Pu KL Liana Chanchin (1953 – 2020)



Pu KL Liana hi K. Lalhela (L) leh Laichhúngi (L) te inkârah kum 1953 khán a lo piang a. Zirna lehkha lamah  erawh kum 1960 ti-a dahsak a ni. Pawl 4 thleng Sumsuih-ah lehkha a zir a. P^wl 5 a zir kum, 1971 aṭang khán Pu  S.R. Vala (L), Mission véng, inah awmin Aizawl lamah lehkha a zir chhuak a. Government Aizawl College aṭangin B.A. a zo va. Hemi hnu hian NEHU hnuaiah  L.L.B. a zo leh a. NEHU hnuaiah hian a pumpuiah  pahnihna a ni nghe nghe.


March 4, 1981 khán J. Vanlalruati, Republic vénga mi nèn  inneiin fa 4, fapa 3 leh hmeichhe 1 an nei a. Tûnah hian tu  8, mipa 5 leh hmeichhe 3 an nei tawh bawk. 

Eizawnna Lam 
High School a zawh hlimin Dárlung khuaa Middle  School-ah mi ai a thawk a, hei hi a hna thawh hmasak ber  a ni. Hemi hnu hian Vénghluiah Middle School zirtîrtu hna a thawk leh a; tin, Home Guard office-ah LDC hna te,  Planning Department hnuaiah Assistant hna te a thawk .bawk. July 11, 1983 khán Mizoram Judicial Service hnuah  lûtin Magistrate hna a thawk ṭan a. Tin, kum 2007 thleng khán Liandingpuia Law College (tuna Mizoram Law College ni ta)-ah hian a thawk tawh bawk.
MJS hnuaia hna chi hrang hrang a lo chelh tawhte chu (a thawh ṭan  hun nèn):
  • Judicial Officer-II - August 8, 1989
  • Under Secretary, Law & Judicial - July 11, 1996
  • ADM (J) - March 6, 1998
  • Addl District & Sessions Judge - Oct 13, 2008
  • District & Sessions Judge - April 30, 2013
  • Presiding Officer, MACT - March 3, 2014


MACT hnuaia Presiding Officer hna hi December 31, 2019 thleng thawkin, hemi ní hian superannuation pension-in a chhàwl ta a ni. 

Kohhran Rawngbàwlna Lam 
Tual Upa K.L. Liana hi United Pentecostal Church of North East India kohhrana awm niin, Tuikual UPC  kohhran kháidingtu ber niin, Kohhran a saruak lai ber  pawha hmangaih taka lo tuam hlawm ṭhìn a ni. Kohhran  tan eng mah ui a nei ngai lo. Mi rilru zau leh inhawng tak a ni a. Tualchhûng kohhrante’n a in hi inkhawmna atán kum 20 chuang an hmang nghe nghe. 
Pathian ṭih mi leh Thlarau mi dik tak a ni a. Pathian fak leh chàwimàwi ngaina tak niin, a dam phawt chuan inkhâwm leh zàikhâwm a ṭhulh ngai lo. Tin, inkhâwm kal  a tlai ngai lo va, a thleng hmasa ber pâwlah ṭangin,  khuang lo vaw hmasatu a ni fo ṭhìn. Tin, Crusade leh Chàwimàwina programme-ahte Speaker tûra sàwm a ni fo  bawk. Thu a sawi rei ngai lova, thil nihna tak chiang leh tawi fel taka sawi ṭhìn a ni. Kohhran inkhâwmnaa sak ṭhin zînga a hla duh ber zînga mi chu, “Lalpa, sum ka ngainèp a,” tih hla hi a ni.
Nihna chelh lova rawngbâwl nuam ti mi, mi dangte nihna kian a, dâwm kângtu nih thlang zâwk ṭhìn a ni. Mi dangte pawisawitu leh an rilru hliamtu nih a duh ngai lo. Loh theih lova tualchhûng kohhrana nihna a lo chelh tawhte  chu: 
 Sunday School Zirtírtu (1993-2020) 
 Secretary, Church Board Committee 
 Treasurer, Tualchhûng Building Committee 
 Treasurer, Bial Sunday School Department 
 Secretary, Tualchhûng Missions Department 

Tual Upa K.L. Liana hi UPC kohhran huang pâwnah pawh thusawi tûra sàwm hlawh tak a ni. KṬP leh ṬKP programme-ahte pawh thusawi tûra sàwm a ni fo ṭhìn. A thusawiah mi dangte ṭhat lohna emaw sawisèlna thu emaw hriat tûr a awm ngai lo. Pathian ring tlat leh ṭih tlat mi a 
ni.

