Hripui kara Exam

- Vidpuia Hrahsel

MZU in Zirlaite hma hun dawn chungin, ngunthluk takin thutlukna an siam a. UG Exam chungchang bikah hian Exam Routine siam ṭhat ngun ber kum a ni hial ang. Zirlaite pawhin awmdan an thiamlo, zirtirtu te pawhin palh thil thu a, cho loh hripui kai palh thei kan nih zia hre reng chungin UGC Guidelines ang zelin fimkhur tak chungin Exam kalpui tlang an tum mek a. Tun aia hun khirh zawk hi tawng ila, exam theilo chho zel bawk ila, thiamna tak tak neilo degree in neih tir ta ila? tih chungchang hi ngaihtuah tham fe a ni awm e. Kum dang ang lo takin Hripui avanga kan buaina hre reng chungin Exam kalpui dan tur pawh 100 marks ni ṭhin kha 50 marks ah a sawn daih a ni. A thiam leh taima taka zir peih te tan chuan Exam zawh vat hi a chakawm tawh ngawt ang.



Ta se tih thu ringawt a innghah chu, kan boruak hmachhawn hian kian zai min rel san tih a awm thei si lova, boruak ngaichang chunga fimkhur taka Exam kal tlang a hmachhawn mai hi exam tur te hma hun atan a ṭha zawk a ni. Exam hun tur tih danglam reng hian Zirlaite ah nghawng a nei nasa khawp ang. Exam turin an han inbuatsaih a, boruak dang a rawn in lar leh a, ngaihchan a ngai bawk nen, exam tur te rilru ngaihtuahna hi a chau in a buai ṭhin khawp ang. An hma hun (future) tur ven duh si, exam tihchhiat hlau bawk, kum dang anga zir tura in nawr ngam chiah ni bawk silo, zirtirtute tán ngei pawh hian kan hun tawn hi a luhai thlak khawp ang. 

Thlirna tlâng dang aṭangin Zirlai thiam thei leh tumruh, taima taka zir char char te, rank holder nih tumte chuan Exam loh hi an ui ngawt ang! Lockdown hi March aṭanga ṭan a ni tawh a,  exam hi a thiam leh taima taka zir peih te tan chuan enghelh vak tur a awmlo. A  inthlahdah te tan chuan Nakumah pawh in exam dawn ta ila, kan huphurh tho ang. Exam vang hian hri a  inkai chhawn theih tih chu kan hre ṭheuh ang. Khawlai chhuah te, Bazar te, punkhawm na aṭang a kai theih tho, a kai theih dan a in ang reng. Exam duhlo, inti hlim tur leh duhzawng ti emaw lei tura chhuah hlau chuang miahlo kan lo ni hlauh palh ange! Exam nge kan hlauh Hri? tih hi inzawt nawn fo ang u. Lehkha kan zir hi kan thiamna atan ni se, exam pass na atan ringawt ni lovin. Bachelor/Master degree engpawh dawng tur chuan endikna paltlang angai. A hming mai a chawimawina degree (Honorary) ai chuan thiamna hmang ngeia endikna leh fiahna hmachhawn ngei hi a ngai a ni.

Exam hun sawn hi kan tun dinhmun thlir chung chuan a ngai a, sawn reng a ni bawk. Thutlukna nghet neihna chi a ni rihlo, thutlukna siam zung zung a rem lohna chen a awm bawk. Zirlaite rilru leh ngaihtuahna kan ti buai mai mai a, a hnu a hnuhdawh ngai leh ṭhin te avang hian a ṭul ang zel a ruahmanna siam hi a fing hle ang. A bik takin Aizawl hi han thlir ila, zirlai tam zawk hi Thingtlang aṭanga harsa taka thiamna neih tum a pan tu te an ni. Zirlai tam zawk tan chuan Exam chungchang ringawt ah pawh senso a buaithlak hle ang, tuilairap vekin thil a thleng lai tak hi a buaithlak lai tak a ni. Kan dinhmun thlir reng chungin MZU lam hian Exam hi ruahmanna ṭha leh fimkhur tak chungin Exam buatsaih se tih hi Zirlaite duh a ni.Exam hall-ah chuan inkar hlat in a ṭhut theih a, an chhanna an thehluh zawh veleh haw nghal se, he hripui hi kan hlau takzet a nih chuan, exam na hmun hall chhuah ruala titi vel hi chu a pumpelh thei khawp ang, a mihring a te zir hi a ni ve khawp mai. Exam bei tur zawng zawng te duhsakna sang ber ka hlan a che u.






(A hnuaia fakna hi lo hmet ve rawh.)

Post a Comment

0 Comments