COVID-19 Vaccine chungchangah State steering committee on covid19 vaccination thukhawm

Aizawl | November 15, 2020: Nimin piah November 13 khan Chief Secretary’s  Conference Hall-ah State Steering Committee on Covid-19 Vaccination meeting pawimawh tâk neih a ni.

Meeting hi Chief Secretary Pu Lalnunmawia Chuaungo IAS in a kaihruai a. Sawihawnna neiin Covid Vaccine lam hawi meeting neih theih a ni chu lawmawm a tih thu a sawi a, a hma lama meeting neih a ni thei hi a lawmawm zual a ni tiin state dang zawng aia hma la ṭha nih tum turin Health Deptt. leh member kalkhawmte a chah a ni.

Health Secretary Pu H.Lalengmawia IAS pawhin a hma lama hmalakna awm chu lawmawm a tih thu sawiin, khawvel ram hrang hrang ten vaccine siam chhuah lamah trial an neih mêk thu leh 2021 chawhma lamah chuan India ram pawhin vaccine kan neih ve tawh a beisei awm thu a sawi a.

National Expert Group on Vaccine Administration for Covid-19 (NEGVAC) in State Steering Commitee on Covid-19 Vaccination te chu Covid-19 Vaccine Introduction atan hma la tur leh state chhunga hmalaknate vil zui turin a ruat a. A khat tawka meeting nei turin a beisei a ni. State Task Force Committee din a, chumi hnuaiah District tinah DC chairman-na hnuaia District Task Force Committee on Covid19 Vaccination din leh tur a ni ang.

NEGVAC-in a ruahman danah chuan Phase Manner-in Health Institution  hnuaia thawktu, Private leh Govt. Database a khawn khawm mêk a. MoH&FW chuan Covid Vaccine pek hmasak tur ruahmanna hi a la siam chho zel dâwn a ni.

Mizoram sawrkar hnuaia dept hrang hrangte he committee-ah hian telin, Deptt. zawng zawngte tanrualna a pawimawh thu Chairman chuan a sawi lang bawk.

Tin, Dr.Eric Zomawia, Mission Director NHM, chuan “Brief overview of covid19 Vaccination and guidelines for creation of HCW database for covid19 Vaccination” tih thupui hmangin powerpoint presentation kimchang takin a pe a.

Hetianga ruahmanna a kal mek lai hian govt of India chuan Vaccine Company leh a siamchhuaktu ram leh brand hming hman tur hi ala puang lo a ni tih Health dept lam aiawh ten an sawi.

Covid19 vaccine a awm huna lo dah ṭhatna tur hmun (cold chain point) leh a sem chhuah dan (logistic and transportation) te uluk leh ngun thluk taka sawi hona neih a ni a. Hrivenna lam (Immunisation) kaih hnawih hrang hrang te leh harsatna awm mekte bakah hmalak chhoh zel dan turte kimchang taka sawi ho a ni bawk.

Meeting hi dept hrang hrang head te bakah  Development agency WHO, UNICEF, leh UNDP aiawh ten an telpui bawk a ni.