NAWHCHIZUAR VANNEI

(Ka pa thihcham thla kua-na pualin)
- Remmuana Chawngthu.

Khawvela mi chak leh thiltithei ber berte pawhin an dan khawmuan theih leh an chelh din rual loh 'HUN' chu a inher zel a, lungngaih leh hlim ni chi hrang hrang a herpui zel a, kum 2020 pawh a tawp lam kan thleng chu a ni ta reng mai. Kum tir aṭanga khawvel rûntu hripui (Covid 19) chuan kianzai a la rel thei meuh lo thung a. Hun a inher zel a, boruak lum leh uap churh te, ruah tla leh chhum zing phui mup hunte kal pelin, favang khawthiang tak chuan thlasik rim a rawn lentir leh tan ta chu a nih hi.
Lalsangzuali Sailo hla 'Vau thla' te, Selṭhuama hla 'Fur khawthiang' te chu hla nalh tak nimahse, a hunin a zir tawh rih lo a, chumi hun chu kan kal pel a. Tunah chuan Zikpuii pa "Sikni eng" te, Vankhama "Tlaizawng par" ten par an rawn chhuah a hun ve ta. Nakin lawkah kan rimawi kungpui Rokunga hla ropui tak takte chuan kan ram dung leh vang a luah hneh leh hle turah i ngai leh phawt teh ang.
Mizoram leh Assam inkara ramri buaina lian tak chhuak leh America ram president thlanna lo awm tur boruak lian tak karah Covid 19 hrilengin min tuam na tulh tulh mai a. Kan khawpui ber Aizawlah vantlang hmunah bu a khuar nasat thu kan sawi zo chiah a, tunah chuan district khawpui hrang hrangah pawh a ṭai darh zui dawn niin a lang tlat ta mai. He hripui nen hian khawsak kan rel thiam a la ngai dawn chauh niin a lang ta.
Harsatna tam takin min hual vel mahse, Lalpan min awmpui zel a, lawmna leh hlimna nasa tak min lo thlen leh ṭhin a, a va han lawmawm em! Vawiin, ka pa thihcham thla kua-na a lo thleng leh ta a; chumi pual chuan ka rilrua Pathian thu lo lang hi ka han tarchhuak leh ang e, min lo chhiarsak leh ṭheuh ula, ka lawm hle ang.
Bible-ah hian mi vannei tam tak kan hmu nual a, an phu loha khawngaihna avanga malsawmna dawngte chanchin hi chhiar a nuamin, rilru a khawih bik ṭhin a ni. Tun ṭumah chuan Bible-a nawhchizuar vannei deuh deuh nia lang mi pathumte chanchin hi i han tarlang lawk teh ang.
1. RAHABI: 
Rahabi hi Josuan Jeriko leh Kanaan ram enthla tûra a tirhte lo humtu kha a ni a. Amah hi nawhchizuar a nih avângin mikhual a neih thu pawh Jeriko lalin a hre awl hle a ni. Rahabin enthlatute a hum dân hi rinna leh inpêkna thûk tak tel lo chuan tih chi a ni lo.
 Israel-te Pathian chauh chu Pathian dik, engkimtitheitu nia a rin avângin ama nun atâna hlauhawm tûr pawh nise, enthlatute lo hum chu a duh tlat a. A rin ang ngeiin amah leh a chhûngte nun chu humhimin a awm ta a ni.
Nawhchizuar mah ni se, hetiang taka thil ropui a tih avâng hian Rahabi hi Isua thlahtute zîngah a tel ve tlat a. Bible zirchiangtute sawi dan chuan, Israel-te zînga an chên hnuah enthlatu zînga pakhat zâwk Salmona nên an innei a, Boaza an hring a. Boazan Ruthi lakah Obida a hring a, Obidan Jesaia a hring a, Jesaian Davida a hring a. Davida thlah ațangin Lal Isua a lo piang ta a ni. 
Hebrai bung 11-ah rinnaa fak hlawh, miropui tak tak chanchin kan chhiar chuan Rahabi hming hi a lang ve hial a ni. Mi duk dak lo tak nia kan hriatte pawh hi Pathianin hmanruaah a hmang duh tho zêl nia!
2. JEPHTHA NU: Israela thlahten Lalpa mithmuhin thil an tisual a, Lalpan a hawisan a, a rawng an bawl tak loh thu kan hmu a ni. Lalpa chu a thinrim em avangin Philistia-hote leh Amona thlahte hnenah a hralh a, Israel fate an mangang zui hle a nih kha. An harsatna leh hrehawmna ruam thuk tak ata khaichhuak a, an hmelmate hneh thei tur mipakhat a lo lang a, a hming chu JEPHTHA a ni. Amona thlahte bei turin a lo thawk chhuak a, Pathian remruatna hnuaiah hnehna ropui tak an chang a nih kha.
Jephtha chanchin sawi apianga ngaihtuahna tithui em emtu chu; Lalpa tana michak huaisen a nih thu ai mahin nawhchizuar fapa a nih thu (Roreltute 11:1) lai tak hi a ni. Mi ropui leh fel zawk, mi hausa leh thiamna sang zawk leh mi zahawm zawk fate an tam awm vei nen, nawhchizuar fapa kher kher, A ram tana beitu atan a thlang hi LALPA  ropui lanchian zualna a va ni em! Jephtha nu hi eng ang-mi nge ni? tih leh a chanchin thui tak sawi tur ka hre lem lo a;Mahse, eng anga nawhchizuar tenawm pawh ni rawh se, a fapa chu Lalpa michak huaisen a ni miau a, chutiang fapa neitu nih hrim hrim pawh chu vanneihna tawp a ni chiang e, a nu tan chuan lawmna a va sang duh dawn tak em ve aw!.
3. GOMERI:
Gomeri hi Lalpa zawlnei ropui Hosea nupui a ni. Isreal lal Jeroboama lal laia mi a nih thu kan hmu a. Lalpan nawhchizuar nupuia nei tur leh a laka fa hring turin a ti tlat a; Lalpa thu angin nawhchizuar pakhat Gomeri (Diplaima fanu) chu nupuiah a nei ta a ni.
    
Bible zirchiang thui zawkte sawi dan chuan, Hosea nupui hi a uire a, a pasal huang chhung a chhuahsan a, chumi hnuah a pasal hmangaihna ngah tak chuan tlawm leh zah pawh dawn lovin a va zawng chhuak leh ngat a ni.
Vawi tam tak phatsan a, uiresan leh khawvel nun chensan hnu pawha, hmangaihna tawp nei lo leh zahngaihna sang tak nena min zawng chhuak a, a huang chhunga min senglut leh ṭhintu, Kan Pathian ropui bera hming chu fakin awm rawh se.
Abrahama te, Jakoba te, Davida te, Samsona leh Petera te leh midangte chanchin ngaihnawm tak kan chhiar chuan kan hmu ang, mi bawlhhlawh leh tenawm takte hnena a inpuanna leh zahngaihna a lanchhuahtir dan ropuizia hi chhui zawh sen loh, sawi ninawm loh, fak zawh sen rual loha ropui leh hlu a va ni em!

Post a Comment

0 Comments