K Hminga zâi ka ngaithla ve a!

- K Remruatfela

Ni tin zan tin mi thubuai hla buai chi hrang hrang ngaithla a, ramri buai leh hri lengin min tuam laia kan ram economy khai chhuah dan tur ngaihtuaha patling leh taksa kuma pu te rual nen ringawta kan hmanhlelna kârah nimin chu ka zin kawng tluanin ka lo râlkhat hriat mai mai thin, K.Hminga zai ka han ngaithla/belchiang ve a, dârkâr chanve em pawh tlinglo zin kawnga K.Hminga hla chi hrang hrang ka han ngaithla chu, hriat loh kârah a hla thu zûnah min lo uai tir hman ta der mai a, zan rei leh vartian pawh sawi lovin ka ngaithla reng ta mai! Nizan zet kha zawng ka off phal tawh thlawt lo a ni ber!!




A hla thu chheh leh a music inrenkhawm te ka han bihchiang a, chumi hnuah thu tisaa a chan tirna kawnga a rilrua awm te, Zolanu ngaihnobei tak *Janis Hnamte'in* thiam tak maia a khawrhchhuah tirna Interview ka han ngaithla leh chiah phei kha chu ‘engtin nge hetianga talent nei tha, K.Hminga ang hi khuanu`n India hmarchhak kil tawpah hian a lo dah theih,' ka ti chhuak ta hial mai!’ Hmeichhiate ang lo takin mipa hian kan mipa puite hi kan fak khât khawp a, mipa meuhin a mipat pui talent a hmuh sak chuan, chu talent chu talent danglam bik a ni tih loh rual a ni lo! Nature behchhana thiam tak maia mihring induhtawna run thlâk tak a rawn puanchhuahna ‘Ka Hringnun Diary’ tih hla ka han ngaithla zet kha zawng, mitthlaah Oldies Country Singer chul thei lo, *Merle Haggard* ngei maiin ‘hnawl leh kalsan ni tawh mah ila, ka thinglunga hmangaihna dikin a fan beisiena nung ka neih hi a mit mai mai dawn lova. Ka lam a lo hawi leh hma chu chawlhsan mai ka tum lova, beidawng lovin ka nghak fan fan zel dawn a ni,’ – *‘I`ve got no reason to quit’* a lo tih vawng vawng kha ka suangtuahna hlim thlaah a lo lang thar nghal uar uar a, hmangaihna luipui an tih mai, Mississippi luipuiah chuan ka pil tan ta der mai! Aw hringnun hian, kawprem tura tuah rem a nei ang hian, kawp rem lo tura duan sa an awm a nih dawn hi, ka ti vawng vawng mai. Hringnun tak hi chu aw...


Tichuan, khua ka luh hmain ni a lo tla tan ta reng mai a, khaw dâi fêm ka han thlen meuh chuan van laizawla Chhawrthlapui pawh a lo langsar ta hle! Chutih hunah tak chuan K. Hminga hla bawk *'Zân zâi ri’* tih chu ka han ngaithla leh a,  _‘Zân thim thiang dài zân zâi ri, Van hulhiap hnuai hramtin ri, Zân zaipawl ang an zai a, zân hla mawi an rem hian; Lairil lunglen pindanah hian lunglenin min tham a, Zan thim thiang dai zân zâi ri-an Lungrun, ka ngai thin che’,_ tih châng ka han ngaithla zet kha zawng, Oldies Country Singer aw pek thiam em em, *Roy Orbison`an*, khua hmun loh di neih chu tuipui vaukama khawhar taka mal tlat ang a ni. Tuifinriat tui vawn phûl hlup hlup ka hmuh a, van dumpawl thiang raih kâra arsi pe un mai ka han hmuh te hian duhtak ka van ngai thin che em! - _'California blue, dreaming all alone, nothing else to do, California Blue. Everyday I pray, I`ll be on my way, saving love for you, California Blue’,_ tiha lairil fan raih khawpa a lo inkhawrhchhuahna hla thu mawi tak kha ka hrechhuak vawng vawng mai. Keipaw'n, khua a tlai a, van a ngui a, kâwl a thim a, ni a liam a, zân a lo thlen a, van a thian hian, Lungrun, ka ngai em em thin che asin!


Chutia suangtuahna lipuia ka pil lai chuan hriatloh kârah ka chenna In tlâwm tak, ka parawl rûn chu ka lo thleng ta reng mai a. Nimahsela, K.Hminga hla zûnzâm mawlh chuan ka taksa pum min man beh tlat tawh avangin tâl chhuak turin chakna reng ka nei ta lova.  Khawiah nge ka In chu a awm a, khawiah nge ka chhuk dawn, tih pawh ka ngaihtuah thei tawh lo!  Chabi chu herh nungin K.Hminga hla thulkhung *‘Si-ar Lalnu’* tih chu ka play leh ta ringawt a, khawi lam ka zawh dawn tih pawh ngaihtuah chang lovin ka hma zâwn kawng awm ang angah chuan ka tlân thla leh ta tawp a. Amah K.Hminga`n a duhthusam lanu hnena _‘Aw ka lungdumtu, kei ka tan Si-ar lalnu; I lênna van thlirin, zaiin i hming ka awi e. Engti zâi zia nge ni, ka pheichhehah thang i kam em ni? Nge i mit mengah Zawllaidi a zâm zâwk?’_ a han tih vawng a, a chhunzawm nana, _‘I lung ka dum nan hian Van angel aw mawi leh Serafim-te rimawi pawh phût la, thihna thlan thim pelin ka han dil ang. Aw ka lungdumtu hnarna ànka min hlan suh, I tân ka tlin loh paw`n, buklung bumin min buk tling la: I zûnzâma châm luat vang em ni, I zûnah kei vala ka zâm tâk?’_ tih châng ka han ngaithla thleng zet kha chu kei Vala meuh pawh hi ka tliak hnâwp hi a ni ber mai! Tlân leh zel turin pawhin chakna reng ka nei ta lo!


Sap hla phuah thiam leh zaithiam *Bob Dylan`an*, a hmangaih tak, a enchim loh, a duhtak hnena, _'Van ruah sur ten i sakhmel mawina te hliah tuma an rawn nuai châng che chuan chu ruah sur chuan a nan tawp lo ang che; Kei, i kiangah ka ding reng dawn si a. Zân si-ar êng ten i lung an tilenga an velh tah dawn che leh tumah i mittui hruk hul sak tu i neih dawn loh chuan i kiangah ka lo hnai ang a; kumkhuaa thlah leh ngai tawh lo turin ka lo kuah tlat ang che. Ka hmangaihzia che i hriat theih nan._ *(To make you feel my love)* ti-a hmangaihna thu thlum tak a lo fah mawlh mawlh thute kha thinlung leh ngaihtuahna zawng zawnga suangtuah pah neuh neuh chung chuan chu zân khawhar tak chu riang leh tlâwm takin ka suar tluan ta zak a.


Instagram lamah lo follow ve ta che:

Post a Comment

0 Comments