SUCCESS STORY: Thalaite Idol Wheelchair atanga MZU Gold Medalist Joan Laldinpuii

Wheelchair atanga Mizoram University (MZU) M.Sc (Maths) gold medalist ni thei Joan Laldinpuii thawhrimna, chhelhna leh taimaknate hi i hriat loh kan duh love! 

Wheelchair atanga B.Sc (Maths) topper leh M.sc (maths) gold medist ni thei Joan Laldinpuii a chhungte chuan an duat a ni tih hai rual lovin 'Duati' tiin an ko thin a.  March 24,  1998 khan Lalhmangaiha leh PC  Lalhnehthangi te fa hmingkoh ni turin a lo piang a, unau pahnih niin nau, nuta pakhat a nei.

Joan te hi Salem Veng , Lunglei-a cheng leh khawsa niin, tunah hian a zirna vangin Tanhril-ah an cheng a ni. Kohrana-ah Baptist Church of Mizoram-ah an lawi.


Zirna lam inzawt ila, Pawl 10 chin i zirna, a hmun leh kum?
- Pawl 1 atang Pawl 10  hi Southern Flower School, D&D English Medium School leh Government High School, Chanmari , Lunglei-ah te ka zir a. Pathian Khawngaihna zarah Pakhatna  ka ni chho char char thin. Pawl 10 hi Kum 2013 khan GHSL atangin Ist- Division ah ka pass ve a. Science leh Mizo ah Letter ka hmu ve.

Pawl 12 hi khawi atangin nge I pass?  Khawi atangin nge I pass?  Chuan , engah nge, a kum nen?
- Pawl 12 hi  Government Higher Secondary School  (GHSS) Lunglei atangin  Ist-Division  ah ka Pass a, Kum 2015 khan ka chhuak.

Zirna sang zawk i zirna hmun leh kumte?
- 12 Science ka pass hnuah, Kum 2016 khan B.Sc (Mathematics) hi Lunglei Government College ah  ka zir chhunzawm a.  Pathian khawngaihna zarah B.Sc Mathematics ah Pakhatna ka ni ve hlauh a. Chumi hnuah Pathian –in, ka zir chhunzawm min phal sak a,  Minister te, MLA te, leh School Education director te zarah arrangement fel tak Ka Nu leh Pa te tan min buatsaih saka, Kum 2018 khan Mizoram University  ah M.Sc (Mathematics) Ka zir ve leh ta a ni.

I lehkhazir dan?
Pathian khawngaihna zarah, thil dang tih theih vak ka neih loh avang hian  ka hriselna a that hi chuan darkar 15 hi ka zir deuh tlangpui. 
 


Harsatna I hmachhawn dan?
- Kawng hrang hrangin Harsatna  hi tam tak ka hmachhawn ve a. Mahse, min vaw hniam tur leh min ti hnual turin, ka inhneh tir duh ngai lo a. A eng zawng in thil thlir hram hram ka tum thin. Harsatna hneh thei tur hian ka Nu leh Pa-te hian min fuih nasa thin em em a. Hneh thei tura Chakna min petu an ni fo thin.

B.Sc (Maths)  leh M.Sc (Maths) ah Gold Medalist ni tura I beih dan?
- Gold Medalist ka nih theihna bulpui ber chu,  PATHIAN  khawngaihna vang chauh hi a ni.  Keimah ka han in en a, Ka taksa chak loh zia atang hian bei thei zia zang ka ni lo. Mahse, Ka tawngtaia Pathian hi chakna ka dil fo thin. Tawngtaipuitu ka nei nasa em em bawk-a, Hei ringawt pawh hi Pathian  Malsawmna a ni. Tawngtaina nen ka theihpa tawpin ka beih ve na hi, Pathian in min hriatpui a ni ber in ka ngai.

B.Sc (Maths)  leh M.Sc (Maths) ah Gold Medalist ni tura i beihnaah faculty lamin an tawiawm / pui tha chein I hria em?
Kan Faculty te hian an theihtawp min chhuah pui a, an inpekna vang liau liau-in he dinhmun hi ka chang thei niin ka hria. An zavai chungah thinlung takin ka lawm hle bawk a ni.

