Aizawl | October 17, 2020: Vawiin October 17, 2020 (Inrinni) Chawhma dar 11:30 khan MZP General Headquarters hruaitute chuan Chief Minister Pu Zoramthanga a Pisa-ah an kawm a. He hunah hian Mizoram - Assam boundary chungchang te, Thinghlun rama IR Post dah ngheh chungchang te, New Kawnpui khuaa IR Post-ah sipai dah belh chungchang te, leh DIG Western Range siam chungchang te sawiho a ni.
MZP chuan tun hnaia Assam miten nasa takin hmun hrang hrangah kan ram chhungah min rawn nek chu hriatthiam har a ti a, a tul ang zela chhanlet tul a ti a. Mizoram - Assam boundary chinfel thuai a tul thu Chief Minister hnenah hian thlen a ni a. Chief Minister chuan sorkarin a tul angin hma a la zel dawn a ni a ti.
MZP chuan thil duhawm lo thlenna hmun Thinghlun rama duty police-te inpekna chu lawmawm a ti a. chutih rual chuan vaihmite leh thosi kara rammute awmna hmun hi thuam that a ngaih thu leh dah ngheh an nih theih nana hmalak a tul thu Chief Minister hnenah hian an thlen a. Chief Minister chuan a tul anga bawhzui a nih tur thu a lo sawi a ni.
Tin, Tripura Zampui tlangdunga Mizoten an thlamuanpui em em New Kawnpui khuaa IR Post awm chu thawktu an indaih tawk loh avangin sipai dah belh a tul thu MZP hruaitute chuan Chief Minister hnenah an thlen a. Chief Minister chuan enzui a tum thu a lo hrilh.
MZP chuan Mamit District hi Assam leh Tripura Border nei ramri buai pawh a awm rengna a ni a. Harsatna pawh a thleng ve fo thin a. Venghimtu Police Establishment tih lena tih changtlun a tul a ti a. Mamit district chhungah Armed Force battallion hrang hrang te an in awmpawlh nuai a, command tu fel tak pakhat hnuaia an awm loh chuan Law & Order kenkawh kawngah te, discipline chungchangah te a buaithlak hle thin a. Dan leh thupek kenkawh chungchang leh a bik takin ramri humhalh chungchangah hmun leh hmuna enkawltu DIG Range an mahni hokhawmtu awm loh vang hian harsatna pawh a thlen thin avangin DIG Western Range hi Temporary pawhin hmanhmawh taka siam turin Chief Minister ah ngenna thlen a ni a. Chief Minister chuan MZP ngenna angin hmalak a tum thu a sawi a ni.
Vawiin vek chhawhnu 2:00 khan MZP Elected OB te chuan Saihapui V a thilthleng chungchangah thutkhawm hmanhmawh neih a ni a. Assam miten tharum hmanga Saihapui V IR duty post an thiat chu MZP chuan pawi a ti hle a. He thil thleng ngaihven hian MZP General Headquarters hruaitute chu Pu B. Vanlaltana, President hoin an thawkchhuak nghal a. He thil thleng chungchangah hian chak taka hmala turin MZP chuan sorkar a phut a ni.
Post a Comment
He post chungchanga i ngaihdan lo sawi ve rawh: