Kan tunlai Mizoram khawvel a bîkin Social media lamah BSF vanga Covid-19 case pun zia a lâr hle mai a. Mipui ti chiai thei àwm tak thuthang dik chiah lo a rawn lâr hluai mai bawk nen, a pawi takzet a ni.
CAPF/ Paramilitary forces ah chuan tunah hian Mizoram-ah BSF hi an tam ber lawr lak a. Battalion pali awmin Battalion tinah hian Sipai tê ber aṭanga lian ber thlengin mi 1200 vel zel awm ang an ni a. Sector Hqr (Army lamah chuan Brigade anti) DIG ṭhuthmun (Durtlang north a mi) leh Composite Hospital a awm leh bawk a (Comp hospital ah hian a hranin DIG Medical te awmin staff ṭhahnem tak an awm bawk).
Hetiang khawp a Department mi leh sa ngah ve ta chu, Chhutri kal tam tak an awm ve a. Hun engemaw chen Covid-19 avanga mahni in lama an tangkhan hnu a DG BSF lam aṭangin Chhutri aṭanga lo haw lo chu an hlawh cut sak an nih tur thu alo chhuah ta a. Loh theih lohvin an hna zawm tur chuan an lo haw a ngai ta a ni.
Red zone aṭanga rawn lêt tam tak an awm bawk a, Covid-19 kai pawh an lo awm lo thei ta lo a ni. Heng vel vang hian, tunah hian Chhutri chhuak lam chu ṭûl bik thil (emergency case) a nih loh chuan tihtâwp sak rih an ni mek bawk.
Chhutri aṭanga rawn haw reng reng hi Silchar aṭangin sipai motor in an rawn in trip chhova, kawng lakah ding kâwi miah lovin BSF Quarantine centre ah direct a dah nghal zel an ni a, Mahni Battalion leh Headquarter an tlawh hmasak hi khauh taka phal loh bur a ni bawk.
Tichuan, Quarantine centre hi kan buaina chu alo ni ta ber a. India sorkar hausa lem lo tak mai motor ah an rawn in ék beng chhova, Quarantine centre ah lah Latrine bathroom inṭawm loh theih a ni lova, Langgar (Choka) hmun khat a ni lo thei bawk lova. Sipai chuti zât ah chuan a mal mal a inenkawlna hran a buaithlak ta em em mai a. He hri chimawm zet mai hi loh theih lohva inkai tâwk an lo awm ta ṭhin a, chu chu a pun chhan ber pawh niin a lang.
Tunah hian Quarantine centre-a awm hote hian hrehawm an tiin, he hri hi an hlau ve em em a, Depression neih phah hial pawh an awm nual tih a awm te ṭawngka ngei aṭanga hriat a ni a. Discipline hnuaia awm an ni a, an duh danin an awm vek thei bîk si loh avangin ṭawngkam chhe tinreng nena deu(h) mai lovin an khawngaihthlak ve tak zet a ni tih min lo hriatpui ula ava lawmawm dawn em. Tin, FB thu post pakhat ah BSF Quarantine centre ami te Mizoram sorkar chàwm vek anga a sawi kha thil dik hlel a ni a. BSF hian a hranin Quarantine centre tur building a neih loh avangin Sorkar hnenah in Quarantine na tur hmun a dil a, Mizoram sorkar chuan phal takin rem alo ruatsak ta a. Ei leh in zawng zawng erawh BSF tum vek a ni.
Pathian zarah Headquarter lamah chuan covid-19 case ala awm lova, keimahni aṭang hi chuan Community spread hi a awm loh kan ring a. Durtlang lam Headquarter ah phei chuan March thla aṭang khan luh leh chhuah hi khap tlat ala ni reng a. Keini local mi leh sa te ngei pawh kan chhutri chhûngin Gate chhungah luh phalsak kan ni lova, kan join hunah pawh a hmasa in min Quarantine thlap phawt a, swab sample test te an tihvek hnu ah kan fihlim chuan kan lût thei chauh a ni.
Tin, kan luh tawh chuan kan Chhutri leh hma chu Camp bul te ah pawh awm mah ila, chhuah phalsak kanni chuanglo. Local mi leh sa Pahnih thum vel pâwn lama office dawr leh ṭul ang ang thawk tur te a bîk a dah niin, anni pawh Gate chhunga luh phalsak anni chuang lo a ni. Tin, Civil lam medical staff ten an rawn thlithlai in an rawn check ve reng bawk a. Hetiang khawp hian theih ang tawkin kan fimkhur ve hle a ni.
Mizo hi chu mi pakhat in engemaw Social media ah thil a post a, tak tak a nih leh nih loh te, enge a bul leh bãl hre lem lova lo support nghal dual dual mai ang chi kan nih avangin kan thil post tur tepawh hi mipui ti chiai leh ti thlabàr thei tur thil anih dawn chuan chinchâng hredeuh chin hnenah zawh fiah hmasak phawt zel nithei se a lawmawm ngawt ang. Chuti lo chuan ṭûl lovah kan mizo mipui rilru nghetlo tak te hi kan chiai nghal nuaih zel mai si a.
Tunah hian Durtlang ah BSF chhûngkua inluah a awm engemaw zat an awm mek a. Zoram mipui te hmuhdan avangin tunah hian rilru hah leh lungngai takin an awm ve mêk a ni a. Kei ngei pawh inbul tê ah awme tilovin camp chhûngah khung tlat kan ni a, inah pawh kan haw theilo chunga kan nupui fanau te engmah thiam lohna neilo ṭawngkhum te an lo tâwk tih ka hria a. A hrehawm in a rilru natthlak takzet a ni.
Tunah hian Quarantine centre pawh kan sorkar hotute ṭhahnem ngaihna avangin khauh taka hmalak mek ani zel a. Medical lam staff tepawh an thawk ṭha a, hma a sâwn zel ang tih kan ring tlat e.
- H Sailo
(A hnuaia fakna hi lo hmet ve rawh.)
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: