VC/LC inthlan puan dan hi a mak hle - ZPM President

Aizawl | August 10, 2020: Zoram People Movement (ZPM) president Lalliansawta chuan inriini khan thutharthehdarhtute kawmin, "Tun tuma sorkarin Mizoram State Election Commission kaltlanga VC/LC inthlan a buatsaih danah hian, mak tih tak tak kan nei a, VC/LC inthlan puan (Aug. 5) rualin nomination koh nghal a ni a, August ni 11-ah khar leh a ni. A karah public holiday ni hnih Inrinni leh Pathianni a tla a, inbuatsaih hun ni nga chiah a awm. Nomination koh hnua RO ruat chawp te pawh a awmin kan hria." a ti.

ZPM president chuan, "Heti chuk chuka VC/LC thlan buatsaih hi a awm ngai lo. Sorkar hi mipuiin an hre chiang telh telh a, hriat chian lehzual hma an chuh ni berin kan hria. August ni 4 ah SEDP an sem a, ni 5 ah VC/LC inthlan an puang." a ti bawk.

"Hripui leng khawlaiah a darh tan a, khaw lian leh khaw te hmun tam takah total lockdown puan mek a ni. Chutih laia VC/LC inthlan puan luih hi, mipuite harsatna tawrh mek sorkarin a hre lo niin kan hria. Polling Booth leh Polling Party zawng zawngte PPE-a thuam vek turin kan phut a ni." a ti a.

ZPM president chuan, Tuipuiral mipuite lirnghing vangin an chiai mek a, hmun him laia an hriatah puan-in kaihin an riak khawm mek a ni. Ei bar zawng tura hna pawh an thawh theih loh laia VC inthlan han puankhum hi thil mak a tling. Mihring inlainatna (humanitarian ground) vang chauh talin, Tuipuiral khuate bik tan, VC inthlan hi hun hran ruat sak ni tal se a that kan ring." a ti bawk.

"Tun VC/LC inthlanah hian ruling MNF leh Congress leh ZPM-te inthlur fal tura ngaih a ni. Tun hma lama tihdan ngai lohin recognised party-ten an party symbol chu common symbol atan an hmang ang. ZPM hi Recognised party a la ni ve lo a, ECI ah Registered Party kan ni. Common symbol hman phalna kan dil a, State Election Commission-in Common Symbol hman min phalsak ta a, Free Symbol zinga mi KHUMBEU kan thlang fel tawh a, MSEC chungah kan lawm hle a ni. Chutih laiin, candidate tinte ECI Registration Certificate thil tel tura tih kan ni a. Hripui vanga khaw tam tak inkharkhip vang te, inkalpawhna kawng chhe lutuk vanga transport service mumal loh vang tein, ECI Registration Certificate hi khaw tinah thawn thlen hman rual a ni lo. Hei hi hre fuhin, ZPM-in harsatna a tawh theih dan tur hisap ranin VC/LC inthlan hi MNF sorkar hian hmanhmawh takin a buatsaih niin kan hria. SEC-ah kan dil leh ang a, mipuiten an duh an thlanna dal lo tur zawngin kawng min dappui leh theih ngei kan beisei." a ti a.

"Ruling MNF party-ten VC/LC candidate an zawnnaah, an mi duh zawng nawrna atan, an lamhnai sorkar hnathawkte tawng chhanah an hmang nasa hle. An chhungte sorkar hnathawkin sorkar kut an tuar mai ang tih an hlauh vanga candidate hnar ngam lo, tui lo chunga ding tur te pawh an awm tih kan hria. Hetiang em ema politics chhia leh tenawm hi Mizoramah a la thleng ngai lo a, a pawi takzet a, tun hnuah thleng tawh ngai lo se kan duh." tiin a sawi bawk.

"September ni 1-ah Assembly Session a awm leh dawn a, chhan loh theih loh zawhna te, sawiho loh theih loh resolution-te a awm leh ang. Mipuiten tapchhak zawl atangin TV-ah kan lo thlir leh ang. MNF sorkar hian Assembly Session hi a huphurh ngawih ngawih vangin, VC/LC inthlan pawh hi Assembly Session hma ngeia neih ngei a duh a, khuarel chhiatna vanga mipuite harsatna tawrh mek pawh a hmu phal lo ni berin kan hria." tiin a sawi a, "15th Finance Commission chuan 2020 - 2021 report-ah khan, Mizoram VC-te pualin sum cheng vaibelchhe 93 a rawn dah hrang a, state sorkar zenpui theih loh turin, khaw tin chan tur pawh then fel vek a ni tawh. State sorkar pawhin State Own Tax Resources (SORT) atangin 15% chu VC-te insem turin a dah ngei tur a ni bawk. He kalphung hi sorkarin a zawm em tih kan veng tlat dawn a, khaw tina sum sem dan tur kim pawh a buin kan kawl tawh. Ruling VC nih vanga hamthat fal bikna tur a awm tawh lo. VC member atan ruling mi nih vang ni loin, mi rinawm apiang thlang ila, khua/veng tan a fuh ber dawn." a ti bawk.

Post a Comment

0 Comments