TÛN KÂR CHHÛNGA MIZORAMA THIL THLENG LANGSÂR ZUALTE

Buatsaihtu: V Kungtea
Email: kungteavandiau0785@gmail.com

*29.06.2020:* ZMC leh Champhaia Dedicated Covid Health Centre -a Covid - 19 vei enkawl dam mi 6 chhuahtîr an ni.

• Chawhma lam khan Aizawl Tuikhurhlu vênga Pu Vânlalthlana-te in chu bungrua eng mah chuh hman lovin a kâng ral.

• Khawruhlian Vêngthar Branch YMA Hanga section chuan an khaw chhûnga damlohna avânga hna thawk chhunzawm thei lo, Pu Silthanga-te chhûngkaw lo chu an thlawhsak a, member 60 chuang an thawk chhuak a ni. Tin, Vaphai Branch MHIP te pawhin an khuaa hrisêl lohna avânga hna thawk zawm thei lo, Pu Thanglianchhûma-te lo an thlawhsak a, member 62 an thawk chhuak bawk.

*30.06.2020:* India sorkar leh MNF party-in inremna an ziah champhaphâk vawi 34-na, Remna Ni pualin district hrang hranga MNF ṭhalaite’n a mamawh apiangte hman atân thisen an pe.

• Zîng dâr 6:30 khân Excise & Narcotics Enforcement staff duty-te chuan Mêlbûk thlanmualah heroin hâwng hnih (24.8gms) an man a, a neitu Lalrokima (35) s/o SD Manga of Mêlbûk Bethel Vêng chu an man nghâl bawk.

• Hemi nî hian ZMC, Lunglei, Mamit leh Champhai district-a enkawl, Covid - 19 vei lai mi 62-te chu dam takin damdâwi in aṭanga chhuahtîr an ni.

• ZMC lab-a Covid -19 sample test zîngah positive thar 9 hmuh chhuah a ni.

• Hemi zân hian Zokhawthar Ṭiau kamah Excise & Narcotics Enforcement staff-te leh 8th Assam rifles-te chuan heroin hâwng 7, gram 81.8 an man.

*01.07.2020:* Naupang kum 8 mi pâwngsualtu, Lalthlengkima, kum 36-a upa chu Champhai district Special Judge, Pu R.Vânlalena’n kum 10 chhûng hrehawm taka lung ina tâng tûr leh chêng 4,000 châwi tûrin a hrem a, Champhai Special Judge Pu R.Vânlalena vêk hian ephedrine Kg. 12 neitu Lalsângzuala Chawngthu, Dûrtlâng Leitan chu kum 5 chhûng hrehawm taka tâng tûr leh chêng 4,000 châwi tûrin thiam loh a chantîr bawk.

• Assembly Speaker leh minister hlui, Upa Dr. Rokâmlova chu dâr 7:35p.m. khân kal ṭha lo avângin Ebenezer Medical Centre-ah a thi a, kum 79-a upa a ni.

*02.07.2020:* Mamit leh Lunglei district-a Covid - 19 vei enkawl lai mi pakhat ve vete chu an enkawlna hmun CCC leh DCHC aṭanga chhuahtîr an ni.

• Congress Legislature Party Leader; Thorang bialtu, MLA Pu Zodintluanga’n Civil Hospital Lunglei tâna Covid - 19 test-na khâwl RealTime-PCR khâwl a lei chu Lunglei DC Office lama ni ruk kawl a nih hnuin hemi tlai hian Civil Hospital Lungleiah dah luh leh a ni.

• Zân dâr 8 vêl khân, Falkâwn Community Hall bulah Bullet bike leh truck an insu a, bike khalhtu hi Lalnunsanga, Aizâwl Zotlâng chu a hmunah a thi.

• CLP Leader, Thorâng bialtu MLA, Pu Zodintluanga’n Civil Hospital Lunglei tâna Covid - 19 test-na khâwl RealTime-PCR khâwl a lei chu Lunglei DC Office lamah ni ruk kawl a nih hnuin hemi nî tlai lam hian Civil Hospital Lungleiah dah luh a ni.

*03.07.2020:* Minister hlui, Pu F.Lâwmkima (80), Kulikâwn chu chhûn dar 12 vêl khân a thi. Tlai lam dâr 5-ah vui liam a ni.

• Covid - 19 hri lên mêk laia MNF sâwrkârin party worker-te tâna contract hna a sem duh loh lantîr nân Congress Bhavan kawtah, Dr.Lalmalsâwma Nghaka, President, MPYCC leh Congress Ṭhalai Hqrs. hruaitute chuan Work Order Copy an hâl.

• National Health Mission hnuaia Contractual Association of Mizoram (NHMCAM) chuan hlawh an lâk theih loh avângin Mizoram pumah sâwrkar laka lungâwi lohna lantîr nân badge dum an bel.

• Tv. Lalnunsânga s/o Upa Lalthanglâwta, N.Khawlêk chu Thênzâwl rama a ṭhiante nên inhlawha an kal chu luiah che sualin a tla hlum.

• Chawhnu dar 2:36 khan Khawbung RD Block huam chhûngah magnitude 4.6-a nain lîr a nghîng.

*04.07.2020:* Lungleiah Covid - 19 positive pahnih hmuh belh an ni a, Champhaiah Dedicated Covid Health Center-a enkawl lai mi 3 chhuah an ni.

• Kar kal ta aṭanga lirnghîngin Khawbung RD Block huam chhûnga chhûngkaw eng emaw zât chênna in a tihchhiatte chu Champhai District DC, Pi Maria C.T.Zuali’n a tlawh a, Khawbung, Khuangthing leh Zâwlseia chhûngkaw 26 te chu tlawhin, Disaster Management & Rehabilitation aṭangin chhawmdâwlna tûr a hlân.

• ZMC-ah sample 465 en dik a ni a, 443 chuan hri an pai lo va, hri kai 22 hmuh belh a ni. Hri kai hmuh chhuah tharte hi mipa 19, hmeichhia 3; kum 18 leh kum 56 inkâr an ni a. Aizawl district-a mi 14, Siaha district-a mi 4 leh Lawngtlai district-a mi 4 an ni. Hri kai hmuh chhuah tharte hi state pâwn aṭanga tûn hnaia lo hâw an ni.

*#* He buatsaih lai hian Mizoramah Covid - 19 kai mi 56 an awm mêk.

Post a Comment

0 Comments