🖊️Remmuana Chawngthu📒
A hmasain hmun hrang hranga ṬKP member zawng zawngte TKP DAY chibai vek u le.
Kum 1951 July ni 30 zanah Serkawna ṭhalai leh nu leh pa ṭhenkhat kalkhawmte chuan Kohhran hruaitute leh Zosap Missionary te hriatpui leh kaihhruaina hnuaiah ṬKP (Ṭhalai Kristian Pawl) an lo din a. Pathian hruaina avangin Golden Jubilee leh Diamond Jubilee kan lawm hnuah pawh kum tam a vei leh ta. Min hruaitu LALPA fakin awm rawh se.
*II Timothea 2:21 "Chuvangin, chung thil laka mi a inthiarfihlim chuan bungbel thianghlim, LALPA HMAN TLAK, hnathawh tha tinrenga inpeih sa, ngaihhlut tur mi a ni ang.".*
Kumina TKP Day thupui atan *"Lalpa hman tlak"* tih kan hruaitute'n an thlang leh a, he thu hi sermon/inkhawmpui/hun bik nei inkhawm thupui atan Kohhran hrang hrang te'n an hmang ngun ta malh malh hle ta mai. Kan rilru-ah a nihna turin a thawk nge thawk lo tih inzawt ṭheuh teh ang u.
Rinna a fa nia a sawi Timothea hnenah Tirhkoh Paula hian thu ropui leh ṭha tam tak a sawi a, a fuih nasa hle a ni. Ṭawngṭai chungchang te, Kohhran chungchang te, midangte chunga awmdan tur te, rinna kawnga ke pen dan tur te, rinawmna chungchang te, Lalpa hna ṭha zawka thawk zel tur te bakah kawng tam takin a fuih a, a duhsakin a hmangaih hle tih a hriat a ni.
Aw le, kan thupui hi Paula hian Timothea hnenah hnathawktu pawm tlak chungchang a sawina lamah a sawichhuak a; a sawi selnaah chuan, tleirawl châkna tlansan tur te, thinlunga a Lalpa lamtute zinga felna te, rinna te, hmangaihna te, remna te úm ve turin a ti a ni.
*"Lalpa hming lam apiang chuan sual kalsan rawh se,* (2Tim 2:19)" a ti hmiah mai a. Kan ramah sual kalsan mai ni lo, sualina a bawih beh tlat ten Lalpa hming kan han lam ve thla zen hi a lo dik lo hle tih min hriattir a. Sual húm beh nei tlat chunga rawngbawltu hmingpu ve kan tam,hetiang mi hi Lalpa hman tlak zingah chhiar theih an ni ang em? Rilruin lo chhang theuh teh ang.
A phur leh peih ve nazawng te Lalpan a hmang ngawt ngai lo tih chu Mosia te, Jona te, Paula te chanchin-ah kan hriat ṭheuh ka ring. A chang chuan peih/duh lo chung chung pawhin a hman tlak ni turin a rawngbawltute a chher hriam ṭhin a ni. A tak takah chuan A ram tana beihna kawngah keini ai mahin ṭhahnem a ngai zawk daih a. Amahin a duh anga min chher hnuah, Ama ṭhahnemngaihna zawk hian min tuam ṭhin a lo ni.
Ṭhahnemngai taka leh phur tak a,"I kalna apiangah ka zui ang che."titute'n an zui lo va; inngaitlawm tak chung a, "Lalpa, mi bawlhhlawh ka ni, min kalsan rawh" titute'n an zui leh hlauh thung si a, a hman tlak ni turin a chher zui hmak zui a ni. Inngaihtlawmna dahṭha a chapo âr mai, mi duhám, fing vervek, thlei bik nei rán chunga thuneihna lek ching, pawn lama nui uar uar chunga thinlung tikha tlatte, LALPA HMAN TLAK huangah an lêng mawh khawp ang. Sual paipawn ran chung a, "Lalpa i ram zau nan min hmang rawh," tih ching te kan ni awm e.
Thil engpawh kawng khata hman tlak lo hi kawng dangah kawng dangah ṭha deuh taka hman tlak a nih chang a awm fo ang hian; LALPA tana hman tlak hlek lo hi Diabola tan a hman tlak tak tak an lo ni duh riau a, ringtute i fimkhur hle teh ang u. Thil tam tak, Lalpa tan a hman theih hi Diabola tan a hman theih ve deuh vek mai tih i hre thar ang u.
Bungbel chu hman tlak tur khawpa a lo thianghlim/fai theihna turin tui, sahbawn leh a nawhfaina hmanga uar tak a nawh/sil a ṭul ṭhin a ni. Lalpa hman tlak ni tur chuan, Krista thisen a silfai kan nih hnuah, A khawngaihna hmang a nawh fai ngai kan lo ni. Harsatna thlipuiin a nuai hrep hnu, thlemna tuifawn paldai a, hrehawmna tinrengin a chhaih hrep hnu pawh a zâm leh zuai lo va, Lalpa lam hawi a, A tana ṭang tlattu ni zel teh ang u. Lalpa'n a bungbel thianghlim leh hman tlak ni turin, ni tinin a thiltihtheihnain min thuam thar zel rawh se.
(A hnuaia fakna hi lo hmet ve rawh.)
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: