KA ZALENNA

Lalvensangi Chawngthu

Zalenna chu engtin nge a awm? Ka zalenna leh i zalenna awmzia chu a inang lo mai thei. Ram ralmuang takah, hun muanawm hnuaia i khawsak avangin zalen i lo inti mai em? Kei chuan kutkawl ka bun loh vang hian zalen ka intingam lo va. Mitdelin a la hmuh ngai loh khaw êng a suangtuah dan ang leh ri hre thei lovin rimawi a hriat dan ang maiin, kei saltang kumhlun hian zalenna chu ka hmelhriat a, ka zawng ve lek a ni. Ka zalenna nghah ṭhin chu ka nun duhthusam lo taka min phuar bettu lak aṭanga ka zalen a, zangkhai taka ka nuih theih ni tur a ni mai thei e.
Tunah hian khawi hmunah nge ka din ka ngaihtuah a, kei chu khawvel pâwna ding daih niin ka inhria. Ka suangtuahna pawh chu lamah hlir chuan a lêng vel a. Khawvel chhung hi ka rawn dai lût ngam reng reng lo va, ka chênna leilungah hian ka tlangnel lo a ni. Tuna ka nihna te, ka kutin a khawih duh zawng a hriat a, ka ke pawhin pan duh lam neia a pên tawhnaah hian, ka chêtvel dan thununtu he ngaihtuahna tel lo hian eng nge ka nih ang a, tu nge ka nih ang tih ka la ngaihtuah ṭhin. Ka naupan lai leh tleirawl lai ka pal tlang vek tawh hnu pawh hian tu nge ka nih tih hi ka inzawt reng ṭhin a. Ka hriatrengna tel lo hian tu nge ka nih ang, eng ang mi nge ka nih ang le ka la ti ṭhin. Nun kawng dang zawhin pêng ta daih ila, kal ka zir ṭan tirh lai te khan lo petek palhin ka kawng zawh lai ata hi pêng ta ila, tuna ka nuihpui ṭhin te hi a ngai têin ka lawm zawng a ni tho ang em? Ka ṭahpui ṭhinte hian ka mittui an kai chhuak leh ṭhin tho ang em tiin ka inzawt ṭhin. Tluksual palh lo tawkin khawvelah hian vakvai tur pawh awm hauh loin bawksawp der ila, nun hian tuna ka hmelhriat leh ṭhian ṭhate hnen hi min hruai thleng tho ang em?
Nunna thâw pêk ka nih lai chuan darthlalang bur ruak ka ni ang a. Ka chhungah hian engin nge min chenchilh ang a, ka thinlung la ruak leh thianghlim, tumahin an tlawhpawh ngai loh chu eng thilin nge rawn luahlum dawn ka hre pha hauh lo va. Ti hian ka ngaihtuah ṭhin, darthlalang bur chuan chhîn a lo nei lo hlauh a, thli fim tura finna ka neih hma siin thlifim leh thlipuiin a duh duh a rawn lên lût a. Ka kawng chu ka zawh mawp mawp a, vaivut leh lungte te, a changin pangpar mal te a rawn lût reng a. Tui thianghlim leh tuihâwk an inthliar lo va, ruah mal leh mittui te pawh.. tichuan darthlalang bur ruak mai kha pênpui harsa khawpa khat ka lo ni ta mai hian ka hria a.
Vaivut nawi mai pawh kum sang tel rit taka delh muk an nih hnu-a lung chang taka an chang thei ang hian, bur ruak kha hmelhmang danglam tak neia hnawh khah a lo ni a. Delh rittu leh ûm zuitu te, tinatu leh tih sual te, hliam leh tawrhna te, nui ri leh mangang au rawl te nen.. tuna ka thinlung hi lung ang chiaha din a lo ni. Ka duhthlannate chu thlipui pawhin a chhêm nghin zawh rual loha khauh, ka duh zawng leh nuam tih zawng te pawh danglam thei tawh lo tluk hiala nghet a lo ni ta. Lungte chu vaivut nawia an letleh thleng tu nge hmu phak ang?
