BRITISH ARMY ROYAL GURKHA RIFLE I BEL CHIANG ANG, NEPAL IN HARSATNA A SIAM DAWN EM ?

Kumpinu sipai ah Gorkha ho hi kum 200 chuang zet chu huaisen leh rinawm leh thuawih nia hriat hlawhin hming țha takin an țang tawh a, Nepal sorkar hi tun hnaiah a rilru put hmang a danglam ta riau mai a, Gorkha ho hian he dinhmun hi an luah zel thei ang em tih sawi a harsa dawnin a lang țan ta tlat mai.


Tun dinhmuna British Army zinga 3% lai ni thei Gurkha ho hi tute nge an nih, kum 2015 khan Royal British Army a an țanna kum 200 a lo ni reng tawh a ni. Gorkha sipaite hian British-in indo a neih apianga an huaisenzia chhinchhiah tlak takin sulhnu hnutchhiah ziah țhin a ni. 

 British Army chuan nikum  March thla daih tawhah khan  Nepalese /Gurkha tan bik Specialised Infantry Battalion din anih thu a lo puang tawh a, hemi tur hian mi 800 vel lak an ni bawk.

*British army a an luh dan*
British Indian leh Nepal hi Anglo-Nepalese War 1814-16 ah khan nasa takin an indo a, ralthuam nei țha zawk  Kumpinu (East India Company) sipaite chu a tawpah anmahni  Gorkha Kingdom sipaite nunna hloh awm mang loin  hnehna an chang a. He indonaa Gorkha sipaite inthununa țhatzia leh thu an awihzia te, an huaisen leh inpekna thukzia an hmuh chuan British chuan kum 1815 ațang khan Gurkha ho chu sipai atan an la țan ta a ni. Hemi hnu ațang hian Gurkha ho chuan British Empire in raldo a neih apiang an huaisenna leh rinawmna chhuan tlak takin an lan chhuah tir zel țhin a, World War I & II ah pawh Gorkha sipaite huaisenzia hi khawvelin a pawm a ni. 



British kut ațanga India ramin Independence kum 1947 a hmuh khan Gurkha Regiment 10 battalion awmzui zel dan tur thu a buai ta deuh a, he buaina hi ram pathum Britain-India-Nepal Tripartite Agreement hmanga chin fel a ni ta a. He inremna thu ang chuan heng battalion 1st, 3rd, 4th, 5th, 8th, and 10th Gurkha Rifles regiments te chu  India ramin a chang ang a, battalion dang 2nd, 6th, 7th, and 10th Gorkha regiment  te chu Britain kutah an lut thung ang tiin inremna an siam a ni. Kum  1948 khan India chuan 11th Gurkha Rifles a din belh a,  Gurkhas  sipai British Regiment a luh duh lo te tan battalion thar a ni.

Hemi hnu hian  British Army chuan battalion 4 te chu  Royal Gurkha Rifles (RGR) tiin a thlakin  battalion 3 ah a siam ta a. Royal Gurkha Rifle (RGR) te hi Asia rama British colony ram hrang  Malaysia, Singapore, and Hong Kong, ah te dah an ni a, a hmaa Indian Regiment te lo awmna hmun ruak an luah chho ta a ni.

*Recruitment of Gurkhas*
British ho hian kum tin Gurkha ho hi sipai atan Nepal ramah an la, rengrût țhin a, (Mizoten sipai atan lak hi rengrût kan tih hi recruit ațanga kan țawnga kan sawina a ni ngei ang). He sipai lakna ni Nepal ram chhunga British Gurkha  Pokhara  khuaah kalpui a ni țhin. He sipai lak rual hian British Army tur chauh ni lo, counter-terror arm of the Singapore Police Force pawh lak țhin a ni. British Army scouts te hian Nepal ram thingtlang hmun hrang hrangah sipai atan an duh an zawng kual țhin a, training hautak zet mai sipai an nih hma hian an paltlang a ngai a ni.

*Lukháwng a neihte*
British Army hi khawvel sipai zinga rorum leh  hautak ber zinga ngaih a ni a, sipai huaisen, butut kawlh leh hruanghrau tak leh thu awih leh thununna țha ber zinga chhiar an ni a. Chutiang zingah chuan Gurkha ho hi hming țha, huaisen, thu awih leh thunun nuam niin British Army pawhin an chhuang hle a ni. Lei sipaiah mai ni lo engineering corps leh logistician ah te pawh an awm bawk. An hnam ralthuam  khukri an hman thiam avangin an hming thanpui hle a, khuhri ngei hi  Gurkha regimental chhinchhiahna (insignia)  Britain leh  India ah chuan a la ni zel a ni.

Britain lalnu Queen Elizabeth II pawhin Gurkha officer pahnih ven ngat a duh a, Singapore Prime Minister  hlui Lee Kuan Yew  pawh khan amah veng turin a ram mi police aiin Gurkha police officer a duh ngat țhin.




*Lukhàwng, hamțhatna*
Tun hma zawng aiin tun hnu kum sawm hnih/thum kal ta ațang khan British Army a Gurkha te dinhmun hi a țha chho ta hle a, hamțhatna engkimah  regular British Army nen an danglam lo a, an pension hnua British citizenship duh thlan theihna pawh British Army Gurkha te  Falklands War,  the Gulf Wars leh  Afghanistan leh  Iraq a tel te phei chuan an nei a ni. Tunah hian  British  ram chhung hmun hrang hrang bakah  Brunei ah te an awm mek a ni.

*India sipai lamah ve thung*
India hian tunah hian Nepal khua leh tui sipai țang lai 35,000 zet a nei a, 1947 ram pathum inremna ang khan kum tin Gurkha hi sipai atan 1300 vel a la ziah țhin.

*Nepal in harsatna a siam*
India leh Nepal hi ram hrang ni mahse thawk dun țha tak an ni a, tun hnai te-ah ram ri avang leh Nepal ramin Parliament ah an ram lem (map) siam thatna dan an siam thar a, hemi avang te hian Nepal Prime Minister Oli chuan ral khat ațangin India ram leh Sorkar hotute chu a tawng ta fo mai a, India erawh chuan zawldawh takin a en thung a.

Nepal Foreign Minister Pradeep Kumar Gayawali chuan kum 1947 a India leh Britain ten Gorkha sipai atan an lak theihna atana inremna (tripartite agreement) an lo siam tawh chu "a țul tawh lo" tih July 31, 2020 khan Nepal Institute of International Relations ten lang biak (video conference) inhmuhkhawm an buatsaihah a sawi a, "he thil hi hmanlai thil" tiin a sawi a ni.

*Inremna ennawn duh*
1947 a ram pathum Nepal-India-Britain te inremna anga Britain leh India ten Gorkha tlangval sipai atan an lak danah hian Nepal sorkar mawhphurhna engmah a awm lo. Kum 2018 a British in Gorkha hmeichhia sipai atan Nepal remtihna tel loa lak atum ațang khan sawiselna a awm țan a, Nepal chuan 1947 a inremna an lo siam tawh chu ennawn a duh a ni. He inremna ang hi chuan Nepal ram chuan foreign army atan thlan danah engmah sawi theih a nei lo a, mimal duhthlannaa innghat a ni. Hemi avang hian Foreign Minister chuan "Nepal sorkar in sipai lak leh thlan kawngah hian a tel tur a ni," a ti.

Hetiang hian Nepal in rawtna nei mahse India leh Britain lam lah chu hre lo ang maiin an ngawi hle hle mai si a, he rawtna hi an phurpui loin an ùksâk lo hle thung a ni.

British/Indian Army atan hian Nepal tlang mi te zing ațanga lak an ni deuh ber țhin. Nepal ram khawthlang lam Magar leh Gurung hnam leh khawchhak lam Karati Rai hnam leh Limbu te an ni deuh ber țhin a ni. Heng zinga tleirawl leh tlangval pian țha leh fel kum tin ram dang sipai atan hlawh leh chanvo țha zawk chang tura an kal țhin chu thikna leh huphurhna a awm țan mek a, tun hnaia Nepal ram hotute China ram laka tlak tlum tuma an phusak hle vang leh China finrawl a chhuah vang a ni lo ang tih sawi theih a ni lo.

Source :
Scroll in
August 28, 2020 

 Indian Express 
March 14, 2019

===29==08==20=
Huna Kawlvawm

Post a Comment

0 Comments