AMC area inkharkhip chungchanga Health Minister thuchah

Zoram mipuite, tlang leh mual hrang hranga kan u leh naute chibai ka buk leh a che u.


COVID-19 positive kan neihte hi an nat dan a danglam sawt viau mai a, October thla hmalam kha chuan COVID-19 positive kan neih zinga 15% (za ah 15) hi natna langchhuak symptomatic kan tih kha niin 85% (za ah 85) zet kha natna langchhuak lo (asymptomatic) kan tih kha an ni a. Amaherawhchu, October thla, tun thla kan hman lai mekah hian tukin result kan hriat thleng khan COVID-19 positive 485 hmuhchhuah tawh a ni a, heng zinga 166 (34.23%) hi natna langchhuak, symptomatic kan tih kha an lo ni ta a ni. Kan daktawrte sawi dan chuan Symptom neih hnu a in test te hi an taksa ah virus hnathawh a lo nasa hman deuh tlangpui tawh thin a, damdawi inah pawh ICU a dah luh ngai leh ventilator hman ngai kan nei ta deuh reng mai a ni.

Hetih rual hian kar kalta chhungah mai khan AMC area-a Local Council 83 zinga Local Council 45 ah COVID-19 positive 160 hmuhchhuah an ni a. Zirlai 28, zirtirtu 9 leh non-teaching staff 4 positive an awm bawk a, positive kan neih tharte awmna veng hi a darhsarh em avangin hripui hian kil tin a luhchhuah niin a lang a. Damdawi in OPD a inentir turte zingah pawh positive kan hmuhchhuah belh zel bawk nen, vawi duailo kan din hmun thlirin kan thukhawm a. Theihtawp chhuahin ngaihtuahna kan hotute hian an seng reng a ni tih kan hriat a tha awm e.
Kan dinhmun hi hetiang anih tak avang hian kan Chief Minister remtihna in Mizoram pumah ni 14 awh tur COVID-19 No Tolerance Fortnight chu nimin atang khan kan hmang tan ta a ni a, hetih mek lai hian tunhnai ni li chhung khan Aizawl Municipal Corporation (AMC) huamchhungah positive kan lo pun belh nasa ta viau mai a, community spread a awm tawh hial ni a ngaih theihin kan inkaidarh nasa ta a ni. Heti a nih avang hian nimin tlai khan emergency meeting kan nei a, kan Home Minister Pu Lalchamliana pawh rawn telin Chief secretary leh sawrkar official pawimawhte bakah Mizoram Kohhran Hruaitu Committee hotute leh Jt. NGO Coordination Committee hotute pawh rawn telin Indian Medical Association aiawh an rawn tel bawk a. Uluk taka kan ngaihtuahin kan dinhmun a duhawm lo chho mai ang tih kan hlau a, Chief Minister remtihna kan lak hnu ah tukin atanga chhiar a kar khat chhung, November ni 3, 2020 zing dar 4:30 thleng AMC area ah lockdown kan puang ta a ni. Hemi chhung hian kan dinhmun uluk takin kan chik reng ang a, a tul angin lockdown hi pawhsei theih tura ruahman a ni a. Hetih rual hian Mizoram hmun dang zawngah COVID-19 No Tolerance Fortnight hi khauh taka kalpui chhunzawm tur a ni ang.
Community Spread hi kan pumpelh thei dawn chuang lova, in lockdown hi a tulna eng nge awm ? ti a zawhna nei kan awm maithei a. Mizoram health infrastructure pachhia leh mihring tlemte awmna ah hian mipui zinga hripui darh huk hi kan zo dawnin a lang lova, hri danna (vaccine) hmuhchhuah a nih hma chu kan theih ang anga fimkhura kan inven a tul dawn a, mipui zinga hri kai darh chak lutuk tur tih muan nan tal pawh lockdown hi kan tih zeuh zeuh a tul niin a hriat a, hri kai kan pung chak deuh ni a a lan chang a hetia kan in lockdown hian, mipui zinga hri darh chak lutuk tur kan veng thei thin a, hei hian nasa takin awmzia a nei a ni tih kan tawnhriat atangin a lang a ni.
ZMC COVID-19 positive te enkawlna tur bik liau liau, State Dedicated COVID Hospital atan kan ruahman a, he hmunah hian COVID-19 positive serious deuh enkawlna tura ruahman niin, tunah hian kan la indaih deuh avangin positive serious vak lo te pawh kan la in dah thei rih a.
Positive serious kan ngah deuh a nih chuan heng serious vak lo kan tih mild-symptom leh moderate kan tih maite bakah mahni inringhlel te lo awm lailawkna turin District tinah Dedicated Covid Health Centre kan ruahman a, a tul chuan heng hmunah te hian covid-19 positive te oxygen theihna tur a hmun a ni.
Tun dinhmunah hian DCHC 14 Mizoram pumah kan nei a, Aizawl district ah - 5, Champhai district ah – 1, Khawzawl district ah -1, Kolasib district ah -1, Lawngtlai district ah -1,Lunglei district ah -1, Mamit district ah -2, Serchhip district ah -1, Siaha district ah -1 kan nei a ni. Heng DCHC zawng zawnga khum awm zat hi 166 a ni a.
Ventilator pawh hi tun dinhmunah chuan kan ngah viau mai a, thlaphanna tur awmin a lang lo. Donation angin Ventilator 129 zet kan dawng a (Government of India – 119, State bank of India – 10), Sawrkarin kan neih sa 70 a awm bawk a. Kan thawhpui private hospital zawng zawngah ventilator hi pek tumin ruahmanna kan kalpui mek bawk a ni.
Heng bakah hian CCC kan tih mai Covid Care Centre district hitinah kan nei bawk a. Heng CCC te hi mi 2000 enkawl theihna tur a ni.
COVID-19 vei zingah naupang leh nausen kan nei ta nual mai a, kan hotuten ngaihtuahna sengin heng naupang leh nausen te enkawlna tur bik Chid-friendly Covid Care Centre siam turin hma an la mek a, naupang leh nausen te damdawi ina khawhar taka an awm lohna turin an infiamna tur leh intihhlimna tur te ngaihtuah a nih dawn bakah an nu leh pa, an chenpuite pawh a tul anga counselling pek dan turte ruahman a ni ang.
Mitinte ka chah duh chu COVID-19 hri danna (vaccine) an hmuhchhuah hma chuan fimkhur theihtawpa kan fimkhur a ngai dawn a, COVID-19 laka kan inven theihna awlsam ber khawvelin lungrual taka a pawm tlan chu mask vuah that, uluk taka kut silfai ngun leh midang hlata awm (social distancing) te a la ni reng a, mitinin kan tih theih a ni a, kan mawh ah la theuh ila, hei bakah hian sawrkarin zawm tur dan a siam chi hrang hrangte kha uluk takin i zawm theuh ila. Mahni theuh kan him chuan kan zavaiin kan him tihna a ni mai dawn a ni. Mahni uluk takin in chik theuh ila, symptom kan nei a nih chuan rang takin in test nghal tum ila, symptom lang lem lo pawh mahni kan inringhlel a nih chuan a rang thei ang bera in test kan tum dawn nia.
A tawp berah chuan nipuite hnenah sawrkar thu in zawma tha taka in thlawp thin avangin lawmthu ka sawi duh a. He hripui leng hi khawvelin a nihphung a la zir chian mek a ni a, kan la bel lo hle in a do dan turah pawh ro rel thiam a har thin hle a, vawiina tha tak ni a kan hriat kha a tuk lawkah a lo tha lo leh a, chutiang boruak kara hma la kan nih avangin kan rorelna leh hmalak tawhna ah te tihsual tam tak kan neiin ka ring a, khangah te khan in rilru kan lo hliam palh emaw, kan lo ti na palh a nih chuan thinlung takin in ngaihdamna ka rawn dil a. Kan zavaia kan that tlan pui dan tur ber ngaihtuah chung zela rorel kan ni tih mijn lo hriat sak ula, a tha tur leh tangkai tur ngaihtuahna kan nei a nih chuan in thurawnte kan lo dawngsawng reng thei a ni tih min lo hriat sak dawn nia.
A tawp berah chuan venghimtu kan Pathian chungah lawmthu sawi pahin a humhimna i dil zel ila, he hripui vanga nunna chan kan awm loh hi kan duh ber leh kan duhthusam a ni a. Bang lovin i in tawngtaipui tawn reng ang u.

Ka lawm e

Dr R Lalthangliana
 (27.10.2020)

Post a Comment

0 Comments