Mizoram University (MZU) Master of Science Geology Gold Medalist Melody Lalremruati kan belchiang.
CGPA 8.557 hmu a MZU hnuaia M.Sc Geology Gold Medalist 2020 ni thei Melody Lalremruati hi T Lalrinawma leh PC Lalvenpuii te fanu neihchhun niin February 20, 1997 khan a lo piang.
Melody Lalremruati te unau hi pahnih niin, amah hi a upa zawk a ni ,a nau nuta pakhat a nei a ni.
A thianten Medy tia an koh thin Melody Lalremruati hi entawn tlak leh fel tak mai a ni a. Rahsi veng, Lunglei mi niin, United Penticostal Church (NEI) kohhrana lawi an ni.
Zirna lam:
# Pawl 1 atanga pawl 10 khawiah nge i kal? eng zatna nge i nih thin, pawl 10 pass kum ?
- Pawl 1-4 hi Garden Primary school,Rahsi vengah ka kal a, pawl 5-7 hi Rahsi veng middle school-2 ah ka kal thin. Ka zir chhung hian a vantlang pawl ka ni ve thin a. High School hi 2011 ah Govt.Venglai high school atangin ka zir chhuak.
# Pawl 12 hi khawi atangin nge i pass? chuan, engah nge, a kum nen?
- Baptist Higher Secondary School, Serkawn lunglei atang 2015 ah ka pass a.1st division ah ka pass.
# Zirna sang zawk i zir leh i zirna hmun leh kum?
- Under-graduate hi Lunglei government college ah 2015-2018 ah BSC Geology ka zira.Post graduate hi Mizoram university ah 2018 khan ka zawm leha kumin 2020 hian tluangtakin ka zirzo ve thei ani.
# I lehkha zir dan?
- Class a zirtir na kan don hi ka ngai poimawh a. Eng topic pawh zir dawn ila lehkhabu pakhat aia tam ka rawnziah thin.Tin,Ka sawi hmaih miah loh tur Google ah hian kan zirlai hi ka ennasa bawk. Exam hmachhawn tur kan ni tih hria in tha zawka ka tih theih na kan zirlai a zawhna awm thei ang te theihtopin note ka in siam thin.
# harsatna i hmachhawn dan
- Harsat na hi mi nunah a mikhual lo angin ka nunah pawh hian a mikhual bik lova . ka harsat na ka neih te hui tumruh tak leh chhel takin ka theih tawpin ka bei let thin a ka thei chin bak a thlen erawh in pathian kutah ka nghat top tawh thin , theihtawp ka chhuah na ah min puih ka rin avangin.
# Gold medalist i nihna (Subject) leh CGPA?
-M.Sc Geology.Cgpa-8.557
Gold medalist ni tura i beih dan?
- Mihring mihrin na ah ka theitawp tak meuh ka chhuah , he ka zirna ah hian a ber nih tuma zir kani lova ka tana thaua ka ngaih avanga kan tan theitop chhuan ka ni. Pathian khawngaihna avanga ka theihtawp chhuah na te mal minsawm sak avang in ka lawm takzet a ni.
Gold medalist ni tura i beihnaah faculty lamin an ṭawiawm/pui ṭha chein i hria em?
-Tehreng mai. Kan zirtirtu te hi an fel em em a, teaching leh non-teaching staff zawng zawng te, mamawh leh puih ka ngaihna apiangah min pui zel thin. An chungah ka lawm takzet a ni.
I zirna atana i chhungte pawimawhna:
- Ka chhungte avang chauh a ka zirlai-ah hlawhtling thei ka ni a. An ni'n min tuipuina zara tun hun tha tak pawh hi hmu ve thei hram hram ka ni zawk. Ka zirlai te min zirpui theilo mah se, ka zirna atana ka mamawh engkim min chhawp-sak tu, Pathian tih lovah chuan ka engkima ka engkim an ni.
