Chief Minister leh FOCUS hruaitute inkawm

Aizawl | September 29, 2020: Nimin khan Chief Minister Pu Zoramthanga chuan a pisa ah FOCUS (Fostering Climate Resilient Upland Farming System in the North East) hruaitute chu kawm in, an hmalakna leh kal zel dan tur an sawiho.



FOCUS hi United Nations agency pakhat International Fund for Agricultural Development (IFAD) hnuaia project niin, sik leh sa inthlak nasa global warming leh climate change khawvelin a tawn mek hrula hmasawnna hna thawhna tura ruahman a ni a. Sik leh sa inthlak danglam nasain kan eizawnna ber thlai thar leh tlangram lo neih a tihbuai chhoh mekah lo neitute kawng kawhhmuh a, technical guidance pe turin FOCUS hi din a ni a. June ni 28, 2017 khan Mizoram sawrkar leh IFAD Project Design Completion Mission te chuan sawihona nei tan in, January ni 25, 2018 khan project agreement ziah a ni. District 4 (Champhai, Kolasib, Serchhip leh Mamit) a huam a, khua 272 an awm mek rih a ni.

FOCUS project hian a tum ber chu thingtlang lo neiha eizawng chhungkaw 64,500 ten thlai hlawk zawka an thar chhuah theihna tura tih hmasawn leh kum tin lo hal avanga sik leh sa inthlak danglam nasa lutuk tih ziaawm a ni a. Zawi zawia tlang ram lo vah leh lo hal kalsan a, sik leh sa mil a thlai kum hlun hmanga lo neitute sum dehchhuah tih pun a tum a ni. He Project hi hlawm 3 a then a ni a, chung te chu - thingtlang lo neih tih hmasawn, man man zawka ran leh thlai thar chhuahte deh ral theihna tura ruahmanna siam leh, project management leh thiamthil inzirtirna te a ni a.

IFAD atangin FOCUS Project atan hian loan US dollar maktaduai 35.30 ruahman a ni a. FOCUS project hian Agriculture, Horticulture, Animal Husbandry & Veterinary Department leh Land Resources, Soil and Water Conservation Department-te a huam a. Agriculture Department hi nodal department a ni. Chief Secretary kaihhruaina hnuaiah Governing Council awmin, Agriculture Commissioner & Secretary chu Co-chairman a ni a. Member ah AH & Vety, LR,S&WC, Planning, Finance, RD&PR leh Revenue department secretary te, PCCF leh district pali DC te chu member an ni a. SPD, FOCUS-Mizoram chu member secretary a ni.

Chief Minister chuan ei tur state kan intodelh hi kan ngaihpawimwh hmasa ber tur a ni tih rilru ah pu reng chungin theihtawp chhuah a, ram tan thahnemngai taka hma la chhunzawm zel turin FOCUS member te chu a chah a ni.
Nimin  vek khan Chief Minister hian Zarkawt Community Hall sak lai mek chu a hmunah a enfiah bawk a. Local Council hruaitute leh a sak hna thawktuten an tawiawm a ni.

Post a Comment

0 Comments