PM in Ganga lui Nirmal leh Aviral a siam turin Uttarakhand ah Project lian paruk a hawng

• Namami Gange Mission hmalakna avang hian kum 6 kalta chhung khan Uttarakhand a sewage treatment capacity hi a let 4 in a len belh a ni
• Kum 6 kalta chhung khan Ganga lui a luang lut tui paihna/drain 130 chuang chu khar an ni
• Ganga lui puala museum hmasa ber 'Ganga Avalokan' hawn a ni.
• October ni 2 atanga tan tur ni 100 awh tur campaign (100-day campaign) puan a ni a.  Hemi hun chhung hian ramchhung a sikul leh college zawng zawngte chuan tui thianghlim intur connection an neih teuhna atan hmalak a ni ang.
• Corona hripui leng kara Uttaraland State Sorkarin  chhungkaw singnga chuang hnena tui connection a pe thei chu PM-in a fak a ni

September 29, 2020: Prime Minister Pu Narendra Modi chuan vawiin khan video conference kaltlangin Namami Gange Mission hnuaiah Uttarakhand a mega development project 6 a hawng a ni.

Pu Modi hian Ganga lui kaihhnawih Museum hmasa ber Haridwar a Avalokan Museum a hawng bawk a. Hei bakah hian "Rowing Down the Ganges" tih lehkhabu leh Jal Jeevan Mission logo thar a tlangzarh a.  Prime Minister hian 'Margadarshika for Gram Panchayats and Paani Samitis under Jal Jeevan Mission' (Village Panchayats leh Tui Committee tana inkaihhruaina)  pawh he hunah hian a tlangzarh bawk a ni.

He hunah hian thusawiin Prime Minister chuan Jal Jeevan Mission in a tum ber chu ram chhung a thingtlang khua a in zawng zawngte hnenah pipe hmang a tui connection pek a ni a ti a.  Pu Modi chuan Mission logo thar tlangzarh hian mitinte hnenah tui far khat lek pawh a lo thlawn a far anih chuan a uiawm a ni tih a ngaihtuah tir chhunzawm a beisei thu a sawi a ni. 

Margadarshika chungchang sawiin Prime Minister chuan Gram Panchayats leh thingtlang khua a chengte tan mai bakah Sorkar hnuaia thawkte tan a pawimawh dan a in ang reng a ni a ti.

"Rowing Down the Ganges" lehkhabu chu sawi zauvin Ganges lui chu kan culture/hnam zia rang,  rinna leh kan hnam rohlu entirtu anih zia kimchang taka sawifiahtu a ni a ti.

Pu Modi chuan Ganga lui thenfai a pawimawh zia sawiin a lui intanna Uttarakhand atanga West Bengal inkara cheng ram mipui za a 50 te chawmtu leh an dam khawchhuhna atana pawimawh tak a ni a ti.

Namamu Gange Mission chu integrated river conservation mission lian ber anih thusawiin Ganga lui thenfai mai bakah a lui enkawl hna pawh a tel vek a ni a ti a.  Prime Minister chuan he ngaihtuahna thar leh hmalakna hian Ganga lui chu a tinung thar leh a ni tih sawiin kalphung hlui kha chhunzawm ni ta se chuan vawiin ni ah pawh hian a dinhmun chhiat ngaiin a la chhe reng ang a.  Kalphung hluiah kha chuan mipui vantlang hmalakna leh hmathlir mumal a awmlo a ni a ti.

Prime Minister chuan Sorkarin a thiltum tihlawhtling turin ruahmanna pali a kalpui thu a sawi a.

A pakhatnaah chuan - tuichhia Ganges a luang lut tur venna atan Sewage Treatment Plants (STPs) network siam.

A pahnihnaah chuan kum 10 -15 lo la awm tura mamawhna tur thlir chungin STP-te hi siam an ni.

A pathumnaah chuan Ganga lui kam a awm khawpui lian za vel leh thingtlang khua sangnga te chu pawna inthiar awmlohna (open defecation free (ODF)) a siam.

A palinaah chuan Ganga lui fintu zawng zawng a pollution tireh tura hmalak.

Pu Modi chuan Namami Gange hnuaiah hian cheng vaibelchhe 30,000 aia tam senna tur project te chu a then thawh mek a nih laiin a then chu zawhfel tawh an ni a.  Heng project hnuaia hmalaknate avang hian Uttarakhand a sewage treatment capacity chu kum 6 kalta chhung khan a let li in a len belh a ni a ti.

Prime Minister chuan Uttarakhand chhung a Ganga luia luanglut tur tuichhe paihna/drain 130 chuang tiping tura hmalakna sawilangin a bik takin Chandreshwar Nagar drain chu Rishikesh a Muni Ki Reti a khualzin leh rafter te tan mit tikhamtu a ni a ti a.  Drain khar leh Muni Ki Reti a STP chhawng li sak a ni chu lawmawm a tih thu a sawi a ni.

Prime Minister chuan Prayagraj Kumbh a pilgrim-te leh Haridwar Kumbh thlawhtu khualzinte chuan Uttarakhand a Ganga lui fai leh thianghlim tak an hmu tawh dawn a ni tiin Pu Narendra Modi chuan Ganges a ghat za engemawzat cheimawi hnathawh leh Haridwar a riverfront changkang taka siam hnathawhte a sawi lang a ni.

