MZU B.Sc Gold Medalist 2020 JH Zorinpuii

Mizoram University (MZU) Bachelor of Science (B.Sc) Gold Medalist 2020 JH Zorinpuii kan belchiang.

MZU B.Sc Gold Medalist JH Zorinpuii hi Zoology-ah topper a ni a, CGPA  9.38 hmuin Zoology topper leh B.Sc Gold Medalist  ani a, hemi bakah hian MZU UG Gold Medalist zingah a sang ber bawk a ni.

Zorin emaw Rinpui emaw tia koh thin JH Zorinpuii hi  C Lalduhthangi (L) leh Vanlalhruaia te fanu a ni a.

JH Zorinpuii te unau hi pakua niin Mipa pakhat leh Hmeichhia pariat an ni a. Presbyterian Kohhran-ah lawiin, Bungkawn vengthar ah chengin an khawsa a ni.

JH Zorinpuii hi March 2-ah a piang. (A pian kum erawh a rawn dah tel lova kan rawn tarlang thei lo.) Zirna lama a san ang bawk hian, thuziak lam pawh a tui a, blog a nei a, Zorini Blog hi i lo tlawh ve dawn nia. 2017 khan PUC Miss 2nd runner up a lo ni tawh  a ni.

Zirna lam:
1. Pawl 1 atanga pawl 12 khawiah nge i kal? eng zatna nge i nih thin?
- Saihnuni Sailo Memorial School ah pawl 7 thleng ka kal a, kum 2007 khan Mizoram aiawhin - Children's Science Congress-ah ka tel.

Pawl 8 aṭanga pawl 12 thleng St. Paul's Higher Secondary School-ah ka kal.

Pawl 12 hi St. Paul's Higher Secondary School aṭangin Distinction-ah kum 2014 khan ka pass chhuak a, hemi kum hian Mizoram a English subject-a topper ka ni bawk. Kum 2010 khan Mizoram aiawhin Indian Science Congress-ah ka tel bawk a ni.

2. Zirna sang zawk i zir leh i zirna hmun leh kum?
Kum 2014 khan Delhi University hnuaiia Gargi College-ah B.Sc Zoology ka zir a mahse Medical entrance exam tur a  inbuatsaih lehin coaching ka kal a. Ka zir duh ber course ka chan loh avangin kum 2017 khan Pachhunga University College-ah B.SC. ZOOLOGY ka zir chhunzawm a, kumin 2020 hian Pathian zarah tluang takin ka zo ta a ni.

# I lehkha zir dan?
Lehkha zirna hmun hi inah  a ni ringawt lo va, ka thiam tam zawk hi chu zirtirtu in class a min zirtir aṭanga ka thiam a niin ka hria. Kan zirtirtute an taima a test a khât tawka min neihpui reng avangin hun awl nei mang lovin inah ka chipzui leh a, exampui kan neih hi chuan zirtur pawh a zangkhai deuh tawh ṭhin. 
Pathian-ah châwl chungin, hahdam takin lehkha hi a zir theih a, a taka temtu ka ni. Kan zirlai kan zir ṭhat avanga kan result-ah chauh hian Pathian a rawn in lan lova, zirlai min zirpui a, Thlarau Thianghlim nen chuan engkim hi hahdam takin, hlâwk takin ka zir thei ṭhin; Zirtirtu ṭha ber a ni.

# harsatna I hmachhawn dan?

- Harsatna tihah hian mimal nun tih lovah chuan, in chhung khurah emaw, chhan dang vang emaw a harsatna nasa em em tawh ka nei lova mahse anxiety/ depression leh bipolar disorder ka nei ṭhin a, zan tam tak, thla tam tak chhung mutmu pawh tuah lovin ka awm ṭhin; beidawngin doctor ka pan ta a, damdawi chak tak tak rilru kal thui tur veng a, rilru a ti mang vek thei te pawh min chawh a, mutna dawmdawite nên mahse ka 5th semester exam a hun tawh a, tlar khat mah thiam thei lo khawpin damdawi khan min nghawng nasa a ni. Tichuan, ka ṭhianpa pakhat hian ṭanpuina min rawn pe a, chumi chu Pathian Thu a ni. Khawvel doctor ten min chawh ai a ṭha zawk, Pathian Thu thiltihtheihna chauh rinchhan chu  ka thlang zawk ta a. Chumi chuan danglamna zawng zawng a rawn thlen ta a ni. Hahdam takin Isua nen, lehkha ka zir a, zawi muangin ka lo mutui chho ve ta a, ka natna pawh chu hriat loh chhûngin a lo reh ta a. Zirna hlamchhiah si lovin, Bible chhiar leh ṭawngṭaina nen, nasa takin fianrial hun ka hmanga , chaw nghei ṭawngṭaite ka nei ṭhin. "Ka dam phawt hi a pawimawh, Lalpa, ka fail pawhin a pawi lo" tiin Pathian hnenah ka ṭawngṭai ṭhin. Mahse, hei ka rin leh ka beisei aia nasa in, min chawisang ta a nih hi. Kan thlen theih chin bâk aia thui min kal thlentîrtu hi a lo ni a. Fail chu sawi loh, paper pasarih ah full mark 10/10  ka hmu a, pakhatah 9/10 ka hmu hial a ni. Harsatna ka hmachhawn dânah hian ka inchhhir lo hle. Tin, sawi belh ka duh chu, ṭanpui ngai lo mihring kan awm lova, ṭanpui kan ngaih chânga mi bân vawn hreh loh leh chak lo kan nih inpawm ngam hi a ngai a ni. I harsatna hmachhawn kha hriatthiampuitu che Pathian a awm reng a ni. Chak lo nih hi mihring nihna a ni a, zak lovin i hmachhawn ang u.

Gold medalist ni tura i beih dan?
-  Gold medalist ni tura beihna hi sawi tur atan chuan a beitham hle. Ka sawi hmasak ber duh chu kan nun  a thil thleng engpawh a hnehna kan chan theihna chu kan ṭawngṭainaah hian a ni. 
Thufingte 16: 9 - Mihring rilruin a kawng a ruahman a, A ke pên erawh chu LALPAN a hruai ṭhin.

Midang aia uchuak taka ṭan khawh a zir mi ka ni lova, mahse Pathian hmangaihna leh a khawngaihnate, a duhsaknate, phu lo tak chunga changtu erawh ka ni chiang hle. Midang aia tih ṭhat tum a zir ni lovin, ka zirlaia ka tui em avangte, ka lo hlawhchham tawhna tam tak avangte, Pathianin zau zawka min hmanna tur ni a ka hriat avangin theihtawp ka chhuah ve a, chumi avang chuan Malsawmtu khian he dinhmunah hian min hlangkai a  ni.

Gold medalist ni tura i beihnaah faculty lamin an ṭawiawm/pui ṭha chein i hria em?
- Tehreng mai, kan zirtirtute leh staff dangte anga inpe kan nei hi kan vannei hle. Zirtirtute hi kan dept-ah chuan mipa deuh vek an ni a, pa in  a fa a hmangaihna rilruin min zirtir a, min ṭawngṭaipui ṭhin thu-te pawh an sawi ṭhin. An subject-ah hian mi hlawhtling tak tak vek an ni a, kan zirlaia tuina min petu, mi entawntlak em em vek te an ni.  Ka duh duh hunah ka harsatnate collegeah leh in lam aṭang pawhin zawh a, dil reng theihin an awm a, class a  an zirtirna bakah mamawha rawn theih reng an nih avang hian an chungah lawmthu ka sawi e.

 

I zirna atana i chhungte pawimawhna:
- Ka chhungte hi ka lehkha zir theihna atana hunawl min pe reng ṭhintu an ni a, tlakchham leh mamawh ngawih ngawih neiin min siam ngai lo. Mamawh engkim min pek bakah bang lova min ṭawngṭaisaktute an nih avangin an hlu em em a ni. Pathianin kan chhungkua min hria a, ka unau ṭo Lalruatfeli pawh Philosophy subject ah tun ṭum khan palî-na a ni ve bawk a, chhungkuain Pathian malsawmna kan dawng nasa em em a ni.

I zirna atana i ṭhiante pawimawhna:
- Ṭhian mize chi hrang hrang, hmun hrang hrang, zirna leh eizawnna inang lo tak tak, chhungkua leh khawtlang, Kohhran leh tuallenna pawh in ang lo tak tak ka nei a, an zavai hian ka tan chuan an hlu em em. Buaipui ngai tak ka nih chang a tama ka tan an awm reng ṭhin. Thlarau nun lama min hruaitu ṭhian ṭha tak tak ka nei bawk a, anmahni avang hian ka lawm em em a ni. Ka classmate-te, college danga ka ṭhiante pawh engkimah kan inpuitawn a an chungah ka lawm em em a. Top ten a inhlangkaite, ṭha taka pass chhuakte ka lawmpui em em bawk. Tin, la hlawhtling ve lo te pawh bei nawn leh ṭauh ṭauh turin ka fuih duh bawk a ni. Kei ngei pawhin kum tam hnuah ka graduate ve chauha, lo beidawnsan bik lo turin ka hrilh duh bawk a ni.

 

A duhzawng leh ngainat zawngte:
Rawng - Dum, Var, Pastel colours
Chawhmeh  - Vawksa hring hi ka duh ber a, a dawtah vawksa rêp 😂. Mizo chawhmeh ngainat loh ka nei lo.
Incheina - A hun leh hmun a zirin, a hak nuam nuam ka ha ṭhin.
Rimawi – Rimawi hi ka tuipui em em a, duh bik sawi thei ka ni lo. Gospel worship  Hla - te tunlai chu ka ngaithla nasa zual a, thlarau nun a chawm hle a ni.

Mizo Ziaktu zingah - TS Khupchong, Ani hi ziaktu, nunah leh kawng tam taka ka pawh a nih avangin. 
Hla - Ka ngaihthlak hnuhnun ber ka sawi mai ang- Yet not I but through Christ in me, City Alight in an sak a ni.
Hla phuahtu -  Ka pu te- Ngurchhawna leh C. Lalkhawliana te hi min thlahtute an nih avangin ka ngai hlu em em a. Tin, C. Zarmawia leh K. Hminga te hi ka duh em em bawk.
Teacher - Hming hmer a han sawi tur bik ka hre lo, tupawh an zirlaite hnena an zirlai tuina tuh theitu leh nunkawng ṭha min hrilhtute. Tin, ka tan hian Thlarau Thianghlim hi zirtirtu ṭha ber a ni bawk.
Leader - Mi tam tak zinga ka tarlan duh pakhat chu- APJ Abdul Kalam hi a ni.

A chhanchu a scientific background leh ram tana a thawhte; ka scientific paper present a tak ngei a min lo faksak ve tawhtu a nih avangte in a ni.

Mize ngainat zawng:
- Nunze nghet nei mahse dik ber nih loh chang pawha ngaihdan sawn leh thei khawpa mi thlirzau, mi rinawm leh nihna ang anga lang ṭhin mi, mi ngaihchâng thiam leh hmangaihna ngah tak mi.

Mize ngai nat loh zawng:

- Mi bum hmang leh rinawm lo, hunbi vawng dik lo lutuk, rilru sûkthlêk mumal nei lo leh aipui leh aite nei te.

Hobby- Handcraft lam khawih, pangpar khawi, zai leh trekking te.

Relationship status - Single

Kawppui atan duhzawng:

- Pathian ṭih mi, Thlarau Thianghlim hruaia  awm, rilru tluang tak nei, mahni ke a ding, Pathian rawngbawlna rilru pu mi.

Zawhna dang:::
1. A tel lova i awm theih loh: 

- Pathian

2. I nun kaihruaitu: 

- Thlarau Thianghlim

3. Hringnuna i hlauh ber: 

- Hmangaihte chân, beidawn leh Pathian in ti tura min tih, hlawhtlintîr loh.

4. I tih ngai miah loh tur:
- Puihna min dîlin ka tih theih a awm phawt chuan ka hnar lovang.

5. Mizo Tualzawl nuna ṭha i tih:
- Kan in unauna te, khawi hmunah pawh awm ila chhungkua anga in tel khawm tlat zel kan nihnate, in duhsakna entirna atan - chawhmeh kan han insuah mai ṭhin te, ṭhian chhan thih ngam khawpa kan huaisennate, ram leh hnam hmangaihna chhungtina inhrilh hre mi kan nihna te hi a hlu ka ti a. Mizo nunzia leh Kristianna kan kalkawppui dante hi hlu ka ti em em a ni.

