Sesih khuaa Assam Rifles te chet dan chungchang National Women Commission-ah thlen; A tul chuan National Human Rights Commission leh UNO hial pawh thlen kan huam - Zo Indigenous Forum

Aizawl | September 29, 2020: Zo Indigenous Forum (ZIF) chuan vawiin September 29, 2020 khan National Commission for Women (NCW) Chairperson Rekha Sharma hnenah August 15, 2020 tlai lama Sesih khaw hmeichhe pahnih chunga Assam Rifle te mawi lo taka an chetna chungchang kan thlen a, a copy hi Mizoram State Commission for Women (MSCW) an pe tel bawk.

Zo Indigenous Forum (ZIF) thuthlenah hian, Champhai Police Station-ah case ziahluah niin, Case No. 87 of Dt 20.08.2020 U/S IPC 254/354(A) 354 (D)/509) pek a ni a, chu bakah Mizoram State Commission for Women (MSCW) hnenah August ni 20, 2020 khan complaint an thehlut tawh tih an sawi bawk a, hei bakah hian September ni 9, 2020 khan Warrant of Arrest tihchhuah a ni tawh bawk a, he thilthlen atanga thla khat a ral hnu vawiin thleng pawhin he'ng sipaite man an la ni lo hi mak an tiin an hriatthiam theih loh thu an sawi tel bawk niin Zo Indigenous Forum (ZIF) thuchhhuah chuan a tarlang.

NCW chu he thilthleng chungchangah hian a rang thei ang bera zirchiang tur leh dan bawhchhetute chu dan anga man an nih vat theihna tura hma la turin Zo Indigenous Forum (ZIF) chuan an ngen a, tun thlenga heng thil tisualtu la humtu thuneitu pawh dan anga hrem turin an ngen bawk.

Zo Indigenous Forum (ZIF) chuan, "ram leilung fate'n kan dikna leh chanvo humhim a nih theihna'n leh, kan hnam zahawmna humhim a nih theihna'n kan phak ang tawkin hma kan la zel dawn a ni." am ti a.  "Sesih khuaa thil thleng chungchangah pawh hian a tul dan azirin National Human Rights Commission leh UNO hial pawh thlen kan huam a, pawikhawihtute chungah dan anga action lak a nih hma chuan kan bei zel dawn a ni." an ti bawk.