Prime Minister chuan Ganga Avalokan Museum chu pilgrim-te hip tu tha tak anih tur thusawiin he museum hi Ganga kaihhnawih  kan hnam nunphung zia rang hriatthiam leh zualna atan a tangkai dawn a ni a ti.

Prime Minister chuan Ganges thenfai hnathawh bakah hian Namami Gange hian economy tihhmasawn leh Gangetic belt pumpui a environment humhalh hna pawh a thawk a ni a ti a.  Sorkar chuan huang zau taka Organic farming leh Ayurvedic farming promote tumin hma a lak thu a sawi a ni.

Prime Minister chuan project-te hian kumin August ni 15 a puan Mission Dolphin hmalakna pawh a tichak dawn a ni a ti.

Prime Minister chuan tui kaihhnawih a hmalaknate chu ministry leh department hrang hrang mawhphurhna hnuaia awm an nih thin avangin hei hian inkaihhruaina mumal leh thawhhona mumal a awm tir thei lo thin a.  Hemi avang hian irrigation leh tui thianghlim intur kaihhnawihah harsatnate a la awm chhunzawm reng a ni a ti a.  Ram zalen kan nihna a rei tawh thusawiin heti chung hian kan ramah hian chhungkaw vaibelchhe 15 chuangin pipe hmang tui connection an la nei lo a ni a ti.

Pu Modi chuan Ministry of Jal Shakti chu thawhhona tha zawk a awm theihna tur leh harsatna hrang hrang chingfel tura din anih thusawiin tunah hian he ministry hian ram pumhuap a in zawng zawng a pipe hmanga tui intur pe turin hma a la mek a ni a ti.

Jal Jeevan Mission hnuaiah hian nitinin In nuai khat velah pipe hmanga tui connection pek ziah anih thusawiin vawiinah pawh hian in nuai khat vel chu pek thar an ni a ti a.  Kun khat chhung lekin chhungkhua vaibelchhe 2 hnenah tui intur connection pek an nih thu pawh a sawi a ni.

Uttarakand State Sorkar chuan thla 4/5 kalta chhung Corona hripui len hluar laiin chhungkaw sing 5 chuang hnenah tui intur connection a pek thusawiin fak awm a tih thu a tarlang a. 

Prime Minister chuan a hma a programme te ang lo takin Jal Jeevan Mission chuan bottom to top approach a hmang tih thusawiin a hmangtu mipuite leh Paani Samitis (Water Commitee-te)  chuan an khawchhung tan a project pumpui a kalpui,  a enkawl leh a buaipui zawng zawng an ti vek a. Mission hnuaiah hian tui committee member zing a 50% aia tlemlo chu hmeichhia an ni a.  Vawiin a Mardarshika Guidelines tlangzarh hian tui committe leh Gram Panchayats te chu thuthlukna dik siamthei tura a kaihhruai ngei a beisei thu a sawi a ni.

Prime Minister chuan kumin October ni 2 hian Jal Jeevan Mission hnuaiah ramchhung sikul leh Anganwadi zawng zawngte'n tui intur connection an neih vekna turin special 100-day campaign hawn a nih tur thu a sawi a.

Prime Minister chuan Sorkarin tunhnai khan loneitute,  industrial labour te leh health sector tan reform lian tham tak a kalpui thu a sawi a. 

Pu Modi chuan heng reform te hi dodaltu an awm chu pawi a tih thusawiin a dodaltute hian chhan mumal tak pawh nei lovin an dodal a ni a ti a.  Kum tam tak chhung kan ram a ro lo rel tawhtute khan kan rama hnathawktute, thalaite, loneitute leh Hmeichhiate dinhmun chawikan an ngai pawimawh ngailo a ni a ti.

Prime Minister chuan heng mite hian loneitute chu ramchhung khawi hmunah pawh hlawk zawk a an tharchhuahte an hralh an phalsaklo a ni a ti.

Primw Minister chuan Sorkar hmalakna hrang hrang Jan Dhan Bank Account-te,  Digital India Campaign-te,  International Yoga Day te chu mipui tam zawkin an chhawr tangkai chungin mi thenkhatte chuan an dodal tho a ni a ti.

Dodaltute hi Air force tunlai zawka tuaithar leh fighter planes changkang zawk neih dodaltute tho an ni tih thusawiin heng mite vek hian Sorkarin armed forces a pensioner-te chu arrear angin cheng vaibelchhe 11,000 chuang a pe tawh chungin Sorkar One Rank One Pension policy pawh an dodal a ni a ti.

Surgical strike sawiseltu pawh mi tlemte an awm thusawiin sipaite hnenah surgical strike a awm ngei a ni tih finfiah turin an ti a. Hei hian rampum hmaah an thil tum leh rilru dik tak a pholang chiang hle a ni a ti.

Hun a lo kal deuh hnuah hetiang a dodaltute leh lungawilohna lantirtute hian awmzia an nei lo chho ve mai thin a ni a ti.

- PIB Aizawl