Supply Department-in hripui vanga tangkhang leh harsatna tawkte hnenaah a thlawnin buhfai leh chana sem

Aizawl | September 11, 2020: Atma Nirbhar Bharat (ANB) Scheme hnuaiah Covid-19 hrileng avanga tangkhang, harsatna tawkte hnenah Buhfai leh Chana sem turin Central Sorkar chuan State tin te hnenah thu a pek angin Mizoramah pawh Supply department kaltlangin a semchhuah hna thawh a ni.

Stranded Migrants/Workers leh National Food Security Act hnuaia Ration Card nei ve lo te leh State Sorkar atanga Ration Buhfai dawng ve lo hnenah thla khat atan Buhfai a thlawnin mi pakhat tan kg 5 zelin May leh June, 2020 atan sem tur a ni a. Mizoramah pawh he ANB Scheme hi kalpui niin Buhfai pawh Central Sorkar atangin 668.25 Metric Ton hmuh a ni tawh a, mi 23694 hnenah pek chhuah a ni. Buhfai dawn tawh zawng zawng atang hian 250.01 Metric Ton (37.41 %) sem zawh tawh a ni.

ANB Scheme hnuai atang hian Chana 31 Metric Ton allocation hmuh a ni a, mihring 14879 in an dawng thei a. A dawng tur mipuite hnenah 29.75 Metric Ton (95.96 %) sem zawh tawh a ni.

Heng Buhfai leh Chana dawngtu turte hi District hrang hrangah DCSO leh DC te kaihhruainain thlan an ni a, DC leh DCSO te hian a tul dan ang zelin khaw tin leh veng tinah Local Level Task Force te thawhpuiin, Buhfai leh Chana a thlawna pek turte hi an zawng chhuak thin a ni.

Mikhual tangkhang, Ration Card neilo te hnena Buhfai leh Chana sem chhuah dan hi Central Sorkarin a vil reng a, fimkhur taka hna hi thawh niin Central Sorkar hnenah hmalak dan report pek reng a ni.

- DIPR

Post a Comment

0 Comments