Mittui ti tla tu - Chu Cooker phit ri chu!!

(Parawl mangang aurâwl)
- K Remruatfela
Chumi tûka zîng ni chhuak chu a êng mawi danglam bik kher mai. Kawmthlanga hnahthlel lo tla sang sangte pawh chu tûk dang ai hian a hring no nghulh bik mai ni hian a hriat a. Zîng ni chhuakin a en apiang mai chu mawi danglam bik em em vek maia a lan avangin, mitdâwivaihin ka mit a ti vâi zâwk em ni te ka inti rum rum mai.




Chumi tûk chuan In lamah engmah inhnawhpuar hman lo mah ila, chhûnah mi siam sa ei tur tuihnâi tak tak a la awm dâwn alawm tih chu rilruin a hriat kar avangin phur leh tha tho tak chuan mahni eizawnna lama mipui mangang thlabârte thlamuan tur chuan ka in ak chhuak ta hna hna a. Chumi tùk chu ka hlim bawk a niang, ka pheikhài pawh a zâng hle!
Tichuan, rei lo tê-ah ka eizawnna hmun chu ka thleng a. Pathian malsawmna zâra mite kaltlanga thawh tur tâwk tè tè ka'n neih ve ang angte chu hah leh chauh pawh sawi lovin kan han birh nghal ta tlut tlut a. Hnathawh a kal laklawh a, kan case khawihlai a kal ding laklawh phei hi chuan a hma zânah lehkha chhiarin zanrei piah lam thleng thlengte kan meng thin a ni tih hre lo lêkin kan lo insâwrbing ta thin a. Rilru leh ngaihtuahna zawng zawng nena chhun puma mi thubuai hlabuai han ngaihthlâka, a chin fel dân kawng han chhut pui char char mai hi chuan hriat loh kârah rilru leh taksa hi a lo chau rawp thei zuk nia! Mi ten mangang thlabâra _'nangmahah chauh kan innghat tak tak a ni'_ min han tih lawm lawm phei hi chuan keini ang thinlung nêm deuh phei hi chu khawngaihna leh lainatna hian min hneh thuai ta thin a. A tâwi zâwngin kan chakna leh theihna zawng zawng hmang hian kan Client te chu tanpuia, an buaina chinfel sak vat vat tur hian kan hmanhlel tak zet ta thin hi a ni ber! An hlimna chu kan hlimna ni si a.
Chutihlai erawh chuan, leilung nihphungah Ni chhuah hun leh Ni tlâk hun a awm lo thei si lova. Ni a tlâk a, kâwl a thim a, vân a ngui hi chuan mitin ten In lam an pan sang sang thin tawh avangin, tlâi a lo nih hi chuan lohtheihlovin kan hnathawhna hmun pawh khâr a ngaih phah ve ta thin a. Thenrual dangten nghâkhlel taka an nupui fanaute leh chhûng leh khâtte hmuh hlân nghâkhlel a, In lam pan tura phur leh tha tho taka an han insiam sap sap lai te hian keini anga haw hun nghahhleh chhan tur nei ve lo te hi chu ke pên a zâng mawhin a rit duh bik thin hle! Thlen hlima Tukverh leh Kawngkhar hawn a awlsam kan tih em em laiin a khâr leh lam erawh a harsain, a kawpza te pawh hi a sak ta bik riau te hian kan han hre leh hnuhnawh thin! Haw kawnga thiante chawhmeh bazar lâi mawlh te hi hmuh hrehawm kan ti! He _feelings_ hi a taka tawng ve lo te chuan in hrethiam pha kher lo ang.
Chutia khua a lo thim tawh avanga chhun hnathawhna hmun lohtheihloha khâr a nih tâkah chuan, khawlâia tei rawlai mai mai thu a awm si lova, phur vâng ni hauh lovin a lohtheihlohna vâng zâwkin mahnia riang taka kan chênna 'Parawl rûn' tlâwm tak mai chu kan han pan ta hna hna a. Phur lo fahran hian a kalhna Tala chu kan han hawng hrâm hrâm a. Kawngkhar hawn rual ruala hman khât leh hman ngai loh tih hriat ngawih ngawiha Cooker lo inkhâi bel han hmuh a, a piah lawka silfai ngai tih hriat ngawih ngawiha Thingpui In no, a chhûnga Tea bag la inchiah han hmuh thup nghal châng phei hi chuan _'ral tawh mai se lei ninawm hi'_ tih hla han sak chhuah leh nawlh maite hi a van awl thin tak em!
Chutah! Chumi chhûn leh a hma zâna kan hnathawhna zozâite chu pa hrisel tha puipuite tân pawha chauh pui tham a nih tawh tehreng nen In lam han haw ve chângte pawh hian hahchawlh leh âwl chu khawi lam, mahni pum puarna mahni vêka zawng turin choka lam kan inpan chawp a ngai ngei ngei a. A tuimi leh a thiam mi nih ve loh phei chuan eirawng han bawl zawm leh tur chuan taksa hian a tlin mawlh tawh lo thin! Chutihlai erawh chuan riltamnain mi a thunun lo thei bik si lova, châk vang ni hauh lovin,  kan chaknain a tlin tâwk a nih vang zâwkin a zângkhâi ber Thingpui leh Biscuit hmang chuan kan han inhraipuar leh ta ringawt mai thin a. Chutihlai taka thenawmte hmui hmerin a pawlh kâra Cooker phit ri han hriat meuh hi chuan tlangvala pumpa meuh pawh hi lungchhiaiin kan hnîm dup thei thin zuk nia. Chu Cooker phit ri zet chuan rilru chhungrilah thu tam tak a sawi nghal zung zung a. Chu Cooker phit ri in mahni inkhawngaihna a phit chhuah châng phei hi chuan mittui te hi a ko lek lek thei zuk nia maw le! Mittui ti tla tu, chu Cooker phit ri chuan...

Post a Comment

0 Comments