I zirna atana i ṭhiante pawimawhna:
- Ka thian te hian min pui nasa khawp mai, kawng tinreng ah harsat na ka neih ah min pui turin an awm reng thin. Zirlaite hi mahnia zir mai lovin thiante nena han sawiho te hian hriatfiah a awlsam bik em em a. Kan sawiho-na zarah thil tam tak ka hriat belh thin.
A ran ngainat ber zawt ila 'UI,' tiin a chhang mai lo maw?
A duhzawng ngainat zawngte:
Rawng - Adum
Chawhmeh - Chawhmeh hi han duhloh leh eitheih loh hi ka nei lemlo.Mizo chawhmeh hi ka ngaina chawkawkte, telhawng leh zawngtah te hi tui ka ti.
Incheina – Fai se, hak nuam tak nibawkse
Rimawi –Ka ngaithla kual nasa, ka hun tawn dan azir zel in.
Mizo Ziaktu zingah – “vaihna vartrian” Mafa hauhnar
Hla phuahtu – Pu Buta
Mize ngainat zawng:
-Mi nun ngil,rilru tha leh ngilnei
Mize ngai nat loh zawng:
– Hun vawng diklo, mi hmuhsit ching leh mi chapo te.
Hobby: - Zai hi nuam ka ti,ka zaithiam lemlo na in.
Relationship status -Single
Kawppui atan duhzawng - Mi taima leh rinawm.
Zawhna dang:::
1. A tel lova i awm theih loh: Pathian leh ka chhungte
2. I nun kaihruaitu: Pathian
3. Hringnuna i hlauh ber: Hringnuna ka hlauhber chu hmasawnloa,hnungtawlh zawnga kal.
4. I tih ngai miah loh tur: Midang te ti hnual thei zawnga khawsak.
5. Mizo Tualzal nuna ṭha i tih: Mizo nuna tha ka tih chu tlawmngaihna, abik takin chhiat tawh kawnga kan in tuamhlawm dan hi.
6. Quote i duh ber:
I kawng zawng zawngah amah hre reng la, I kawngte chu a kawhhmuh zel ang che.
- Thufingte 3:6
7. Mizoram leh Mizo tualzal nuna Mizo hmeichhiate dinhmun:
- Tun hma ngaihtuahin sangbi thara Hmeichhiate hi chu kan zalèn viau chuan ka hria. Social media lama kan taksa kan inpho chhuah dan te, kan thu leh hla tarlan kan duh zawng atangte hian kan zalèn thawkhat viau. Kan zak tawh lo ni berin ka hria.
8. Hnam hmingṭhat leh hmingchhiat kawngah Hmeichhiate'n mawhphurhna:
- Mipate aiin Hmeichhiate hi thil tih tak takna leh taimak kawngah hma an sawn zawkin ka hria a, sumdawnna lamah pawh ni se, zirna (academic) atanga mi ina awm thlengin khawvel kan daidar ve ta a. Kan nungchang hian Mizo hmel tihchhiat leh tih that kawngah kawngro a su hle tawh a ni. Hnam darthlalang kan nihna pawh awmin ka hria. Nun uluk leh zahawm taka kan awm chuan eng hna pawh thawk ila, chutah chuan hnam hmel kan titha thei a ni.
9. Hnam ziarang chawinun kawnga Hmeichhiate mawhphurna:
- Hnam ziarang chhawm nun kawngah chuan hnam dang pasal neih loh hram ni se, Kohhran leh sawrkar phal loh thil zawng zawng laka fihlim te, Mizo hmeichhia kan nihna anga Mizo thil hriata thiam te, leh fate zirtir eg. Buh thlei . Thawnthu leh Mizo tawng dik hrilh thei tura mahni ngei pawh inzir kuak a ngaiin ka hria.
10. Mizote tan 'Fa neih tlem' inzirtir hi a ṭulin i hria em?
– Fa neih tam inzirtir a hun zawkin ka hria. Mizoram bakah hmun hran hrana inzar pharh turin kan la tam tawk lo. Tunah pawh Chakma leh hnam dang Vai in min chim mek a ni a. Fa neih tlem tih hi sawi mawi tur kan la ni lovin ka hria.
11. Mizo hnam ṭhanmawh bawk nia i hriat?
- Mizo hnam thanmawh bawk nia ka hriat chu thawk mang lo va, neih teuh tumna rilru hi a ni. He thil hi chu hnam dang nena kan inchiahpiah hnua kan rilru puthmang lo danglam ta a ni a. Tun hma kan pi leh pute rilru ah kha chuan a awm lo. Tunah erawh kan nitin nun hi chutiang chuan min hual vel a ni. NERGS atanga kan Political party te vote zawnna thleng hian a hriat theih.
12. Mizo hnam damna atana kawng awm nia i hriatte?
- Mizo hnam dam nana pawimawh ka tih chu Chhungkaw inrelbawlna tha leh Sawrkar inrelbawlna tha hi a ni.Chhungkua chu a bul thut a ni a, first Education tia kan hriat thin a ni. Chhungkua chuan khawtlang a siam a, khawtlangin ram leh hnam a siam avangin a bul thut Chhungkua inrelbawlna tha tak hi tuna kan hnam damna tura kawng hmasa chu a ni.
A dawt lehah chuan sawrkar inrelbawlna tha hi awm se. Sawrkar inrelbawlna thaah chuan duhsak zawng hnaa lak tih lam a ni lo va, mahni pumpui ni lova ram hmasawnna tak tak khaidingin innghirnghona leh intualvuakna te hian hmun a chang lo. Chuvang chuan sawrkar inrelbawlna tha hi kan hnam damna tur a ni.
13. Hnam chhan nana Hmeichhiate ṭangkaina leh mawhphurna?
- Hnam chhan nana Hmeichhiate tangkaina leh mawhphurna nia ka hriatte chu
1) Hnama chian: Mizo kan nihna anga "Mizo ka ni" tihna rilru lang lian se. Pasal pawh zo hnahthlak val ngei ni thei se. Hnam dang pasala neih loh ni se. Fa te kan neih hunah pawh Mizo Mizona tak tak hrethiam tura zirtir. Hnam Hmangaihna rilru thanlentir thei khawpa zirtirna pek.
2) Taimakna leh Rinawmna: Kan faten min ngaihsana min entawn theih nan taimakna leh rinawmna vawn nun tlat hi hmeichhia te mawhphurhna niin ka hria.
3) Zirnaah: Hnam mualphona ah pawh hnam mawng pawp bel tha thei tura thiamna lama hnam dangte khum thei tura ke kan pen a pawimawh.
4) Mizo tawng: Tawng hi kan dam khaw chhuahna tur a ni a. A venghimtua leh tihhmasawn tumtua kan tan a pawimawh ka ti. Pu Vanneihtluanga'n "Baby, bathroom light off rawh" tihah hian "rawh" chiah kan chang tawh a lo tih angin Sap tawngte hi thiam tur chu a ni ngei mai a, kan tawng mawi tak kan neih reng laia tawng danga sawi talh tum ang chi te lakah hian lehkha thiam pui puite pawhin tih tur kan neiin ka hria.
14. Zirna, Khawtlang leh Kohhran hi?
- Kal kawptir thiam a pawimawh. Zirlai kan nih lai chuan a zawng zawng a va inhman kha kan thei lo, a bikin tihthat kan tum phei chuan. Tin, hruaitute pawhin min phut lo. Mahse, kan tih theih Mitthi lumen, thingpui lum leh sem te, mitthi lumena tlaivar te, hnathlannaa kal te hi chu kan tih tur liau liau a ni. Kohhranah pawh a zawng zawng a tel vek tum a fuh loh chang a awm. Mahse, kan ta a ni a, kan chhiat thata kan inhnemna ber leh keimahni ngei pawh kan va luanchhuahna a nih avangin kan theih ang tawk tawka inhman hi chu a tha ber.