6.  Quote i duh ber:

Ani chuan, “Ka khawngaihna i tân a tâwk e, Ka thiltihtheihna hi chak lohnaah asin tihpuitlina a awm ṭhin,” mi ti a.

- 2 KORINTH 12:9

7. Mizoram leh Mizo tualzawl nuna Mizo hmeichhiate dinhmun:
- Mizo hmeichhhia-te hi dâwm kân chawp ngai kan niin ka hre lova, keimahni ṭheuhvah hian dinchhuahpui tham 'theihna' a awm vek. Tin, hmeichhia sorkar pisa kai an ṭhathnem tawh hle rualin, a lûah hian mipui chêng zat tam zawng ngaihtuahin hmeichhia te hian dinhmun kan ngah tawk lo hle. Pathian-in hmeichhia leh mipa hi inel tur ni lovin in ti famkim tawn tura a siam kan ni a, inchhuang tur chuang kan awm âwm lo e.

8. Hnam hmingṭhat leh hmingchhiat kawngah Hmeichhiate'n mawhphurhna:
- Hmeichhia-te  hi ram leh hnam hmêl hmang pu-tu kan ni a, mipa a kut leh ke an nih ang hian. Mahse, hmeichhia kan nihna avanga hnam hmel mawi leh hmingchhiat tehfungah  hmeichhiate hi hman bik tur kan ni lova. Thiamna leh pianze mawina avangte pawhin Mizo hmeichhhiate hian Mizo hmel kan lo màwi fo tawh. Chutih rualin, Mizo mipate leh hmeichhiate dinhmun hi hnam dawmkanna kawngah kan dinhmun a inang reng tih ka sawi duh bawk. Mizo nula che mawi lo hlek awm se, 'Mizo hnam a ti mualpho' ti a kan sawi rual hian tlangval awm ho tak tak, chhungkua a pawimawhna nei pawh a in hre mang lo, kawngsir a tei rawlai mai mai an tam tehreng nen, 'Mizo hnam a ti mualpho' tiin kan kawh rawn lo. Mawhphurhna thuhmun nei kan nihzia hriat thar a ṭha in ka hria.

9. Hnam ziarang chawinun kawnga Hmeichhiate mawhphurhna:
- Nulain hnam zia râng a chawikân tlatte, nula hmelṭha em em a 'Zo' riaute hian a mawi em em a. Mizo nunzia chhuan thar apiang hnena tuh ṭhintu hi nu-te hi an ni bawk. Mizo chawhmeh siam dân te thleng hian thiam kan tum ṭheuh a ṭulin ka hria, hnamzia chu incheinaah ringawt ni lo, nitin a kan ka min fahtu thleng hian a tel vek avang a ni. Kan ṭhenawmte, khawtlang leh kohhrana kan nunphungah hmeichhia tih atana mawi bîk tam tak a awm a, hei te hi chhungtin a in hrilhhriat a ṭha hle. Chhungtin-ah mawhphurhna kan inhrilh hriat ṭhat hian, khawtlangah bul ṭan ṭhat a ngai lovang.

10. Mizote tan 'Fa neih tlem' inzirtir hi a ṭulin i hria em?
- He thil hi chu mi zawng zawng huap a hrût rual har tak a ni awm e. Chhungkaw dinhmun chhut chet cheta ngaihtuah chi niin ka hria. Kan châwmzawh tawk ṭheuh neih thiam a ṭha ka ti. A nei zo apiangin fa ngah hi a ṭha in ka hria a, Mizo-te hi hnam tlêmte chauh kan nih avangin, 'Fa neih tlem zirtirna' hi au hla taka neih a ṭulna hi ka hmu thiam meuh lo a ni.

11. Mizo hnam ṭhanmawh bawk nia i hriat?
- Mizo hnam hian hma a sâwn ve zel a, 'ṭhanmawh bawk' tih a han sawi fak atan chuan min chelh nghet lutuk in ka hre hlawm si lo. Ṭhan ti ṭhutu tam tak a awm thei a- rinawmna kan tlachham ṭan te, teirei kan peih lohna te, a tawp kan thlenpui ngam lohna te, kan hnam anga kan 'nihna' kan ṭan natpui ngam lo lutuk te hi a ni.

12. Mizo hnam damna atana  kawng awm nia i hriatte?
- A pawimawh berah chuan hnam anga min dintu Pathian hriatna hi a ni. A bak zawng chu a chunga ka sawi tâk ho ṭhan ti ṭhu-tu ni a ka sawi tawh te khi vawn nun a ṭulin ka hria a. Tin ka vei ve em em pakhat chu, mahni ṭawng ziak a dah kan thiam lo em em hi a ni. Ziak zawm leh ziak zawm loh tur chungchangahte pawh fimkhur thar a ṭul hle. Mihring chu thil zir thar ngai,thiam sa a piang lo kan nih avangin, inzir thar leh inzir belh hi hreh lo ila hma kan sâwn sawtin ka ring.

13. Hnam chhan nana Hmeichhiate ṭangkaina leh mawhphurna?
- Mizo hmeichhhia-te hian "thiamna leh theihna" tam tak kan nei a, puantah thiam leh ram lama ṭang thei, pisa kai leh inchhung sekrek khawihte, rorêltu leh rawngbawltu ṭha tak kan ni kawp thei vek a. Kan thiam leh theih a tam em avang hian kan mawhphurhna pawh a sang hle. Hnam pawisawi zawnga Mizo mipa leh hmeichhiate kan chêtna sawi tur a tam lo hle a, chuvang chuan mimal tinin nitin a kan lo chîn ṭhan ṭha apiangte hi kan chhawm nun zel chuan kan hnam hi engtikah mah a ral bik ka ring lo. 
Hmeichhe lu chu mipa a ni a, mipa lu chu Krista a nih ang hian, mipa-te dawh thiam tak a hmeichhiate kan awma , mipa in Krista a lu atana a vawn tlat chuan Mizo hnam hi Pathianin mal a sawm reng ang.

14. Zirna, Khawtlang leh Kohhran hi?
- Zirna leh Khawtlang leh Kohhran rawngbawlna hi a tel lova kan awm theih loh pawimawh em em vek a  ni a, a thiam chuan an kalkawppui thui thiam viau awm e. Mi tam tak kal kawppui a hlawhtlinpui an awm avangin, mahni phak tawk ṭheuhva hun insiam thiam a ṭha in ka hria.

15. Khawtlang, Kohhran leh nangmah:
- Mi tinin zirna kan zir chhan hi chu mahni leh chhungkaw inchâwmna bakah, Khawtlang leh Kohhran rawngbawlna atana hmanraw ṭha tak a nih vang a ni. Chuvang chuan, ka thiamna leh ka theihna te hi Khawtlang leh Kohhran rawngbawlna atan a hman chhoh zel ka tum.

16. Social Media leh Nangmah:
- Social media hi a ṭangkaina inhrilhchawp ngai lova kan hriatchian ṭheuh a ni a, kei pawhin ka hmang nasa ve hle. Mahse, inthlûrbing ka duh chângte hi chuan ka account deactivate-in ka chawlhsan rih ṭhin. Ka khawih ve chang hian khawih theih hun tur bi in tuk lawk ka nei a, pelh loh hram ka tum ṭhin.

17. Mizoram ṭhalai tam tak tlakchham:
- Hemi sawi tur hian ka tling lo hle a, tlâkchham ngah ber pawl ka ni awm e. Kei ngei pawhin ka zir mek, ka tlâkchham, midangte pawhin zir belh ngai ni a ka hriatte chu- taimak chhuah ṭauh ṭauhna hi a ni. Mi thatchhe ber pawhin a peih tawk a thawk ṭhin a, kan peih bâk kan tih luih chiah hian mi taima  kan ni thei chauh. Tin, danglam kan  hreh lutuk ṭhin hi a ni. Khawvel thil in pawhbuaitir lutuk lova Pathian tana inserh hrang mi hi ka ngaisang a, ṭhalai tam tak hian chu chu in tihhmuh bawk ila ka duh hle a ni.

18. Mizo ṭhalaite hian ngaihsan tur dik an ngaisangin i hria em?
- Thiamna a sâng zel a, ngaihsân tur pawh mahni tuina zawn ṭheuhah kan hre nual. Kan ngaihsân zawngte hian kan nun a hruai em em a, Mizo ṭhalaite nun dân leh kan dinhmun han en hian, 'Ngaihsân tur dik kan ngaisang em aw?' ka ti deuh.

