COVID 19: Mizoram-ah a san ber laiin case 5000 vel lai nei thei dinhmunah kan ding - Health Minister

Aizawl | August 15, 2020: Health Minister Dr R Lalthangliana chuan, Covid-19 do kawngah Mizoram mipuite kan tang ho takzet a ni tiin H&FW leh Department hrang hrang thawktute, tlawmngai pawlte, LTF, Kohhran hruaitute leh mipui thahnemngaihna leh thawhrimna avangin an chungah lawmthu a sawi.


Covid-19 hrileng mek hian engtik thleng nge a awh dawn a hriat lohva, kan hnaivai maia awm State leh ram dangah te a pung zel a, kan fimkhur lehzual a tul takzet a ni tiin sawrkar laipui Health Ministry mithiamten Mizoram hi December thla ah kan peak tura an chhut thu leh a peak hunah case 5000 vel lai nei thei dinhmuna kan din thu Minister chuan a sawi.



Sawrkarin theihtawp chhuah mek zelin tun dinhmunah Truenat Quattro (Mini RT-PCR) khawl chu Mizoram District tinah thlen pui tawh niin bun fel tura hmalak mek a nih thu a sawi. He khawl hmang hian Covid 19 mai bakah natna hrang hrang  chi 16 test theih anih thu a sawi bawk.

Health & Family Welfare Minister Dr R Lalthangliana chuan Lawngtlai atangin vawiin chawhnu khan Lunglei khawpui thlengin Civil Hospital Lunglei a tlawh a; Trauma Centre building sak mek leh Truenat Labaratory te a enfiah a, Civil Hospital thawktute nen inkawmhona hun hmangin thu a sawi a ni.


Health & Family Welfare Minister hi H&FW Secretary Pu H. Lalengmawia, DHME Director Dr T. Lalhmangaihi leh official dangten tawiawmin Lungleiah hian HPC Vice Chairman Pu Lawmawma Tochhawng, Lunglei South bialtu MLA Dr K. Pachhunga, CMO Dr Lalthlamuana, Medical Superintendent Dr SR Ngurchamliana leh official dangte, Lunglei MJA leh party hruaituten an lo dawngsawng a ni.

Health & Family Welfare Minister ho hian Lunglei Civil Hospital building bula building sak mek Trauma Centre building tur an enfiah a. Hemi hnu hian Lunglei Civil Hospital TrueNAT laboratory ah khawl an dawn thar Truenat Quattro bun tura hmalakna te enfiahin thawktute ruahmanna a siam pui a ni.

NHM kaltlangin Lungleiah Doctor pahnih – ENT leh Radiation Oncology specialist-te lak thar an nih thu leh thawktu indaihlona phuhruk turin Department-in hma a lak zel thu a sawi a. H&FW Department thawktute chu an mamawhte thlen vat thin turin a chah bawk a ni.

Lunglei Civil Hospital Truenat Lab ah hian nimin (14/08/2020) thleng khan sample 1386 test tawh a ni. Lunglei District-ah Covid-19 positive hmuhchhuah mi 108 awm tawhin an zinga mi 69 chu discharged tawh an ni a; tun dinhmunah Covid-19 positive case 39 an awm mek a ni. 

Post a Comment

0 Comments