Tah chuan tâwpin 'hei hi ka nunkhua tura khuanu duan a ni' ka ti tawh mai dawn em ni? Hmanlai thawnthu-a a changtunu fel famkim tak ang maiin khuarelin a rel fel dawn leh dawn loh ngaichangin, ka hmaa lo thleng apiang ka lo dawh tawp mai dawn em ni le? Ṭah a ṭul leh ṭap zelin, lemchan a ngaih leh chang zelin, chutiang chuan leilungah hian ka lo inham tâng ṭang ṭang dawn em ni? Mahse, kei chu khawvel pâwnah ka la ding chauh a ni si a. Ka rilru pangkhing lehlamin khawvel daidar a duh lai leh, a lehlamin bihruk kumkhua a duh lai hian ka duhthlanna insual reng ṭhelh daih dan tal ka hmuchhuak dawn lo em ni tiin ka inzawt leh a.
Ka duh lam lam pan turin thahrui ka nei na a, zalen ka ni si lo. Keimahah hian ka tang a, ka nihna saltang mai ka ni. Ka mitin a hmuh a, ka beng hriatnain a nemngheh tawh, ka hriatrengnain a delh muk thinlung chang tak chhungah ngei hian ka tâng a. Ka inhriat ang mi hi niin ka inhre lo va, miin min hriat loh ang hi niin ka inhre ṭhin bawk a. Hrechiang hlein ka inhre ṭhin na a, ka duh leh chak zawng hre kim vek si hian; ka hriatna tel lova inhriat hi ka châk a, ka hriatna tel lo hian zalen chhin ka châk a ni. Ka tih tawh tam tak kha sût lehin, ka tawn tur tam tak kha hêl thei ta ila he hmun hi ka thleng tho ang em, a chhanna ka nei si lo. Darthlalangah ni tin ka inen chung hian ka la inhmu ngai lo a ni.
Khawvel pawnah ka la ding reng a, zawhna tam tak nen. Khawvela zalen taka vawi khat tal lên ve hi ka duhthusam a ni, ni khat lek pawh ni sela. Ka thlakhlelh zalenna chu engtin nge a awm tak tak pawh ka hre hauh lo va, zangkhai takin ka nui dawn pawh a ni mai thei ka tih kha! Ka nihna ka din ngheh sa hi ka tihchim hnuah chuan engthawl takin ka thinrim thei dawn pawh a ni zawk ang a. Darthlalang bur ruak, hnawh khah loh han ni leh chiah ila lang thei khawpin ka lungngai ngam tawh dawn pawh a ni ang. Kawtthlerah te chuan tîm lo takin, ka silhfên duh zawng chauh inbelin ka lên vel theih hi ka ring khawp a; keimah tel loin, lung chang ka chan hma ang kha ka nih chuan. Ka rilru-a riak reng ṭha leh chhia ka lo thliar thiam tawhnate tel lo chuan, an mitmei chhiar hmasa lovin tu nunah pawh ka va tlangnel nghal tawh mai thei. Chu chu ka zalenna sawi chu a ni.
Chu zalenna, ka la tawn ngai loh chu ka duhthusam leh mumang ram ami a nih te pawh ka ring leh rum rum ṭhin. Tu nge hma lam hunah nunhlui tawng leh thei ang ni? Kan kum chhiar dan zawm zel hian a naupang zawngin kan inpaih letleh thei dawn em ni aw? Ka kawng zawh hi a danglam bikin, kual takin ka kal ang a, engtin emaw nausen rilru thianghlim kha ka va pu leh thut thei dawn em ni? "E khai! mumang ram aṭang hian i harhchhuah a ngai a ni?" i lo ti em? Ka ngên a che, harh hlen turin min ngên suh. Ka mumang ram ata rawn chhuak lailawkin he thu hi ka rawn ziak chauh a ni e. He ramah hian ka zalenna chu a lemin ka tem a, hei mai pawh hi ka thlahlel em asin.
Khawvel pawnah hian ka la ding reng a nia. Ka nihna hi khawvela zangkhai taka penpui turin a rit lutuk a, keimah ka intawn a, zalenna ka neih hma chuan ka rawn pen lût thei lo va. Mumang ramah hian ka tâng reng dawn a ni. A nih leh nang, vawn him tur nihna nei lovin, hming leh hmel nei lo ta la, tu nge i nih ve ang le? Chhânna kan zawng ṭheuh a, zawhna bak kan zawng hmu thei si lo!