Aizawl | Sept 17, 2020: Tun hnai Chanchinthar leh Social Media hrang hranga lo lang Mizoram Police ten Myanmar ramri Archhuang-a dan lova Mizorama phurh luh Kuhva rah bag 550 an man chu Siachangkawn-ah Assam Rifles duty ten an lo man nawn leh ni awma thuthang awm chu chhuichiang mekin Mizoram police chuan thil awmdan an tarlang.
Heng kuhva rah te hi Archhuang Primary School leh Anganwadi Centre ah thlahnih chuang dah tawh ni in Covid Lockdown avangin an phurhchhuah theihloh thu leh School tan a hnaih tawh avanga phurchhuak tura an ngen angin Kuhva rah neitu te hian OC Sangau PS hnen ah a phurhchhuahdan kawng ah tanpui turin an ngen a. OC Sangau PS chuan SDPO Lawngtlai phone-a a biak hnuah SDPO Lawngtlai thupek angin Local Task Force ten anlo tihbuai lohna tura Lehkha siamsakin heng kuhva rah te hi Archhuang atangin a neitu te hian an phurchhuak ta a ni. He an kuhva phurhchhuah hi Siachangkawn-ah Assam Rifles ten an lo man ta a ni.
OC Sangau PS hian heng kuhva te hi a man lova, Police Station General Diary- ah pawh engmah ziahluh a ni lo in Seizure memo pawh siam a ni lo bawk. OC Sangau PS hi hetianga dan in phal loh bungrua man lova a phurhchhuahna kawnga alo puih avangin September 15 atang khan suspend nghalin departmental enquiry lak mek a nih thu Mizoram Police chuan an tarlang.
He thil thlenga thil awm dan chhui mek zel a ni a. Hemi chungchangah hian SDPO Lawngtlai pawh Advisory memo pek a ni a, a inhnamhnawih dan kimchang pawh chhui mek niin a tul anga action lak a ni dawn a ni.
Post a Comment
He post chungchanga i ngaihdan lo sawi ve rawh: