Aizawl | November 9 2020: Mi panga a thah avanga Court-in thiam loh a chantir tawh Laltlanchhuaha hremna tùr chu vawiin khân Addl. District & Sessions Court-ah ngaihtuah a ni a, Dam chhung lungin tang tura hrem a ni.
Thubuai ngaihtuahna November 5 a neih tawh ah khan sorkar ukil leh thi chhungte ukil te'n thi tùra hrem (death penalty) an phût a, Laltlanchhuaha ukil te'n dam chhûng tâng tura hrem tùrin an ngên thung.
Thiam loh chang tawh Laltlanchhuaha chuan a thil tih chu a inchhir thu leh pawi a tih thu a sawi a, thi tùra hrem lo turin Court a lo ngen tawh bawk.
Judge Dr HTC Lalrinchhana chuan vawiin November 9, 2020 (11:00 am) khan hremna hi a puang a, Dam chhung lungin tan bakah pawisa chawi turin a hrem a ni.
Vawina hremna puan tur hian ngaihven a hlawh hle a, a chhan chu thi tura hrem a nih chuan Mizoram in state a neih hnua thi tura hrem hmasak ber tur a nih vang a ni.
Pu Laltlanchhuaha chu hrem dan tur court in a tichhuah ah chuan;
1. Tualthah tuma mi ina luh thubuai section 449 IPC ah hrehawm taka kum sawm (10) lungin tan leh cheng nuai hnih (₹ 2 lakh) chawi, pawisa chawi tur a neih loh chuan kum hnih dang jail-a tan.
2. Tualthah tumna thubuai section 307 IPC ah hrehawm taka kum sawm (10) lungin tan leh cheng nuai hnih (₹ 2 lakh) chawi, pawisa chawi tur a neih loh chuan kum hnih dang jail-a tan.
Note: Heta hremna hi kalkawp lovin a hrangin (Consecutive) in a kal ang a, kum 20 hrehawm takin Jail a tang anga, pawisa chawitur a neih loh chuan kum li (4) dang a tan belh ang.
3. A chunga thubuai pahniha kum 24 chhung hrehawm taka lungin a a tan tlak hnuah chauh mi panga (5) lai a thah thubuai section 302 IPC ah damchhung Jail-a tan leh pawisa cheng nuai hnih (₹ 2 lakh) theuh a vaiin cheng nuai sawm (₹ 10 lakh) a chawi bawk anga, pawisa chawi tur hi a neih loh chuan kum sawm (10) dang lungin a tan belh ang.
A KALTLANG TUR HREMNA CHU HETIANG HI A LO NI ANG:
1. Kum 20 chhung hrehawm takin lungin a tang phawt anga, pawisa chawitur (Cheng nuai 4) a neih loh chuan kum 24 zawk hrehawm takin Lungin a tang phawt ang.
2. Chumi kum 24 a tan zawh hnuah chuan damchhung atana a Lungin tan hun tur a intan chauh anga, pawisa chawi tur a neih Loh chuan damchhung Lungin tan bakah kum 10 (Sawm) dang (Pawisa chawi aiah) a tan belh bawk ang.
3. Tichuan, kum 34 chhung (Cheng nuai 14 chawi tur a neih loh chuan kum 34 a lo ni ang) Lung in a tan bakah damchhung Lungin tang tura tih a ni a, A thubuai Court a kalpui leh ngaihtuah a nih chhung a lungin a lo tan tawh te erawh chu a tan hunchhung turah hian chhut tel tur (Paih tur) a ni ang.
Notes:
1. Damchhung lungin tan tih hi Supreme Court thutlukna tartan ang hian taksa damchhung tak tak lungin tan tur a ni a, amaherawhchu sawrkara thuneitu ten a tan hun chhung tur hi an ti tawi thei thung.
2. Pawisa chawi tur a pek theih loh thu-a tan belh hun chhung bituk hi Supreme Court thutlukna tarlan ang bawk hian hremna dang nen a kalkawp (Concurrent) thei lo a, a hrang a hraiin a tan belh (Consecutive) ngei a tul dawn a ni. Chuvangin pawisa chawi tur hi a pek theih loh chuan kum 14 hi a tan belh ngei ngei a ngai tihna a ni.
3. Mizoram Victims of Crime Compensation Scheme, 2011 angin Court thutlukna (Judgment & Order) Dt. 3/11/2020 a slam ah khan he thil thleng avanga mitthi te rokhawmtu mi panga te hian zangnadawmna a Clem berah cheng nuai hnih (₹ 2 lakh) theuh tal dawng turin District Legal Services Authority, Aizawl chu a dan kalphung anga hma la tura thupek a ni bawk.
Post a Comment
He post chungchanga i ngaihdan lo sawi ve rawh: