Telecom lama harsatna sukiangtu tur Mizoram Telecom Infrastructure Policy, 2020 tichhuak thuai dawn

Aizawl | September 10, 2020: Mizoram State Level Broadband Committee (SLBC) chu nimin khan Chief Secretary Video Conference room-ah a hmasa ber atan an thukhawm.

He hunah hian Chief Secretary Lalnunmawia Chuaungo chuan, tunlaiah telecom leh internet infrastructure tha neih a tulzia a sawi a, Mizoram Telecom Infrastructure Policy, 2020 chu tihchhuah a nih thuai tur thu leh he policy hian telecom lama kan harsatna tam tak a sutkian tur thu a sawi.

Mobile leh Internet hi sawkar, mipui leh sumdawng zawng zawngin kan mamawh, a lova kan awm theih loh thil a nih tawh avangin hemi kawnga hma kan sawn a tulzia pawh a sawi a ni.

Pu K. Srikrishna, DDG (Mizoram), Department of Telecom in presentation pein National Broadband Mission thil tum leh kalpui nana thil pawimawhte a sawi lang bawk.

Meeting-ah hian telecommunication lama Mizoram dinhmun hrang hrang thlirho a ni a; December 2019-a tihchhuah National Braodband Mission-in kum 2022-a khua zawng zawnga telecom leh internet neih theihna tur te leh mitinin chak zawka broadband internet an neih theihna tur atana mamawh hrang hrang te sawiho a ni. Tower and Infrastructure Providers Association (TAIPA) leh Cellular Operators Association of India (COAI) chuan an harsatna tawh te sawiin a tul anga hmalak ni se, tiin an rel bawk.

He meeting-ah hian Addl. Chief Secretary (PWD), Secretary leh Special Secretary (ICT Department), PCCF (EF&CC Department),P&E, LAD leh UD&PA atangin sawrkar hotute an tel a. DDG, Department of Telecom, Govt. of India bakah Tower and Infrastructure Providers Association (TAIPA), Cellular Operators Association of India (COAI), Bharat Broadband Network Limited (BBNL) leh BSNL ten video conference hmangin he meeting hi an chhim a ni.

Post a Comment

He post chungchanga i ngaihdan lo sawi ve rawh:

Previous Post Next Post