HSSLC TOPPER LALHLIMPUII DARLAWN KHUA-IN ROPUI TAKIN HMUAK

Aizawl |July 28, 2020: A mit ṭhat loh vanga a thil lei hnai taka a en ṭhin chu, "a thi lei a hnim ṭhin" tia an chhaih fiam ṭhin Lalhlimpuii chuan , "Ka thil lei kha ka hnim ngai lova, a dik leh dik loh ka hriat nan hnai deuhah ka en thin," a ti. Chu hmeichhia ngei chu nimin Darlawn khawpui-ah ropui taka lawm a ni ta a ni.



Nimin khan MBSE hnuaia HSSLC Exam, Art Stream pakhatna, Lalhlimpuii d/o Vanlallura, chuan a pian leh seilenna Darlawn a haw a, Darlawn khawtlang chuan ruahmanna felfai tak siamin HSSLC Topper hi an lo hmuak.

Sawrkarin Covid-19 darh lohna tur atana dan siam vawng chungin HSSLC topper hmuahna leh lawmpuina hi an nei a ni.


Lalhlimpuii hi Darlawn Chhim Veng Branch KTP member nilai mek a nih avangin nizan dar 7:15 khan amah lawmpuina hun KTP te pawhin an buatsaih a, he hunah hian HSSLC topper hian thu a sawi bawk.

Darlawn khua hian HSSLC topper hi ropui taka hmuah an duh laiin hripuiin nunphung a ti buai a. Darlawn Town Area chin Sawleng atang lirthei thahnem tak nena hmuak turin inbuatsaihna an kalpui a, mahse, hripui vangin ang tak chuan a kal thei ta lo a ni.


A lawmna pui ber BRC Conference Hall ah Darlawn Joint YMA ruahmannain nimin khan mi sawm bikte nen  an hmang.

Tarlan thin tawh angin, Lalhlimpuii hi mitthat lohna nasa tak nei a ni a. A naupan lai hun hmasa lamah pawh Durtlang Special Blind School-ah pawl 5 thleng a kal a. Pawl 6 atang pawl 10 thleng Presbyterian English School, Darlawn ah a kal leh a. A mitthat lohna hrethiam takin a bika zirtirna thlengin PES Darlawn hian an enkawl a ni.
PES, Darlawn atang hian pawl 10 distinction ah pass in Top 10 mark 3 vel chauhin a pha lo a ni. Pawl 11 a zawm dawnin Aizawla sikul hrang hrang an be kuala, a mit that loh avangin enkawlna bik pe thei lo an nih zel avangin admission tihna tur an hmu mai lova. St.Joseph Higher Secondary School chuan a zirlaia puih inhuamin admission an pe ta a. St.Joseph HSS laka lawmthu sawi nan Lalhlimpuii chuan HSSLC a subject lakah Topper a ni ta a ni.
Lalhlimpuii hian lehkha a ziak leh chhiar dawnin hnai tak, lehkha leh a hmai insi deuh thawa a en ngai thin a. A tet lai pawhin thil a hmuhfiah theih loh avangin a thil lei a piang hnai takah enin, mi thenkhatin a thil lei apiang a 'hnim' hmasa thin niin an sawi fiamthu sak thin a, amah chuan, "Ka thil lei kha ka hnim ngai lova, a dik leh dik loh ka hriat nan hnai deuhah ka en thin," a ti.

Tunah hian BA zirzawm turin Pachhunga University College chuan lawm takin an lo admit tawh a ni.

With input from: Marova Colneya Bungsut


Ads:





(A hnuaia fakna hi lo hmet ve rawh.)

Post a Comment

0 Comments