15. Khawtlang, Kohhran leh nangmah:
- Ka inhmang tam lo khawp mai. Zirlai nih chuan tha taka zir hi kan rawngbawlna tho a ni a. Zirna hi ka dah pawimawh ber.
16. Social Media leh Nangmah: Account chu ka nei ve deuh vek. Mahse, ka khawih khat khawp mai.
17. Mizoram ṭhalai tam tak tlakchham:
- Teirei peihna hi a ni. Kan tei rei peih lo. Hnam dangte nen kan inkhaikhin lo thei lo va, Vai-ho hi an teirei peih khawp mai. Mizote chu thil hi kan ti thei dûm a, kan tirei peih tak tak lo va. Hlawhtling tak tak tur chuan mi hlawhtling te hlawhchham zat inhuam a ngai. Chumi kawngah chuan Mizo thalai-te kan chhel tawk lo!
18. Mizo ṭhalaite hian ngaihsan tur dik an ngaisangin i hria em?
- Ka hrethiam chiah lo. Entertainment khawvelah hian kan cheng nasa lutuk a, hei hi chu pawi ka ti.
19. Ngaihsan tur dik nia i hriat:
Ngaihsan tur dik tak ka tih chu Pathian tih mi a ni phawta adawtah chuan ama kalna zawnah mi hlawhtling a ni em? A nih chuan chutiang mi chu ka mi ngaihsan an ni. Mafaa khan, "Mi a inkhawm tam em? Thawhlawm a thawh tam em? Tih hi ka zawhna a ni lo. Eng nge ama line-ah khan ram leh hnam tan a contribution tih hi ka zawhna a ni" a lo tih ang deuh kha ama kalna lama mi hlawhtling kha ka mi ngaihsan tur mi chu a ni.
20. Hlawhtlinna tura pawimawh:
Hlawhtling tura pawimawh ka tihchu Taimakna, a dawt leh pawh taimakna tho.
22. Hnam dang nupui pasal neih hi:
- Hnam dang nupui pasal neih hi a pawi ka ti a, a theih hram chuan mahni hnampui ngei nupui pasal neih chu a tha tho tho. Mahse, hmeichhia ka nihna angin hnam dang pasal nei tam tak hi ka hriat thiampui thin.
A chhan chu Khasi pa emaw Gurkhali pa emaw Sap pa emaw Korean pa kha ka harsat lai berin ka kiangah a awm thin a, min pui a, min hnem a, chakna ka neih theih nana min fuihtu ber a nih chuan engah nge ka thlauh thlak phal ang. Puih ka ngaih lai leh ka duhthusam min sampuia min puitu ka mamawh laia Mizo tlangval hnahkhat an bikbo vek laia ani khan min hmangaih tlat chuan pasal atan ka thlan mai loh nak ah.
Chuvang chuan Mizo mipate pawhin tih tur an nei. An Hmeichhiate tana innghahna tlak ni turin Mipa tak ni rawh se tih hi ka ngenna a ni.
I thalaipuite tan fuihna-
-- I taima ang u. Zirlai kan ni emaw hnathawkmi kanni emaw, kan thil tih apiang ah taima takin, theihtawpin ti thin ang u. Mahni intodelh ngei ngei tum bawk ila.
EXPLOREMIZORAM.COM i hmuh dan:
- Tunlai mil zela chanchin tharlam tak tak kan hmuhna hmun leh thalaite hma kan sawn dan pholangtu tha tak a ni. Tin, chutih mai bakah kan ram la hmu ve lo tana kan ram pianhmang leh pianphung kan pholan na tha tak a ni. Thalaite leh Zoram mipuite tan rawngbawltu ropui tak in ni tih hri in hma in sawn zel theih nan ka duhsakna sang ber ka hlan a che u.
- H Zate
Founder/Editor
Explore Mizoram
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Twitter: https://twitter.com/exploremizoram
Instagram: https://www.instagram.com/explore.mizoram
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: