R Vânlawma leh Lalmuanpuia Punte Inannate

- K Remruatfela

Vawiin chu hna kal lovin Pu R Vânlawma Autobiography 'Ka Ram leh Kei' tih chu ka han chhiar nawn leh a. Chhiar fo tawh pawh ni mah se, hriat belh thur leh hriat thar tur a awm leh zel tho a. A ngaihnawm ka ti tak zet! A ni taka Pu Vânlawma hi Zofate tana arsi ropui a ni a, a chanchin han chhiar han chhiar hian Zoram pa lar, Pu Muanpuia Punte nen hian inanna tam tak an nei tlat hian ka han hre pek a. Chûng ka ngaihtuahna kam liam mai mai chu ka han phuh chhuak ve leh tawp ang e.


A hmasa bera Pu Vânlawma leh Pu Muanpuia Punte inanna nia ka hriat chu Zoram an ta neihna tlat hi a ni. Pu Vânlawma hi a thuziah tam tak pawm loh leh dik tâwk lova ka hriat thu hnutchhiah thahnem tak nei nuk mah se, Zofate zinga ka mi ngaihsan ber a ni a. Sawrkarah rolrelna fung chelhtu ni thin lo mah se, Zoram a ta neih tlatna leh a tel lo chuan Zoram hi kal dik thei lo tur ang hiala a ngaihna hi amah ka ngaihsanna ber pakhat a ni. A personality hi ka zahin ka ngaisâng tak zet! A chanchin hi lehkhabu 2-ah ka ziak tawh a. Seat ka hmu thei hlauh a nih phei chuan a socio-political philosophy thlirzâuna hi thesis paper atana hman ka rilrûk mêk a ni.

Chutiang bawkin Pu Muanpuia thu leh hla tam tak hi pawm theih loh ka ngah em em a. Nationalism chungchangah phei chuan kan ngaihdan a inperhsan hle! Amah ka hriatna hmasa ber chu class 12 ka nih laia Indigeneous right lam hâwi article a ziah ka chhiar atangin a ni a. Kan inhmuhna hmasa ber erawh chu Zoram Tan & Zoram Thlirtu Facebook group lâr laia, Mizoram ka rawn chuan chhuah tuma Zoram Weekly Chanchinbu Office-a kan inkawm kha a ni âwm e. Chuta kan inkawm tum chuan Mizoram political history a sawi nasa hle a. Nimahsela, a source leh a document vel ka han dilin  sawi tur leh dahthat a nei lawi chuang lova. A mak ka han ti viau dawn a, nimahsela, a thianpa Pu Muantea'n, 'A ni hi chu a tawnhriat atanga hre tawp chi a ni a, document tih vel a ti ve vak lo',  tih thu a lo sawi rîk zeuh tâk avangin ka mak tihna pawh a bo leh ta duak a. Zawh zui zêl enah pawh ka en ta lova. A ni taka, Pu Muanpuia pawh hi Pu Vânlawma ang tho in Zoram hi a neitu en hliah hliah a ni tih hi a chiang ngawih ngawih a. Ram leh hnam khawih issue thar a awm apianga a huana kêl tla lût ang hrima ngaia sulsutu leh hmahruaitu a nih theih zêlna hi amah Pu Muanpuia ka ngaihsanna leh ka zahna ber pakhat a ni.

Chutihlaia thil mai tak erawh chu, chutiang khawpa ram leh hnam neitu thinlung pui leh sulsutu ni si hian, Sawrkarah dinhmun sâng leh rorelna fung an la chelh dun lo ve ve a. Hotu ang a mipuiten kan en dun thin an nih ve ve laiin ho erawh an nei lâwi chuang si lo! Chutihlai erawh chuan Executive tam tak te aiin mi hmelhriat leh râwn an hlawh dûn zâwk lâwi bawk si a. Chutiang zawng zawng ka han thlirlêt chuan amah R Vânlawma leh Muanpuia hi mi inang, sa inang dik tak an lo ni e ka ti lo thei lo a ni.

Post a Comment

0 Comments