G-20 RAM ZINGAH INDIA GDP TLA HNIAM NASA BER THEI DINHMUNAH A DING

Aug 30, 2020: India ram Gross Domestic Product (GDP) kumin tangka kum 2020-21 Quarter khatna April - June data puan a la ni lo a, G-20 ram zingah Coronavirus hri pui lengin a hnuh hniam leh hnung tawlh nasa ber thei dinhmunah a ding mek a ni. A chhan chu India ram hi hetih hun chhunga inkharkhip nasa ber ram leh ram chhung sum leh pai țhanna tura hna thawh leh chetvelna a awm mumal lo hle a, sumdawnna leh thil siam chhuahna leh hna thawh mumal a awm loh avangin mipuiten an thil mamawh leh duh zawng nitin ei leh bar leina atan bak sum an hmang tlem vang a ni.


National Statistical Office (NSO) chuan naktuk Thawhțanni hian April - June 2020 GDP data a ti chhuak dawn a, beisei a sang lo hle a, kum 1996 hnua quarterly data a tih chhuah țhin hnuah a hniam ber anih ngei a rinawm. 

April - June quarterly GDP report hi  UK chuan a ti chhuak tawh a, a hma kum Ist quarter nen a khaikhinin 21.7% in a hniam a, hei hi khawvel ram sum leh pai dinhmun țha zual 20 zingah a tla hniam nasa ber a, an ram sum țhanna tlak hniam nasat ber țum a ni. India hi hei aia nasa zawk hian a tlak hniam rin a ni a, naktuk lamah data chu a hriat theih ang. 

India ram nationwide lockdown kha   March 25 ațanga tih țan niin May thla tawp thleng a awh a, hemi hnu June 1 ațangin zawi zawia lockdown chu thlah dul țhen hret hret a ni . April leh  May thla chhung phei chuan sumdawnna zawng zawng khar vek a ni a, thil siam chhuahna lam pawh a mu țhup a, June thlaah chuan tlemin a zia chho leh hret a, kum danga thil siam chhuah leh sumdawnna nen chuan tehkhin chi rual chu a ni chuang lo ang.

 
Abheek Barua, chief economist, HDFC Bank, chuan India ram GDP chu a hma aia 21%  laia tla hniam leh sãwng te turin, tun  June quarter ah hian a ngai a, chu chu March quarter a 3.1%  țhanna ațanga tehin a ni. "Thil siam chhuahna lam zawng zawngin in kum dang nena khaikhinin engmah an siam chhuak hlei thei lo a, chumi anih avang chuan hna thawhktu tam takin an hlawh chhuak lo a, chu chu GDP  tlak hniamna tur entirtu a ni. Kawng leh lamah chuan țhang tura beisei awm chu agricultural sector a ni a, chu pawh chu hri hian nghawng a nei tho tura ngaih a ni.  GDP tlak hniamna  tun Q1 FY2021 chhung hian 25% hnaih thluak turin kan dah a, chutah chuan  agriculture sector kan chhiar tel lo thung a ni, " a ti. 

State Bank of India-in kar hmasa khan  report an tih chhuak a, chumiin a tar lan dan chuan June quarter GDP thil siamtu lian (corporate) ho beisei aia an chet țhat avangin rin loh zawng takin a nih theih thu a sawi ve thung.  "A pumpui ang chuan, company te ațanga chhiah hmuh leh khawn khawm zawng zawng chu a tla hniam a, mahse nasa tak chuan a chhe bik vek lo, chuvangin Q1 FY21 chhunga GDP hnung tawlhna (de-growth) hi –16.5% a ni ang," tih SBI report chuan a tar lang a ni. 

Economy țhan leh țhan loh ti langtu, index of industrial production (IIP), Purchase Manager's Index ( PMI) te, motor chi hrang hrang hralh chhuah te  hi June quarter chhung hian a hniam nasa hle a ni. Chawh rualin IIP pawh  36%  laiin  April-June chhungin a hniam a, commercial vehicle hralh pawh  hemi chhung hian  84.8% laiin a hniam bawk a ni.

Thu lawmawm lam erawhchu, fur ruah tui a tlak that avangin lo neitu, thlai chingtu ten tui lak tur an hmuh țhat avangin fur laia thlai seng theih-vaimim etc (kharif crop) te a thar hlawk a, chu chuan 3-4% vela țhang tura beisei a ni. Hetiang a ruah tui a țhat avang hian thlasika seng tur thlai pawh thar țha tura ngaih a ni bawk. 

Pranjul Bhandari, chief India economist HSBC chuan sector hrang hrang June quarter GDP data ah hian a awm loh chuan NSO tehna hi a huang zawngin a awm thei a ni a ti. 

"Ram chhunga hri pui leng rapthlak tak hian thil siam chhuahna lian leh te mai bakah, thil siamtu tenau a kahpaha thil siamtu (informal sector) thlengin an tuar nasa hle a ni. Thil siamtu lianho chauh ațang data hi khawn a nih chuan, informal sector data lak tel anih loh chuan a dinhmun dik tak a phawk chhuak phak lo thei a, GDP chu a nihna aiin a dah sang thei a ni. NSO hian  GDP tlak hniamna hi 17.5% vela an dah anih pawhin a ti hniamtu tur an fawmkhawm kim tawk loh avangin  25% vela sawng te anga an ennawn leh tho a țul mai thei," Bhandari chuan a ti.

Source :
Livemint
August 30, 2020
@ 02:21 PM IST

===30==08==20=
Huna Kawlvawm

Post a Comment

0 Comments