19. Ngaihsan tur dik nia i hriat:
- Mihring chuan entawnturte, ngaihsântur ṭha te kan mamawha, entawn tur dik leh ngaihsân tur dik tluantling awmchhun chu Isua leh a zirtirnate hi a ni. Kan ngaihsân rawn thar a ṭulin ka hria

20. Hlawhtlinna tura pawimawh:
- Hlawhtlinna chang tur hian kailâwn tam tak a awma, awlsam tak ni se mi zawng zawng ban phâk a ni ang. Taimaknate, tumruhnate,teirei peihna, beidawn lohte, chhel-te a ngaia, a bâk sawi belh tur kan hre ṭheuh awm e. Pathianin lei malsawmna a dah a, kan tuhrah apiang seng tur kan ni; Ringlotute pawh hian an taimak rah an seng ve tho ang hian. Mahsela, Ringtute kan vanneihna chu Pathian hmangaihna, malsawmna,  khawngaihna leh duhsakna kan theih leh kan tih bak a min hlui ṭhin hi a ni. Hei hi ringtute tan chuan kan hlawhtlinna thuruk niin ka hria.

21. Hloh i hlauh ber:
- Khawvelah hian chhan nei a piang kan ni a, mihringin khawl a siam chuan ṭangkaina tur leh hmanna tur a duan lawk avangin chumi mil tur chuan a ruangâm pawh a din ṭhin, chutiang bawk chuan Pathianin mimal tin te, tih tur bik, thiam bik neiin khawvela cheng turin min din a. Chu, Pathianin min din chhan hlawhtlintîr theih loh chu ka hlauh ber a ni.

22. Hnam dang nupui pasal neih hi:

- Hnam dang nupui pasal neih hi hnam lian lo tan chuan a pawi hle a, kan society a kan seng lut ve a nih pawhin pawlh dal kan ni a, kan society kan chhuahsanin hnam tan channa a ni. Duhthlanna siam thei vek kan ni a, hnam vawn him duhtu chuan duhthlanna thiam taka a siam ngei ka ring.

I thalaipuite tan fuihna:
- Khawvel changkanna in a ken tel social media avang hian 'Identity crisis' kan hmachhawn nasa em em a, mahni hnam zia paihthla a, tu emaw hnam an châkna te, social media a thil lang, fakna atana an hak leh an inbel te, an khawsakzia tak tak emaw kan tihte hian awhna dik lo ah min hruai lut nasa hle in ka hria. Ka ṭhalaipuite hi mahni ke a din tumna leh nu leh pa thawhchhuah ringa 'flex' intihtheihpui vak vak chîn te hi zawngchhang loh a ṭha in ka hria. A pawimawh ber engkim kan tih apiang Pathian hre reng chunga hlenchhuah leh kan duh leh kan châk zawngte ti hlawhtling thei tura famkim taka duan a, siam kan nih hi ringhlel lovin, Mizo nula leh tlangval, Kristian ṭha tak anga nitin hun hman zir turin duhsakna ka hlan e.

EXPLOREMIZORAM.COM i hmuh dan: 
- EXPLOREMIZORAM.COM hi ka tlawh fo va, ṭhalaite leh rual û zawkte pawhin an chhawr ṭangkai viauin ka ring. In thu ken a ṭha a, a huapzo bawk a, luh leh chhuah mai a awlsam em em bawk. Mi tam tak platform ṭha nei lo tan a inphochhuahna ṭha tak in siam avangin ka ngaihlu hle bawk che u. Lo ṭhanglian a, lo darhzual zel turin duhsakna ka hlan che u a, thu tam tak sawina hun min pek avangin lawmthu ka hrilh a che u. Ka lawm e.

- H Zate

Founder/Editor

Explore Mizoram

(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]

EXPLORE MIZORAM

https://www.exploremizoram.com

email: admin@exploremizoram.com

FB: https://www.facebook.com/exploremizoramportal

Twitter: https://twitter.com/exploremizoram

Instagram: https://www.instagram.com/explore.mizoram

(Website leh a hnuaia fakna hi lo hmet ve rawh.)