local innovator te chu fakawm a ti a; a dang tha tak tak an la siamchhuah belh zel a beisei thu a sawi a. Mizorama hmun leh hmuna kan mamawh leh hman tangkai nghal theih tur ngaipawimawh hmasa turin a chah bawk.

Khualzahawm Dr. R. Lalthangliana, Higher & Technical Education Minister chuan ngaihtuahna a tak rama chantir theitute hman tangkai tura Innovation Facility Centre hawn a ni tak chu lawmawm a ti a. Heng kan mi thluak them thiamte mai bakah zirlaite tana tangkai tak ni tura a rin thu a sawi. Hr. & Tech. Minister chuan zirna tluangtlam pangngai mai bakah eizawnna kawng hrang hrang tha tak tak a awm zia a taka entir tur zirlaite tan chhawpchhuah a nih thu sawiin, hei hian ngaihtuahna thar idea dang pawh a pek zel theih a rin thu a sawi a, Commerce & Industries department beneficiary tam tak tan pawh tangkai tak thei thil nia a hriat thu a sawi.
Nimin inkhawm a Special Guest Pu Lalnunmawia Chuaungo, Chief Secretary, MISTIC chairman ni bawk chuan Mizo zingah innovator, mahni kutkawih a thil tha leh tangkai tak tak ngaituahchhuak a siamchhuaktu an awm teuh thu sawiin, hun rei tak chu sum awm loh avangin an mamawh ang khawl lian leh changkang a awm loh avanga tam tham a thil siamchhuah an theihloh thu te sawiin, tuna an tana ban phaka khawl tha tak tak an mamawh chhawpchhuah a ni ta chu lawmawm a ti a. tangkai taka hman zui a nih ngei a beisei thu a sawi.
Vawiin programme-ah hian MYC Chairman Dr. Vanlaltanpuia pawh telin, Dr. C. Vanlalramsanga, Commissioner  & Secretary,  Planning (Science & Technology) chuan hun hi a kaihruai a. Chief Scientific Officer Dr. R.K. Lallianthanga chuan IFC chungchang report pe in, Er. H. Lalsawmliana, Principal Scientific Officer chuan lawmthu sawiin hun a khar a ni.

Innovation Facility Centre hi project cost chu cheng vaibelchhe 6.67 a ni a. Innovation lama hmasawn zelna tur atanga kawng siam te, thil siam chhuaktu-ten an thil siam chhuah neitu nihna an hum theihna (patent) kawnga hma lak pui te chu IFC tum zingah a tel bawk a. He project atan hian a tirah Implementation Committee on Development of Indigenous Technological Innovation in Mizoram din a nih thu leh tunah hian IFC enkawl tur hian Management Committee mumal tak din tura hmalak mek niin, he Centre hi a theih chen chenah mahni intungnung tura ruahman a ni.
IFC building-ah hian chhawng thum awmin, a floor area zau zawng hi 740 sq. m. vel a ni a. MISTIC Work Advisory Committee kaltlangin L.B. Associates chu sa tura thlan niin February ni 8, 2018-a lungphum phum hnu in February ni 9, 2018-ah sak tan a ni a, March ni 5, 2020-ah sak zawh a ni. Tunah hian Chief Scientific Officer & Member Secretary kaihhruaina leh Senior Scientific Officer leh Scientific Officer-te enpuinain IFC-ah hian mi panga(5) Project sum atanga chhawr mek an ni.
IFC-ah hian khawl (Machine) chi hrang hrang leh Electronic equipment 21 a awm a, thir lam chi kaihhnawihahna chi hrang hrang thawk thei tur khawl pawimawh zual chu a awm kim thawkhat a. Digital/electronic hmanraw lam, thil san zawng te, boruak lum leh vawh lamte, boruak hnawn zawng te, thiltui lam chi samuk zawng te, etc. teh thei khawl chi hrang hrang a awm bawk. Heng bakah hian hnathawh laia hak tur chi Personal Protective Equipment (PPP) set 4 leh kang thelhna hmanrua (Fire extinguisher system) tha tak a awm bawk a ni.
IFC ah hian khawl chi hrang hrang 37 awm chu heng - Magnetic drilling machine, Vertical milling machine, Universal milling machine, Dial indicator digital, Dial indicator Analog, Shaper machine, EDM, Hydraulic operated surface grinding machine, Plate rolling machine, Metal inert gas welding machine, Indoor Single Girder E.O.T Crane 5 ton, Heavy duty power press c-type, CNC Lathe machine, CNC Milling Machine, Lathe Machine (Heavy duty), Band Saw (Vertical), Gas Cutting Set with Safety Equipment, Welding rectifier, Drilling Machine, Radial Drilling Machine, Bench Grinding Machine, Hand Grinder/Angle grinder, Air Compressor, Hydraulic Press, Band Saw (Horizontal), Electric Hacksaw, Tungsten Inert Gas Welding Set, Plasma Cutting Machine, Electrical Welding Set (Single Phase), Electric Welding Set (Three Phase), Plate Cutting Machine, Plate Bevelling, Press Brake, Line Cutter, Powder Coating Equipment, Pneumatic Power Hammer leh Inspection Surface Plate te a ni.
IFC-a Electronic Equipment hrang hrang awmte chu - Digital Angle Gauge, Digital Density Meter (Portable Density Meter for all Liquids), Electronic GPS Device, Digital Laser Range Finder, 3D Printer, Digital Weighing Machine (Digital Electronic Weighing Scale), Digital Force Gauges, Digital Thermometer, Digital Hygrometer, Digital Sound meter LCD Display, Digital Clamp Meter, Power analyzer (PQ 3100), Digital Altimeter, Micrometer, Digital Oscilloscope, Digital Weighing Machine (Label Printing Platform Weighing Scale), Digital Multimeter, Digital Slide Caliper (Digital Vernier Caliper), Digital Light Meter (Digital Lux Light Meter), Height Gauge (300mm) leh Height Gauge (600mm) te a ni.

- DIPR

Post a Comment

0 Comments