I zirnaah i chhungte leh i thiante pawimawhna:
- Min hriat theuh angin Wheelchair ka hman avangin puihbawm ka ngai nasa em em a, Mi tha tak tak te zarah puihna pawh ka dawng nasa em em a, ka lawm em em a ni. A bul berah chuan Pathianin nu leh pa tha tak, Chhungkua tha tak min pe a, thian tha takte thenrual te leh min duhsaktute nen, tin, classroom pan te hi a buaithlak em em a, step te a lo ni a, min zawn hreh lovin ka thiante ho pawn min zawn reng a, ka harsatna tinreng-ah min pui nasa a, ka tan an inhuam em em a, ka lawm em em a ni.


Joseph Lalhimpuia Mizoram Youth Commission (MYC) chairman a nih lai khan MYC  Young Achievers  Award hlan i lo ni tawh a. MYC YA Award in i nuna nghawng a neih dan?
- MYC Young  Achievers Award ka dawn khan nasa takin ka nun-ah  nghawng a nei a. Tun dinhmun,  M.Sc Mathematics Gold Medalist ka nih theihnana nasa taka min motivate tu a ni a. Programme buatsaihtu zawng zawngte chungah pawh lawmthu ka sawi nghal bawk e.


MYC Young Achievers Award  kha kalpui zel chi niin I hria em?
- Kalpui zel se ka ti hle mai. Nasa takin Mizo thalaite ah hmasawnna  a thlenin ka hria. Mi tam tak fuihna pawimawh tak leh din chhuahnan-a pawimawh tak niin ka hria.


Joseph Lalhimpuia leh nang?
- Pawl 12 ka zirlai khan kan sikul GHSS hi step niin Wheelchair luh theih loh a ni a. NI khat chu Pu Mahima (Joseph Lalhimpuia) hian sikul a lo tlawh a, (Parliamentary secretary, Education a nihlai) a vawikhat min hmuhna-ah Pathianin a rilru-ah hna a thawk a, Ramp ka mamawh zia hriain a theih ang anga hma lain min siamsak ta nghal a ni.
Pawl 12 ka pass hnu leh college ka kal thleng pawhin min lo ngaihtuah chhunzawm zel a, hei hian Pathianin min ngaihtuahtu min pek nasat zia min hriattirin ka zirnaah pawh a aia nasa a tan lakna kawngah min pui nasa em em a ni.

 
Joan-i pual ramp hawn ni

Tin, Master ka kal theih nan kawng hrang hranga mi  puitute zinga mi a ni a, ka result a chhuah pawhin min la ngaihven chhunzawm zelin lawmpuina thu phone kaltlangin min lo hlan bawk a, ka lawm em em a ni.


Joan laldinpuii chungchanga MYC chiarman hlui leh Ex MLA Joseph Lalhimpuia tawngkam i lo thlir ang,
"Kum 2014 khan Govt HSS, Lungleiah kan intawng a, chuta tang chuan kan inzawm nghal, BSc Mathematics (MZU) ah topper ani a, MYC in #youngachiever atan an thlang. Tichuan hei MSc Mathematics topper alo ni leh ta... semester zawng zawngah sangber zelin 92% hial a hmu phak, pui tak ani. Hetiang mi tumruh hi #ThalaiteIdol dik tak ani, a tumruhna leh thawhrimna te, a nu leh pa tanpuina hi a ropui ania aw. (Kan inbia a, ka result ka hriat khan ka rilruah ilo lang hmasa ber ati ngei.. nuam ve sin..😊👍)  Ka naute Pathian zarah Phd (Doctorate) ni ngei ang che.. 🙏💪👍"

#Outstanding_achievement Kum 2014 khan Govt HSS, Lungleiah kan intawng a, chuta tang chuan kan inzawm nghal, BSc...

