MLA Dr BD Chakma ‘refer’ tum lo

Aizawl | September 26, 2020: MLA Dr BD Chakma, Covid-19 vanga enkawl mek, Mizoram pawna ‘refer’ diltu chu Mizoram sorkarin ‘refer’ a tum lo tih thu dawn a ni.

BD Chakma hi a swab sample enfiah niin, a positive avangin September ni 13 khan ZMC-ah dahluh a ni a, a awmna hmun a sawisel avangin MLA Hostel, CCC atana buatsaihah a insawn tawh. Tih dan phung pangngaiin Covid-19 vanga enkawl a nih avangin RT-PCR hmanga endik a ni leh a, September ni 24 khan a result hi chhuakin, a la positive a ni.

September ni 13-a a result a hriat tirh atanga Covid-19 natna a vei inring lo BD Chakma hian September ni 24-a a result pawh a la ring lo a, he natna hi a vei a rin loh avangin Mizoram pawna ‘test’ tura ‘refer’ turin sorkar-ah a dil a ni.

Health & family welfare board vice chairman Dr ZR Thiamsanga, MLA chuan ‘refer’ tum a nih loh thu The Aizawl Post a hrilh a, “Han refer ngawt dan tur a awm lo a ni,” a ti.

Dan leh kalphung a awm thu leh Covid-19 natna veite enkawlna chungchangah pawh dan a awm thu a sawi a, miin a result a awih loh avanga state pawna inentir tura ‘refer’ ngawt chu a kawnghmang lo tih a sawi.

“Pu BD Chakma hi, a zahawm a, mahse a result a awih loh vanga refer chu thil nihphung a ni lo a. Mi dangin an result awih lo ve se kan refer zel dawn em ni ang?” a ti a, “Refer ta ila, mipui pawhin mak an ti ang. Dan a awm a, tihian a negative hunah a chhuak mai dawn a, a negative thuai pawh a beiseiawm a, chutiang tur chuan kan duhsak a ni,” a ti bawk.

Mizoram pawnah kal ta se Mizoram ang bawkin RT-PCR hmang thovin an lo en dawn tih a sawi a, thil thar leh thil danglam han tih tur a awm chuang lo tia a sawi bakah, miin swab sample endikna result a rin loh vang ringawta refer a dilna tihhlawhtlin chu thil kalphung a ni lo tiin a sawi.

“Kan laboratory leh thawktute kan ring tawk a, kan doctor-te kan ring tawk a. Kan laboratory hi ICMR-in a pawm thlap a, hetiang bak hi a awm chuang lo,” Dr Thiamsanga chuan a ti.

Tuichawng bialtu MLA Dr BD Chakma hian ZMC atanga insawn a dil chhan pakhat chu, a awmna hmuna awm vein Covid-19 lanchhuahna natna a nei nasa a, symptom nei leh nei lo awm dun a dik lo tih a ni. Mahse a bula awm ve dam lo hian symptom a nei lo tih thu dawn a ni a, Zirtawpni khan damin a chhuak tih thu dawn a ni bawk. ZMC-a a awm chhungin symptom hi a nei lo tluan tih doctor-te chuan an sawi.

- THE AIZAWL POST