Ram leh Khawtláng Rawngbàwlna Lam
Pu K.L. Liana hi mi tlàwmngai tak a nih angin khawtláng rawngbàwlna lamah pawh mi inhman tak a ni a. YMA hruaitu hnate pawh a lo chelh tawh a. A dam phawt chuan Tuikual North lamah chauh ni lovin Tuikual South lamah pawh khawhar in a kal ngei ngei ṭhìn. Tin, véng ṭhenawm hnaiahte pawh kal cháng a nei fo.
Mi harsa zawk ṭhenawm hnaia awmte ṭanpui pawh a hreh ngai lo. A thawmhnaw hâk lái leh lei tharte pawh mamawh zâwk ni-a a hriatte chu a pe mai ṭhìn. Ṭanpui ngaia awmte ṭanpui a inpeih reng ṭhìn a. Mi retheite dikna leh chanvo humhalh duh tlat mi a ni. Ram siamṭhatna tur lamah pawh thuziak hmanga nasa taka thawk ṭhìn a ni. Zoram ṭhan mawhbawk ni-a a hriatte chu huaisen takin chanchinbu hrang hrangah a ziak lang mai ṭhìn. Mizo mipuite’n kan dikna leh chanvo kan hriat theih nán dàn lam thil pawh a ziak fo bawk. Tin, sawrkár hna hrang hrang a thawhnaah ram hmangaihna rilru pu chungin dik leh rinawm takin a thawk ṭhìn. Mi lungléng thei tak a nihzia a thuziakahte a lantir fo bawk. Mizote zingah Reiek tláng tilartu ber a ni a. Thla eng ta neih tlat ṭhìn a ni bawk. Thuziak thiam tak a nih  avangin High School a zirlaite pawhin thuziak  intihsiaknaah lawmman pakhatna a lo la tawh ṭhìn a. A  thuziakte avangin Lelte Award pawh vawi duai lo a lo  dawng tawh bawk. Tin, sawrkar hna rinawm tak leh dik taka a thawh ṭhin avangin chàwimàwina pawh a lo dawng nual tawh a ni.

A Mizia 
Pu K.L. Liana hi dikna ngaina mi a ni a. A hnathawhna  lamah pawh dàn anga dik taka rorèl duh mi a nih avângin  dàn lo anga awmte chu eng ang mi pawh ni se, tu mah a  thliar hrang ngai lo. Tin, a theih phawt chuan mi rethei leh  chanhai zâwka awmte țanpui inpeih reng mi a ni. Hetih  rual hian mi diklo leh mi chapo te hi a ngaithei lo hle ṭhìn.  Mi inngaitlâwm tak leh mi thilphal tak a ni bawk a. 
Fiamthu duh ang reng tak, ṭhiante han fiam vêl pawh nuam ti mi tak a ni. Eng nihna leh dinhmun pawh chang se chapo pui nán eng mah a hmang ngai lo. Tin, mahni neih leh thawchhuah bâka khawsa duh ngai lo a ni a. Kawng engkimah a rinawm hle. Awhna avânga dik lo taka thil tih ai chuan mamawh tih tlèma khawsak thlang ṭhìn zâwk a ni. Eirûkna leh duhàmna hi a hua a, a duh lohzia pawh a lantîr fo ṭhìn. Mi taima leh mahni hnaa tui mi a ni a. Eng hna pawh ni se a dam phawt chuan thawh hreh a nei ngai lo. Tin, mi dangte phût rân chunga thil ti ṭhìn a ni ngai lo. Amah hi zakzum leh inthlahrung tak a ni bawk.

A nun kaihruaitu atána Bible cháng a vawn tlat chu, “tangka sum ngainat hi sual tinrêng bul a ni” (I Timothea 6:10) tih hi a ni a. Pathian thuin “sum tam tak aiin hmingțhat hi thlan zâwk tûr a ni,” (Thufingte 22:1) a tih hi a nun pumpuiah a taka puan chhuah leh lantîr a ni. 

A Natna Lam 
Pu K.L. Liana mi Mizo pa tak leh mi tuarchhel tak a ni a.  Natna a neih pawh sawi zen zen ngai lo, damlo leh na tak chung pawha inkhawm leh offis kal ṭhulh ngai lo mi a ni.  Cancer avanga ṭhàl puak na tak a neih cháng pawhin tiang hawl chungin offis a kái tho ṭhìn. Thih ngama a nat  pawhin, “ka ṭha e” ti tlat ṭhìn mi a ni a. A dam loh leh nat pawhin Mizo pa, pa tlàwmngai tak a nihzia a lantìr fo 
ṭhìn. Kum 2000 khán Non-Hodgkin’s Lymphoma (NHL) cancer a ni tih hmuh chhuah a ni a. Hetih hunlai hian Guwahati lama doctor-te sawi dàn chuan 3rd stage a ni tawh. Mahse, a rin Pathian vènna changin a cancer hian a tibuai lutuk lo. Chemotherapy vawi khat a la hman a, a bâk erawh ala chhunzawm ta lo. Kum 2008 thleng khán eng emaw chângin a kapah leh a zakhnuaiah te ṭhal puak angin a awm ṭhìn a. Hemi hnu lamah erawh a awm ta lo.  Amaherawhchu, thaw-hah erawh a nei nasa tial tial thung. Amah hi mi tuarchhel tak a nih avângin damdawiin luh loh hrâm a duh ṭhìn.

Thawhah bâk insawisèlna êm êm a neih loh laiin 2019 kum tìr lam aṭang khán a dâr na tih châng a nei a. Tin, April thla vel aṭanga a pum lam a sawisèl chu ulcer hrik  nei a ni tih hriat a ni a. Pumpui damdawite pêka enkawl a  nih chho mêk laiin May (2019) thla aṭang khán a kàwng  vêlah na a nei chho bawk a. A kàwng na hian zual lam a  pan zêl avângin June 2, 2019-a Pathianni chawhma  inkhâwm bàn dâwna Lal ṭawngṭaina chu ding chungin a sawi chhuak zo ta ngang lo va. Inkhâwm bânah Dinthar-a  Ebenezer Hospital-ah kalpui nghal a ni. 
Ebenezer Hospital-ah hian a thling (bone marrow) an test aṭangin cancer cell hmuh a ni a; tin, a ríl lamah infection hmuh a ni bawk. Ebenezer aṭanga a chhuah hnu hian Care Hospital, Dawrpuiah rei vak lo enkawl leh a ni a. Hemi hnu hian cancer doctor, Dr. Lalfakzuala (Pu Váltea) ràwn niin, ani hian Cancer Hospital, Zemabawk-ah kum 2019 November thla khán radiotherapy a laktir a; tin, City Hospital, Káwltheihuan-ah a ṭul hun apiangah admit-in a enkawl chhunzawm bawk a ni. 
A hun hnuhnung lamah erawh in lama inenkawl a thlan avângin Pu Váltea ráwn chung zêlin home nurse te ruai bawkin in lamah theih ang tâwka enkawl a ni a. June 25, 2020 aṭang khán zual lam panin, thi-a luakin a e bawk a. Tin, thawhah a neih tel bawk avângin June thla aṭang khán oxygen pêk deuh reng a ni a. A thawhah hi July 3 chawhma lam aṭang khan a rawn zual ta viau mai a. Zia  lam a pan thei ta meuh lo va. A thawhah leh cancer natna  hian a bawh hneh tak em avangin a taksain tlin ta lovin  July 6, 2020 chawhnu dár 3:00 khán thawhlehna ṭha lehzual nghàka Lalpa hnèna a thlarau chawl hahdam turin kal ta a ni.

Post a Comment

0 Comments