Posted by Joseph Lalhimpuia on Tuesday, 6 October 2020



Duhzawng leh Ngainat zawngte:     
Rawng   -   A sen dang (Pink)
Chawhmeh -   Duh loh ka nei vak lo, ka ngaina vek mai.
Incheina  -        Inenkawl fel thei tan chuan   puan bih hi mawi ka ti a. Keimah ah chuan, ka  in enkawl fel theih nan hian Kekawr tlawn, ka ha tam ber.
Rimawi –    Hla hi ka ngaithla kual nual. 
Mizo Ziaktu Zingah –   Mafaa Hauhnar
Hla-      Lal Isua kan thiantha berin (KHB-133)
Hla Phuahtu-  Joseph M.Scriven
Teacher-   Ka Nu leh Pa
Leader-      Mahatma Gandhi

Mize ngainat zawng: Midangte hriatthiamna leh dawhtheihna nei mi te

Mize ngainat loh zawng:   Midangte ngaihsakna nei lo leh mi ti phawr phawr ang chi te

Hobby:   Story chhiar (Web Comics)

Relationship Status:    Single

Zawhna dang:::
A tellova I awm theih loh: Pathian leh ka chhungte.

I nun kaih hruai tu: Pathian thu leh Nu leh Pa fuihna

Hringnuna I hlauh ber: Beidawnna

I tih ngai miah loh tur: Ruihhlo a inhnamhnawih 

 
Mizo Tual zal nuna tha I tih: Tlawmngaihna leh kan inngaihsak tawnna.

Quote I duh ber:
‘Optimism is the faith that leads to achievement. Nothing can be done without hope and confidence’ 
– Helen Keller


Mizoram  leh Mizo tualzal nuna Mizo hmeichhiate dinhmun:
- Mizo hmeichhiate dinhmun hi tunhma dinhmun nena khaikhin chuan a tha tawh hle in ka hria. Tun dinhmunah phei chuan chhungkaw tam takah hian eizawngtu zawk dinhmun an chelh tawh a, chuvangin dinhmun pawimawh tak an chelh a ni.

Hnam hmingthat leh hmingchhiat kawngah hmeichhia te mawhphurhna:
- Hemi kawngah hian hmeichhiate hian mawhphurhna sang tak kan nei a ni. Hnamdang zinga khawsakna na ah  kan nun kan uluk fo a pawimawh a ni.

Hnam ziarang chawinun  kawnga Hmeichhiate mawhphurhna:
- Hemi ah pawh hian hmeichhiate hian mawhphurhna sang tak kan nei a ni.  Tun hun chho a Office ah leh zirna inah te puan bih hun an siam hi a tha ka ti a hnam ziarang chawinunna tha tak a ni.

 

Mizote tan ‘Fa neih tlem’ inzirtir hi tulin I hria em?
- Tul ka ti lo, hnam humhalh nan fa neih tam hi tha ka ti zawk.

Mizo hnam thanmawh bawk nia I hriat?
- Mizo te hi thil thiam chak tak leh hrethei tak kan ni a, mahse, hlawhtling tak tak tur a teirei peih lohna hi kan thanmawh bawk a niin ka hria.

Mizo hnam damna atana kawng awm nia I hriatte?
Mahni intodelh tura sorkar leh mi tin ten tan kan lak a ngai in ka hria.

Mizoram thalai tam tak tlakchham:
- Ka hmuh dan ah chuan,  Beih hram hramna hi  kan tlachham in ka hria. Kawng engkim ah Zirna Line  ah chauh lo pawh hian,  Kan tei rei peih lo na hian ,nasa takin kan hmasawnna tur min ti thuanawp in ka hria.

EXPLOREMIZORAM.COM   i hmuh dan:
- Mizo te hian website changtlun leh rintlak tak hi hmuh tur leh tlawh tur hi kan
van em em a. Explore Mizoram hian  chanchin rintlak phochhuah leh Mizoram Tourism promote na kawngah nasa takin a hma a la niin ka hria a. Explore Mizoram hi lo vul zel rawh  se.


Founder/Editor
Explore Mizoram


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Post a Comment

0 Comments