COVID-19: NEW NORMAL!

- Kenny Muankima

A hma kha chuan kan rama a luh ve lohna turin theihtawpin ṭan lak kan tum a, tunah chuan a danchah dan kawng zawngin kan ṭul ta thung a. Chuvangin Covid-19 avanga ṭawngkam lâr tak - NEW NORMAL hi tun ṭum chu i han chip zuai zuai teh ang.

Virus buaithlak Covid-19:

A inkaichhawn theih dan kan hria a, fimkhur dan tur kawng:

- A theih hram chuan ina tawm

- A theih hram chuan hna pawh in aṭanga thawh

- In lama thawh theih ngang loh pawhin mahni inveng rana thawh

- Zin veivak phur chi - a huho a chuanna ang chia zin veivah loh

- Loh theih loha chhuah pawhin 6ft aia hnaia midang hnaih loh

- Midang nena awmho na hmuna mask vuah

- Kan nuamsam lo a nih chuan chhungte lak aṭang pawha awm hran rih

- Sahbawn leh tuilum hmanga 20 seconds aia rei lo tal kut sil fo emaw, sanitizer hman

- Hahchhiau leh khuh dawna rawmawl hmanga hmai hup emaw kiu bul bawr vela hmai hup

- Kut silfai hmasa lova kâ, hnar leh mit khawih loh

tih ang reng vel hi chu kan hre ṭhem ṭhum a, mahse awlsam te anga lang si hi zawm a har fo lawi si. Chu mai ni lovin virus lama mithiam te hian he virus hian kum eng emaw zah chu khawvel min la luahlumpui an ring deuh zel mai bawk si. Chuvang tak chuan ani he virus hi a buaithlak tâk em em chu ni..

Vannei leh vanduai kâr:

He virus kai hi fimkhur leh fimkhur loh vangah pawh a la innghat ta chuang lo cheua a lang hian vannei leh vanduai kar a nihzia a tichiang mai awm e. Covid patient paw kual lawp lawp tuin a kai miah lo a, covid patient naute pawmlai leh a pasal te pawhin an kai loh laiin, inhnaih lutuka lang lem lova lo inbe zuai te pawhin an kai leh tho niin a lang bawk si! Vanneih leh vanduai kâr a ni.. A kai te ni lovin a virus a zawk hi kan buaina a nih miau avangin mihring leh mihring inthinhrik chi a ni lul lo..

Hnungtawlhna:

He virus, tun hma lama kan la hriat ngai loh vang hian a ruahman lâwk loh lamah ram tinin a budget a pawtpeng a, ram economy a nghawng. Mipui lah kan invenna lamah kan sum lakluh a tlahniam a, a ram, khawtlang, chhungkua leh mimal ang pawhin a hma kan pha hlei thei lo. Chuvangin zawimuangin kan hnungtawlh dul dul a ni ber..

Hlauhawm loh si hlauhawm si:

Khawvelah hian Covid an kai a ni tih inhre miah lova pal dam mai mai tam tak an awm tawh an ring a. Chung zingah chuan Mizo te ngei ngei pawh hi kan tel lovang tih a sawi theih loh. Mahse, natna benvawn leh khirh nei sa tan te, kum lama upa zawk te leh naupang zawk ten an tuar bika a lan miau avang te, kum lama upa zawk leh naupang kawl deuh vek kan nih avang te hian he natna kan hlauh miah loh hi kan hlau ṭhum bawk si!

New Normal chu le:

Heng thil hrang hrang avang tak chuan NEW NORMAL hi a lo lâr chhuak ta hluai ti ila kan tisual lo ang. Hnungtawlh zawnga kal lo turin nun phung ngaia kan kir a ngai a, he virus thahna tur damdawi la awm lo leh a kai te a bika enkawlna tur bik damdawi la siam chhuah loh hi dangchat turin kan nunphung erawh kan thlâk a ngai. Chu chu a tawi zawngin NEW NORMAL (Nunphung ngai thar) tiin an sawi ta mai a ni.

Engtin nge ni dawn?

Kan ram dinhmun thlir hi chuan engtikah emaw la kai thei leh kai vek tur kan ni hial emaw tih tur a ni a. Chuvangin rilru positive taka nun kan hman a ngai a, kan hriselna kan vawn ṭhat sauh sauh a ngai. Chutiang chu tawm reng rik ngawt hmanga neih theih a ni lo tawp ang. Mahse, inkharkhip reng thei kan nih loh vang maia basa ngam chi a ni lo - kan hmangaih kan nu leh pa, pi leh pu leh naute kan ven tel a ngai. Chuvangin fimkhur tak leh inveng takin, a inven dan kawng kan hriat tawh te vawng reng chunga nunphung thar kan din ve a ngai tawh zawk a ni mai em?

Ṭawng huatthu suhah thingtlang chengker apiangah khawtlang tháu a man a, an inkharkhip nasa a, khawpui lam aiin nunpung a harsa/khaihlak nasa zawk hle bawk.. Unlock India meuh pawhin he virus hlauh thlabarna lak ata min la chhuah zalen ve hek lo le.. Chuvangin kan hawi a zau a ngai a, hmalam hun ngaihtuaha ke kan pen ve a ṭul..

NEW NORMAL tur hian nangmah kha lo inbuatsaih ṭan la, i inpeih rual rualin i chhungte lo zirtir ve ta che. Tichuan, kan zaa kan zawm ṭhap ṭhap theih hunah he virus vanga thlabarna leh nunphung khaihlakna te hi kan la hneh let leh ang a, engtik niah emaw chuan hnehna hnehna hlado kan la chham khum ngei ang..

Nang chu, lo fimkhur la, lo him ang che..