India sawrkarin a khap tak Tiktok in insawifiah nan hun nei; Khap a ni reng dawn em?

Aizawl | July 1, 2020: India sawrkarin thawhtanni zan atanga Apps 59 a khap zinga mi Tiktok chuan insawifiahna'n hun a nei.

Tiktok apps chu khap zinga a tel hnu-ah khap chhan ram himna tichhia tia sawi chu insawifiahna hun pek an ni.


Tiktok chu nimin atang khan Appstore leh Playstore atangin India ram mite tana install theih loh turin dahbo tawh a ni a. Lo install tawh sa te pawhin nizan leh vawiin lam atang khan an hmang thei tawh lo. Tin, hemi bakah hian tiktok official website tiktok.com pawh tlawh theih a ni tawh lo!

Thudawnnain a tarlan danin, Tiktok hian April thla khan PM CARES Fund ah cheng vbch 30 an lo chhunglut a. Tiktok hian India-ah mi  2,000 chuang hnathawk an nei a. TikTok Chief Executive Officer (CEO) Kevin Mayer chuan an hnathawkte hnenah thu sawiin, sawrkar-ah insawifiahna an thlen tur thu a sawi tawh bawk.

China company India PM CARES Fund a sum chhunglut hnem langsar zualte chu TikTok Rs 30 Crore, Xiaomi* Rs 10 Crore, Huawei* Rs 7 Crore leh OnePlus Rs 1 Crore te an ni.

India sawrkar hian China sawrkar ngeng chhun nana China thilsiam khap a duh a, mahse, thilsiam pangngai ho, a bikin Phone te chu han khap se a tuar tur chu India mipui vek an nih vangin mipui tawrh lohna tur bera ngaih apps lamah a tuan ta niin an ngai a. Hetia Apps khap takte pawh hi boruak a zangkhai deuh chuan, a bikin Tiktok phei chu a khap reng ring lo an awm nuk bawk a ni.

Post a Comment

0 Comments