Khawvel tawp hun a hnai em? Juda sakhaw puithiam Rabbi-in Bible a thil inthup "Bible Code" hmanga zir chuan Khawvel tawp hun tur te, Coronavirus pawh Bible/Torah in "ei thiang lo" a tih sa ațanga lo chhuak a ni, tih thu a sawi ta tlat mai.
The Bible Code, Torah Code an tih bawk hi i hre tawh ngai em? Hebrai țawnga Bible original thu (text) ațanga hawrawp mal mal awmzia leh kawngkal fel tak neia lak chhuah a, thu awmze neia chantirna hi a ni. Hetiang zir bingna hmang hian thu inthup, khawvela thil lo thleng tur leh thleng tawh tam tak te hailan a ni tawh, chung zingah chuan Donald Trump US President a thlan tlin anih tawh dan pawh a tel bawk.
Kristian leh Juda te hian Bible a Mosia lehkhabu panga te hi an ințawm a, heng bu 5 te hi Hebrai hoin Torah an tih chu a ni.
Puithiam, Rabbi, Mathematician, professor tam takin Hebrai original text ațang hian Pathianin mihringte hnena hriattir leh puan chhuah a duh a ziak pangngai mai ațanga hriat theih loh tura thup tlat , thuruk inthup (hidden code) hi awmin an hria a, chung thu inthupte hai chhuak leh hre tur chuan kum za tam tak chhung an lo zir tawh a. Hawrawp mal te te awmzia leh kawng kal dan mumal taka thur chhuakin thu awmze nei leh sawi leh kawh bik nei, hma lam hrilhlawkna atan an chher chhuak țhin a ni. Kum 2015 khan film siamtu Richard Shaw chuan "The Torah Code: End to Darkness" tih film a siam tawh a ni.
Rabbi ( Rabai tia lam tur zawk mah a ni awm e) Matityahu Glazerson hma lama sawi tak film The Torah Code film a lang chuan a thil zir chianna ațanga Khawvel thil lo thleng tur a hmuh chhuah thar te You Tube lamah a hlanglut țhin a. Kumin January thla lam khan Coronavirus chungchang pawh hi Bible/Torah ah a awm ngei thu leh thil thar tam tak a lo sawi tawh a ni. Chung zingah chuan thil zawrhna hmun (dawrpui) ațanga Coronavirus darh tur chungchang te, sazu, rul, bak leh saphu ațanga darh a ni tih sawi chungchang chu Rabbi Glazerson chuan Leviticus lehkhabu ațanga la chhuakin, heng sa te hi mihringte ei atan "thianghlim lo" anih thu a sawi.
Bible Code zir bingna lama mithiam ( scholars) te hian an thil zirna atan an hmanraw hman țangkai ber chu Hebrai Bible/Torah chhunga thil inziak hawrawp mal mal awmze nei, a hlat dan inang kawngkal fel taka lawrkhawm -- Equidistant Letter Sequence (ELS) hi a ni.
ELS hmang hian Hebrai hawrawp chu an han la chhuak a, " kuf, reish, vav, nun" -- corona tihna a lo chhuak ta a.
ELS hmang tho hian "vav, yud, reish, vav, samech" - virus tihna a lo chhuak leh a.
Hawrawp dang " alef, bet, reish, men, het, yud" la chhuakin thu "eivev mehai" a lo chhuak a, chu chu "thil nung fuke ațangin" (limb from living)
tihna a lo piang leh a ni.
"Torah in chiang taka a sawi chu "ei thiang lo" a tih zinga mi a ni a, thil thianghlim lo lak ațangin ka thliar hrang che u a, chuti chuan ka mi thianghlimte in ni ang" tih anih kha Rabbi chuan a ti.
Rabbi hian a sawi zel dan chuan Bible/Torah Code ațang hian 'Iran Atomic' tih thu pawh kumin kum bul lam khan a hmuh chhuah thu a sawi a, chu chu Hebrai Calendar kumah chuan 5,780 a ni.
Rabbi Glazerson hrilhlawk dan chuan hun tawp hi kum 2021 hi niin a sawi a, chu chu Leviticus lehkhabu ațanga a hmuh a ni tih a sawi. "A ngaihnawmin a pawimawh hle a ni" tih thu a sawi.
Messia lokal hun tur hi kan hre thuai dawn, Israel te dotu leh hmelma chu Messia hian a rawn nuai chimit vek ang a, mei leh kăt hmangin an kangral dawn a ni. Chutih hunah chuan, Khawvelah hian inrem lohna, innghirnghona a awm tawh lo ang, " a ti.
Bible/Torah Code zir bing (researcher) te hian computer software SofSofTorah Dr. Alexander Roetenburg, mathematics PhD leh Computer scientist Prof Robert Haralick te duan chhuah an hmang a, hei hi a țangkai hle niin an hria. Pathianin mihring te hnena puan chhuah a duh, a thu ziak pangngaia inthup leh hriat theiha lang chhuak si lo, finna leh thiamna bik hmanga chu thu ruk inthup thur chhuah thiam theihna atan computer pawh țangkai takin an hmang a ni.
Rabbi Glazerson chuan kum 2016 ațang tawh khan hun tawp, Khawvel tawpna chu a ințan tawhah a ngai a, chu chu kum 2021 hian a tawpna a thleng dawn niin a ngai.
Dr. Eliyahu Rips, Torah Code researcher leh hetiang zirna atan computer hmang hmasa ber chuan tun hma deuh khan hetiang hian a lo sawi tawh a. "Hetiang hmang hian mi tumah kan bum a thiang lo a, a awmzia leh a kawh tum leh laihlan a tum hi kan hre fiah hle a, hemi hmanga thil sawi hi a dik a, a tak a ni," tih thu a sawi.
Bible/Torah Code an zir dan hi kil li nei (diagonal strips) a ni a, original Hebrew text ațang chauha zir a ni.
HEI VE THUNG HI LE
Hetiang hian Bible Code hmang emaw thil dang hmangin emaw pawh Khawvel tawp hun tur chungchang te, thil mak pui pui, eng hnam pawhin sawi se, "thu tawp neitu Pathian lo chuan" tih zawk hi a pawimawh ber chu a ni.
He thu hi a ngaihnawm ve hranpa em a, veng chhung lockdown a ni bawk nen kan ziak leh ta chawt a ni e. Midangte sawi țhaihna atan hman phei chu a țha ber lo ang. Inring renga awm tura thu pek dawng vek kan ni tih erawh theihnghilh lo ang u.
Source :
express.co.uk
July 30, 2020
@ 11:43 GMT
====10===08 ==20 =
Huna Kawlvawm
(A hnuaia fakna hi lo hmet ve rawh.)
Ka ngaihdan chuan, bible thu hi a rintlãk ber e.
ReplyDeleteTin, he thu hi mite ngaihthlak theiha chhiar mi phalsak theih chuan, ka van lawm dawn em..!"
Post a Comment
He post chungchanga i ngaihdan lo sawi ve rawh: