Airport Authority of India (AAI) in Thingdawl Nursing School tan Mizoram sawrkar-ah Bus hlan

Aizawl | December 5, 2020: Airport Authority of India (AAI) chuan vawiin khan Thingdawl Nursing School, Thingdawl a hman tur Bus pahnih Mizoram sawrkar hnenah an hlan.

AAI hian an Corporate Social Responsibility (CSR) aṭangin Mizoram Sawrkar chu Air Conditioned Bus pahnih  Thingdawl Nursing School a hman turin an pe a.

Bus inhlanna-ah hian Mizoram Chief minister Zoramthanga leh Health minister Dr R Lalthangliana bakah Mizoram sawrkar mi pawimawh dangte an tel bakah AAI atangin mi pawimawhte an tel bawk.

Thingdawl Nursing School hi 2017 khan bul tan niin, ANM zirna a ni a, kumin khan batch hmasa berte an chhuak chiah a ni.

Thingdawl Nursing School hian Parent hospital atan Kolasib district hospital an hmang a, Bus hi an mamawhna a sang hle a ni.

Hripui leng mek karah Thingdawl Nursing School chu CCC atan hman a ni bawk a ni.

 Airport Authority of India (AAI) chuan an Corporate Social Responsibility (CSR) hnuaiah Air Conditioned Bus pahnih Mizoram sawrkar pe in, Chief Minister Pu Zoramthanga hnenah an hlan a. Heng bus pahnih hi Thingdawl Nursing School a hman tura ruahman niin Chief Minister hian Health & Family Welfare Minister Dr. R. Lalthangliana hnenah a hlanchhawng leh nghal a ni.

Chief Minister chuan AAI chungah lawmthu sawiin an thilpek chu a hmangtu tur ten an tangkai an tangkaipui hle a rin thu AAI hotute chu a hrilh. Mizoram in boruak thianghlim leh hrisel malsawmna a dawng ang chiah hian a chhunga chengte pawhin hriselna tha tak an neih theih nan ruahmanna hrang hrang siam a hmalak a nih thu leh, hmalak zui zel a nih tur thu a sawi a. Chief Minister chuan airport tichangtlung turin AAI nen Mizoram sawrkar chu thawhhona tha neih chhunzawm zel pawimawh a tih thu sawiin, Mizoram chu tlangram anih avangin inkalpawhna lama hmasawnna ruhrel hrang hrang tha neih a pawimawh thu leh, kawng bakah thlawhna hmanga inkalpawhna tihhmasawn a tul thu a sawi a ni.

Health Minister Dr. R. Lalthangliana chuan AAI ten an Corporate Social Responsibility Scheme hnuaia bus pahnih lai an rawn pe chu lawmawm tiin Thingdawl Nursing School mamawh tak a nih thu a sawi a. COVID-19 hrileng laka mipui an fihlim theih nana thawk tha ber state zingah Mizoram a lan thu tarlangin Health Minister chuan Chief Minister in mipui an him theih nana a tir atanga ruahmanna siama chak taka hma a lak vang a nih thu a sawi a ni.

AAI DGM, CNS & Airport incharge Pu Aloke Gupta chuan vawiin chu AAI tan chuan ni chhinchhiah tlak tak a nih thu sawiin vantlang rawngbawl theia an awm chu lawmawm a tih thu a sawi a. Mizoram sawrkar nen hun rei tak thawhhona tha tak an la neih zui zel a beisei thu a sawi a ni.

Vawiina Bus inhlanna ah hian Additional Chief Secretary Pu JC Ramthanga, Health Secretary Pu H. Lalengmawia, Aviation Principal Consultant Pu J. Lalhmingliana, Director, Hospital & Medl. Education Dr. T.Lalhmangaihi leh AAI mi leh sa thenkhat an tel a ni.