Champhai DSYO bultumin thisen pek runpui buatsaih

Champhai | September 17, 2020: District Sports & Youth Office, Champhai bultumin District Hospital, Champhaiah vawiin khan Voluntary Blood Donation Camp buatsaih a ni.  Thisen pek runpui hawnna puala inkhawm tawi buatsaih  hi Pu Lalnunmawia, Chairman, District Sports Committee (DSC) chuan Khuallian niin a hmanpui a ni.

Pu Lalnunmawia chuan District Sports & Youth Officer remhriatna leh thahnemngaihna hmanga Voluntary Blood Donation Camp buatsaih ani thei chu lawmawm a tih thu a sawi a. Kum dang angin Sports discipline hrang hrangah intihsiakna huaihawt anih theih loh laia nunna chhanna tura thalai infiammite'n an thisen hlu tak an pe tur chu fakawm a tih thu sawiin, thisen pe tura kalkhawmte ei leh in senso buaipuina atan District Sports Committee hmingin pawisafai Rs 3,000/- a hlan nghal a ni.

Dr. Zatluanga, District Medical Superintendent chuan  District Hospital-ah ani tela thisen mamawhna san ve tak zel thu leh  Doctor-te ngei pawhin  thisen pekah tan la nasain mi thahnem takin thisen an pek thin thu a tarlang a.  Thisen pek hi hriselna dinhmun  enfiahna tha tak anih thu sawiin, thisen tlachham lova Blood Bank-a dah anih theihna chhan chu mi tlawmngaite inpekna vang a ni,  a ti a. Vawiin thlengin khawvelin thisen a la siamchhuah theih loh avangin mi inphalte pek hi thisen mamawh tute'n an dam chhan a ni tiin,  thisen pe tura kalkhawmte chu  midangte tana entawntlak ni zel turin duhsakna a hlan a ni. 

He hun hi Pu Obed Lalmalsawma, DSYO Champhai chuan a kaihruai a. Inkhawm tawi hi Pu Lalbulliana, Football Coach chuan lawmthu sawiin a khar a, thisen pek runpui tan nghal a ni. 

District Sports & Youth Office bultuma thisen pek runpui neihah hian Sports discipline 6  atangte, College Zirlai, mi inphal tak takte leh DSYO Staff te’n thisen an pe a. Hripui leng mek avanga awmkhawm theih anih loh avangin thisen pek tumte chuan  a tahtawl zelin  District Hospital  Blood Bank  panin thisen an pe a ni. Vawiin DSYO Office bultum Voluntary Blood Donation Camp-ah hian Mipa 74 te’n  thisen Unit 74 an pe a ni. Champhai District Football Association (CDFA) chuan DSYO Office hnenah hian vawiina an senso tumpuina atan  Rs 2,000/- an hlan bawk a ni.