MZP-in ram chhan hnatlang ko; Thalai thawhchhuah tum an tam?

Aizawl | October 12, 2020: Mizo Zirlai Pawl (MZP) chuan Thinghlun khuaa Assam miin an tihchhiat tungding tur leh ramri humhim turin naktip October 14 hian ram chhan hnatlang a ko niin exploremizoram.com chuan thu a dawng.

 

MZP general secretary Lalnunmawia Pautu chuan nimin khan hnatlang tura sawmna hi tichhuakin, "MZP chuan Ni 14 October, 2020 hian Thinghlun khuaah Thlam tha tak tundin leh a tum a. Ram leh hnam tan i rawn pen chhuak ngam dawn em le? Mipa chauh ni lo Mizo nula te pawh in tih theih kan nei e." tiin sawmna a siam a, "Ram tan i rawn pen chhuak ve ngam a nih chuan, 12 October,2020(Thawhtanni) chhun dar 12:00 hmain i hming rawn pe lut turin kan ngen a che." tiin hming pe turin a sawm a ni.

MZP chuan, "Assam vai hoin min kap a.! Kan thlam leh thlai (sumchang thei) thlengin min tih chhiat sak a.! Ram leh hnam chhan tur hian keini Mizo Zirlai Pawl (MZP) lo chu pen chhuah tum an awm si lo." tih leh "I ram, i hnamin a ko che," tiin hnatlang hi an ko ta a ni.

 

MZP chuan, "Hei lo ram kan nei lo. I ram i hnam a boral anih chuan nangpawh zuahin i awm lo ang." an ti a ni.


He hnatlangah hian Mizo thalai tam tak thawhchhuah an tum niin, Exploremizoram.com in thu a dawng a. Boruak engtin nge a awm zel dawn hriat a la ni lo.

Exploremizoram.com a kan lo ziah tawh angin, October 9 tlailam khan  Assam Police leh Forest mi leh sa nia hriat ten Thinghlun khua-a Pu John Zolawma Thlam hal halin a thlai bakah Pu Ben David-a Kuhva huan an tihchhiatsak a. MGNREGS hnathawhna lungphun te pawh an tichhia a ni. Hemi chungchangah hian October 10 khan Mamit bawrhsap Dr Lalrozama, IAS leh Mamit SP bakah District Officials dangte leh MZP hruaitute chu a hmunah kalin an enfiah tawh a ni.

 

Hemi tum hian Assam Forest hotute'n Mizoram chhunga Signboard an tar chu lathlain Kanhmun Police Station-ah seizure turin lak a ni a. Kanhmun OC hnenah FIR thehluh nghal niin Thlam an halna bulah hian 4th IR Platoon khat-te duty-na tur hnatlangin Puan In sak a nia, an duty nghal a ni.

Post a Comment

He post chungchanga i ngaihdan lo sawi ve rawh:

Previous Post Next Post