Lawngtlai | September 3, 2020: Vawiin khan Lawngtlai Chief Medical Officer (CMO) Dr LC Liana hovin CMO Conference Hall-ah Mizoram Journalists' Association (MJA) Lawngtlai District member-te tan COVID-19 hri leng mek chungchanga hriat tur pawimawh hrang hrang zir hona (workshop on COVID-19) buatsaih a ni.
He workshop-ah hian Lawngtlai CMO Dr LC Liana chuan powerpoint presentation hmangin COVID-19 hri leng chungchanga hriat tur pawimawh hrang hrang a sawi fiah a. COVID-19 hri leng kaihhnawihah thuthang chi hrang hrang mipui tichi-ai thei a leng nasa hle a, chuti ang kara thu dik leh belhchian dawl theh darh turin journalist-te chuan thu dik tak an hriat a pawimawh a, chumi avanga workshop pawh chu buatsaih a nih thu a sawi.
He hunah hian COVID-19 chungchang leh a dona leh enkawlna kawnga Indian Council of Medical Research (ICMR) leh Mizoram sawrkarin inkaihhruaina a siamte zir ho a ni a. Zawhna leh chhanna leh sawi hona hun hman a ni bawk.
Dr LC Liana chuan Mizorama rawn lut tur bungraw phurtute chu ramriah ngun taka lo enfiah vek an nih avangin Lawngtlai an rawn thlenin hlauhthawn tur a awm lo va, an bungrua atang paw'n hri kai hi hlauhthawnawm a ni lo, a ti a. Chutih rualin hri laka kan him nana sawrkarin inkaihhruaina a siamte erawh tha taka zawm a pawimawh a ni, a ti.
- DIPR
Post a Comment
He post chungchanga i ngaihdan lo sawi ve rawh: