NIFAA-in Health Minister hnenah chawimawina thuziak hlan

Aizawl | September 22, 2020: National Integrated Forum of Artists & Activists (NIFAA) Mizoram Chapter chuan nimin khan Health & Family Welfare Minister Dr. R. Lalthangliana hnenah COVID-19 dona kawnga hna a thawh that avangin chawimawina thuziak, a pisa-ah an hlan.


Health & Family Welfare minister chuan chawimawina dawn chu a phulo tih sawiin, a mimal hnathawh that vang ni lovin, Zoram mipuite leh khawvel hmun hrang hrang atanga Pathian hnena kan tawngtaina luang khawmin a hrinchhuah, Mipuite, Sawrkar mi leh sate, Fronline Workers, Volunteers, VLTF/LLTF, kohhran leh tlawmngai pawl zawng zawngte thawhhona rah in a hrin a nih vang zawkin an aiawhin a lo pawm a ni tih a sawi.

Health Minister chuan COVID-19 dona kawngah tumah kan ralbang lova, Mizoram Governor Pu P. S. Sreedharan Pillai-an min ngaihvenpui em em a, hmanhmawh taka sum hman a tul thin avangin Chief Minister Pu Zoramthanga'n rang taka hma min laksak thin avang leh min kaihhruai avangin kan hmingtha a, Minister leh MLA zawng zawngten thahnemngai takin hma min lakpui bakah Chief Secretary kaihhruaina hnuaiah sawrkar department zawng zawngin tha takin hma an la bawk a, tlawmngai pawlte leh kohhran thlengin theihtawp kan chhuah tlan avangin COVID-19 in mipuite a nghawng dan an zirchianna ah pawh India rama State hlim ber leh lungawi bera thlan kan ni a, hei dinhmun hi hloh lova chang reng tura tan la zel turin mi zawng zawng a sawm nghal a ni.

National Integrated Forum of Artists & Activists (NIFAA) te duhsakna hlanin, mipuite fimkhur zui zel turin a chah a, a bik takin kum upate leh natna benvawn neite fimkhur tura chah nawnin thlai zawk leh eizawng tura fehchhuak thinte pawh theihtawpa fimkhura mahni inchhungkhura he hripui seng lut lo tura invawng uluk zel turin a chah bawk a ni.



National Integrated Forum of Artists & Activists (NIFAA), Mizoram Chapter hruaitute chuan India ram State zawng zawngah an inzarpharh thu sawiin an kum 20-na denchhenin COVID-19 dona kawnga tithate nimin hian State tinah chawimawina hlan an nih thu an sawi a, State tinah mi pakhat hnenah theuh chawimawina hi hlan a nih thu sawiin Health Minister chu hripui leng karah Mipuite chi-ai lo leh an sahimna tura a hnathawh that avang leh kawng hrang hranga a hmalakna a chhuanawm an tih vanga he chawimawina hi hlan an nih thu an sawi a ni.

National Integrated Forum of Artists & Activists (NIFAA) hi kum 2000 khan din niin Karnal, Haryana ah Headquarters an nei a, Mizoramah hian Kolasib tih loh district 10 ah an ding tawh a. Vantlang tana tangkai turin kawng hrang hrangin hma an la thin a ni.

Post a Comment

0 Comments