Mizote hi ‘Indigenous People’ Kan ni em?

- K Remruatfela

A thupuiah hian Saptawng telh loh hram chu ka duh na a, kan tawng hi duh anga a la hausak tâwk loh vangin lohtheihloha telh ngaih châng a awm lo thei thin lova. Chuvangin, tun tumah pawh hian Saptawng ka rawn telh zeuh zeuh dawn a. Chhiartute hriatthiamna ka rawn dil hmasa e.

Mizote leh kan tlângmi puite hi *‘Indigenous People’* kan ni em tih chungchang hi _“Global Movement on Indigenous Peoples` Right: A case study on North-East Scheduled Tribe People”_ tih thupui hmangin Research paper ah ka lo hmang ve tawh a. Ka theih ang tâwk chuan ka chhui ve nasa hle a. Amaherawhchu, hun a tepter em avangin ‘Doctrinal Research’ _(Lehkhabu rinchhan chauha chhui)_ niin ‘Empirical Research’ _(A hmun ngeia zuk finfiah)_ ka nei hman ta lo va. Mizorama rawn chuan haw hunah heti lama ngaihtuahna zawng zawng lo sêngtu ‘Pu R.Thangmawia’ ka kâwm ang a, ka titipui thin ang tiha ka thlir lai takin Geneva hmun ngeiah a martyr pui tih ka han hre phut mai chu, a hunlo ka tiin a pawi pawh ka ti em em a. A thih hlimchhâwn khan he article hi thailan ka tum viau a, mahse lusun hlimchhâwna han tial zui vak kha fello deuhah ka ngaih tak avangin tun tumah hian ka lo tlai lam um pâwng par leh ta zâwk mai dawn a nih hi!

‘Indigenous People’ tih hming hrim hrim hi hrilhfiah dan hrang hrang a awm a, 2+2=4 tih ang tawpa sawifiah theih pawh a ni chiah lo. Amaherawhchu, hrilhfiahna dang zawng zawngte nena khaikhina khawvelin a pawmtlan ber ni-a lang chu ‘UNWGIP’  (UN Working Group on Indigenous People) in a hrilhfiahna hi a ni:

_'Indigenous population are composed of the existing descendants of the peoples, who inhabited the present territory of a Country wholly or partially at the times then person of a different culture or ethnic origin arrived there from other parts of the world, overcame them and, by conquest, settlement or other means, reduced them to a non-dominant or colonial condition, who today live more conformity with their particular social, economic and cultural customs and traditions than with the institutions of the Country of which they now form part, under a State structure which incorporates mainly the national, controversial, in that assertions of the ‘romanticized continuity demanded by western history’, risk the same objections as the constructed narratives of others nations, and invites ‘sceptical reconsideration ‘in due course.'_

An hrilhfiahna atanga a landan chuan ‘Indigenous People’ te chu hnam hnuaihnung, hnam chak zâwk leh lian zâwkte laka awpbeha awm, chu awpbehna vanga an hnamzia leh sakhaw thilte pawh hmang chhunzawm tha hleithei tawh lo; amaherawhchu, tun hma, awpbeha an awm hmaa an hnamzia, sakhua leh nunphung hrim hrim la ngainaa, lunglenna la nei, la chawivul zel duh, mahse an dinhmunin a zir tâk si loh avanga chawi nung thei tawh si lo te hi an ni a. Heng dinhmun rip taka awmte hi UNO pawhin a ngaipawimawhin chhanchhuahna kawng a dappui nasa em em a. Kum 1993-na atang phei kha chuan a zâwn zatin kum 10 chhung chu ‘International Year of World Indigenous Peoples’ ah a puang hial a. Ni 13 September, 2007, phei kha chuan an zalenna meichher chhit en saktu ni turin ‘United Nations Declarations on Indigenous Peoples’ (UNDRIP) chu a din ta rup mai a nih kha!

Chutihlaia, thil ngaihtuah ngun ngai tak erawh chu keini Mizote leh North East Tribal dangte hi he UNO in ‘Indigenous People’ a tih tak zingah hian kan tel ve ngei em, tih hi a ni. A nihna ang tak chuan ‘Scheduled Tribe’ tih leh ‘Indigenous’ tih hi thil thuhmun ni chuan a lang a; amaherawhchu, he UNWGIP in ‘Indigenous People’ ti-a a ngaihtuahna rilruah hian keini Mizote hi kan tel ve pha ang em, Mizote hi India Constitution hnuaiah hian awpbeh kan lo ni reng em tih hi zawhna pawimawh tak, ngaihtuah ngun ngai tak a ni.

Mizote leh kan tlangmi puite hian Art. 242 (2) in a sawi angin ‘Sixth Schedule’ hnuaiah ‘Autonomous District Council’ kan nei a. _(Tun thleng pawhin Mizoram ngeiah pawh District Council pathum kan la nei)_. Tin, State puitling kan nih hnuah pawh India Constitution hnuaiah inhumhimna kulhbing sang, Special Provision ‘Art. 371G’ kan la nei cheu a. Hei hi a awmzia tak chu _‘Kan Sakhua emaw kan hnam ze thil emaw khawih thilah chuan Sawrkar laipuiin Mizoram Legislative Assembly te remtihna lo chuan engmah a lo inrawlh thiang lova, chung thilah chuan Central Act reng reng chu Legislative Assembly in resolution an pass te a nih loh chuan Mizoram chhungah hman theih a ni lovang’_ tihna a ni. 

Heta tanga thil langchiang em em ta chu Mizote hian India Danpui hnuaiah hian kan hnamzia leh sakhua humhim turin thuneihna sâng tak kan nei a. UNO in ‘Indigenous People’ a sawihote nen chuan kan inang lovin kan danglam deuh si chu a ni. Chumi a nih vang chuan Mizote hi UNO rinchhana la independent maithei tur anga kan insawihmuh fo hi chu innghah rengna tlâk a ni ang em le? Chhiartute chhânna ka lo nghâk reng e.




(A hnuaia fakna hi lo hmet ve rawh.)

Post a Comment

1 Comments

  1. Naga leh Khasi hi ka hmu a, Mizo ang tak chuan indigenous tribe ah kan awmlo niin a lang. Amaherawhchu ZORO lam kham hmalakna nei anga sawi kha a awm a. A definition en khi chuan kan tel chiahlo niin a lang bawk si. Mahse Minority leh Tribal kan nihna lai ah hian kan in huam tel tir tihna nge ni ang aw tih te erawh min ngaihtuah tir. I zawhna tak ka chhang thei chiahlo na in ngaihtuahna erawh a kal thui angreng viau. Keini Independent lamtluang hi a thui hmel hle in ka hre ve a

    ReplyDelete

He post chungchanga i ngaihdan lo sawi ve rawh: