Aizawl | July 29, 2020: MSU chuan thuchhuah siamin, "Vanglaini Daily chanchinbu, VOL XXXV No. 180 ni 29. July, 2020 a chhuakin a tarlan danin ni 15. August, 2020 nia India Independence Day Aizawla neih turah Sikul 14 parade a tel tura tih an nih thu a lang a. He thil hi MSU chuan a ngai thutakin, zirlai naupang te dinhmun hlauhthawnawma dahna niin an hria a ni."
Mizo Students Union general headuarters chuan thuchhuah siamin he thu hi an tarlang a, MSU chuan, "Ni 28.07.2020 ni a General Administrative Department thuchhuak (No. F. 200016/4/2012-GAD) in a tarlan, District Level sub. no IV in a sawi danin Independence Day 2020 lawmnaah zirlai naupangte an tel tur a ni lo tih nena inkalh tlat a ni bawk a ni." an ti bawk.
Covid 19 hri leng mek avanga Zirna In zawng zawng khar a nih lai leh, zirna pawh kalpui theih a nih loh laia Independence Day lawmnaa zirlai naupangte parade tura tih an nih hi rang taka sut leh turin MSU chuan Mizoram sawrkar an phut takzet thu an thuchhuah chuan an tarlang.
Sawrkar in I day lawm dan tur ruahmanna a siamna nia hriat darh chu.
He tihlai hian Aizawl DC chuan vawiin khan a hnuaia tarlan ang hian thuchhuah an siam.
(A hnuaia fakna hi lo hmet ve rawh.)
Mizoram Sorkar chuan kumin 2020 Independence Day lawmna Programme chu, COVID-19 hripui leng avangin, kum danga lawm thin dan anga lawm theih a nih dawn loh thu leh, Parade neih thina Sikul Naupang tel thinte pawh an tel a rem dawn loh thute, he ni lawmna Programme hman dan tura kaihhruaina te nen, lehkha No. F. 20016/4/2012-GAD dated 28.07.2020 hmangin Deputy Commissioner zawng zawng a hriattir a.
He hriattirna zawm tur hian District tina Deputy Commissioner leh an thawhpuite pawhin programme an duang chho mek a ni. Hetih lai hian, vawiin dt. 29.07.2020 hian Aizawla chhuak nitin chanchinbu thenkhatah Independence Day lawmna programme-ah Sikul Naupangte tel tur anga thuchhuah a lo awm tih leh, mipui lam pawh he thu hian a tithlabar hle tih hriat a ni a. Aizawl Bawrhsap chuan pawi a ti hle a, sikul naupang nu leh pa, chhungte thlabar lo turin a ngen a ni.
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: